Esra 8 - Uwumbɔr aagbaŋ

Binib bi nan nyan ni tinaagbiir ni ki gir ni na

¹ Itaŋaal imina aayidam le nan bi tinaagbiir ni Babiloŋ aatiŋ ni, le ki nan dii min Esra ki gir Jerusalem ni, buyoonn ubɔrkpaan Ataksekes nan ye Pesia aabɔr na:

^2-14 Fineas aataŋaal ni, Gesom. Itamar aataŋaal ni, Daniel. David aataŋaal ni, Sekania aajapɔɔn Hatus. Paros aataŋaal ni, Sekaria ni bijab nkub ni piiŋmu. Tɔ, biyaajatiib aayimbil aagbaŋ nan bi. Pahaf Moab aataŋaal ni, Serahia aajapɔɔn Eliehoenai, u nan joo bijab ikui ilee la. Satu aataŋaal ni, Jahasiel aajapɔɔn Sekania, ni bijab ikui itaa. Adinn aataŋaal ni, Jonatann aajapɔɔn Ebed, ni bijab piiŋmu. Elam aataŋaal ni, Atalia aajapɔɔn Jesaya, ni bijab imonko itaa ni kipiik. Sefatia aataŋaal ni, Maikel aajapɔɔn Sebadia, ni bijab imonko inaa. Joab aataŋaal ni, Jehiel aajapɔɔn Obadia, ni bijab ikui ilee ni kipiik ni biniin. Bani aataŋaal ni, Josifia aajapɔɔn Selomif, ni bijab nkub ni imonko itaa. Bebai aataŋaal ni, Bebai aajapɔɔn Sekaria ni bijab moninko ni biniin. Asgad aataŋaal ni, Hakatann aajapɔɔn Johanann, ni bijab nkub ni kipiik. Adonikam aataŋaal ni, Elifelet, ni Jewel, ni Semaya, ni bijab imonko itaa. Bimina nan paani puwɔb la. Bigfai aataŋaal ni, Utai, ni Sakur, ni bijab imonko itaa ni kipiik.

Liifai yaab bi ga tun Uwumbɔr Aadichal ni aatuln na

¹⁵ M nan kuun binib ngbaan mɔmɔk nnyunsan mu aanyun puu cha Ahafa aatiŋ ni na chee, le ti nan doon nima chee iwiin itaa. M nan kan ke bitotoorb bi binib ngbaan ni, le Liifai yaab ma aa bi.

¹⁶ Le m nan tun yin ni biyidam ngbaan biwae: Elieser, ni Ariel, ni Semaya, ni Elnatann, ni Jarib, ni Elnatann, ni Natann, ni Sekaria, ni Mesulam, ni bimɔmɔkb bilee, Joyarib ni Elnatann.

¹⁷ M nan tun bi Ido, u ye binib ngbaan aayidaan na chee, Kasifia aatiŋ ni, ke bi ti bui u ke u ni uŋeen aatɔtiib bi tun Uwumbɔr Aadichal ni aatuln na tii ni timi binib aan bi nan li tun Uwumbɔr aatuln Waadichal ni.

¹⁸ Uwumbɔr aageehn pu le bi nan di Liifai aanii u nyi lituln ki nyan ni Mali aataŋaal ni aan bi yin u ke Serebia na tun ni, le ujapɔtiib ni ukpetiib ni unaatiib, binib kipiik ni biniin dii ni u.

¹⁹ Bi nan ki cha Merari aataŋaal ni yaab, Hasabia ni Jesaya, ni baamaal binib moninko mu dan.

²⁰ Bi nan ki cha Uwumbɔr Aadichal ni aatutum ikui ilee ni moninko, bi aayaajatiib Ubɔr David ni waaninkpiib nan tii bi kina aatuln ke bi li ter Liifai yaab na, mu dan. Bi nan ŋmee bi mɔmɔk aayimbil bil.

Esra ni binib ngbaan aah lul bumɔb ki mee limeel pu na

²¹ Ahafa Aanyunsan ngbaan chee le m nan siin ke ti mɔmɔk lul bumɔb ki sunn tibaa taab, timi Aawumbɔr chee, ki mee u aan u cheen timi lisachuln ngbaan ni, ki li kii timi, ni timi aabim, ni timi aawan mɔmɔk.

²² M yaa ba nan ti bui ubɔrkpaan ngbaan ke u tii timi bijab bi ga li kii timi bidim chee timi aasachuln ngbaan ni na kan, m ba ga nan jinn mbaa inimɔɔn, ba pu? m nan puen bui u ke timi Aawumbɔr ŋani waanyoor ŋani unii umɔk tii u naadii na pu, le ki nan ki kpaan dar unii umɔk yii waamɔb ki fenn upuwɔb tii u na aatafal.

²³ Ti nan lul bumɔb ki mee Uwumbɔr ke u li kii timi, le u kii timi aameel ngbaan.

Uwumbɔr Aadichal aapiin

²⁴ M nan nyan bitotoorb bi ye bisalolm na ponn ni Serebia, ni Hasabia, ni kipiik biken,

²⁵ le ki nan ŋaŋ tikunabr, ni salmaa, ni ŋisambil ŋi ubɔrkpaan ngbaan ni waasusurb, ni waaninkpiib, ni Israel aanib nan tii ke bi ti li joo tun Uwumbɔr Aadichal ponn ni aatuln na, le ki di tii bitotoorb ngbaan.

^26-27 Maah nan tii bi pu na sɔ: tikunabr ti aanyunyuun ga pii njikaabim bɔtɔ tiib ikui iŋmu na, ni tikunabr aasambil nkub, ŋi aanyunyuun ga pii njikaabim kuruwaa ŋichur ŋitaa ni ikui inaa na, ni salmaa ti aanyunyuun ga pii njikaabim bɔtɔ imonko itaa ni kipiik ni biŋmu, ni salmaa aasambil moninko, ŋi aanyunyuun ga pii njikaabim kuruwaa biniin ni siib na, ni tikumann aasambil ŋilee, ŋi aadaak ni salmaa aasambil na ye tiwanbaan na.

²⁸ M nan bui bi ke, “Uwumbɔr u ye niyaajatiib Aawumbɔr na le nyan nimi, kina le ye tikunabr ni salmaa aasambil ŋi bi joo tii u ipiin na mu.

²⁹ Ni li kii ŋi mbamɔm aan ŋi ti fuu Uwumbɔr Aadichal ni. Ni ti ŋaŋ ni mɔmɔk bitotoorb aadir ni, nima chee, ki di tii bitotoorb aayidam ni Liifai yaab, ni Israel yaab aayidam Jerusalem ni.”

³⁰ Le bitotoorb ni Liifai yaab nan kii tikunabr, ni salmaa, ni ŋisambil ngbaan, ke ni ti fuu Uwumbɔr Aadichal ni, Jerusalem ponn ni.

Binib ngbaan aah nan gir Jerusalem pu na

³¹ Ti nan nyan Ahafa Aanyunsan ngbaan chee njan aaŋmal aawiin kipiik ni ilee daal, le ki cha Jerusalem. Timi Aawumbɔr nan bi ti chee, le ki kii timi bidim, ni binib bi ga keln timi nsan ni na chee.

³² Taah nan ti fuu Jerusalem na, le ti nan di iwiin itaa fuur.

³³ Le ti nan buen Uwumbɔr Aadichal ni winaa daal, le ki ti ŋaŋ tikunabr, ni salmaa, ni ŋisambil ngbaan, le ki di ŋi tii Uria aajapɔɔn Meremof u nan ye utotoor na. Binib bi nan kpee u pu na le nan ye Fineas aajapɔɔn Eleasar, ni Liifai yaab bilee, bima le nan ye Jesua aajapɔɔn Josabad, ni Binui aajapɔɔn Noadia.

³⁴ Ti nan ŋaŋ tiwan ngbaan mɔmɔk le ki kahn ni, le ki ŋmee ni mɔmɔk ŋa kigbaŋ ni, libuul ngbaan ni.

³⁵ N‑yoonn ngbaan le binib bi mɔmɔk nan nyan ni tinaagbiir ni ki gir ni na nan joo ni ipiin ke bi nan toor kitork ki di see mmii ni tii bima Israel yaab Aawumbɔr. Bi nan tii inaaja kipiik ni ilee Israel yaab mɔmɔk pu, ni ipihja imonko inaa ni kipiik ni iloob, ni ipihbi imonko itaa ni kipiik ni ilole; bi nan ki tii iŋoob kipiik ni ilee ke bi di toor bibaa aatunwanbir pu aatork. Bi nan di tiwakor tee mɔmɔk toor kitork ki di see mmii ni tii Uwumbɔr.

³⁶ Bi nan ki nyan ubɔrkpaan ngbaan aah nan tii bi kigbaŋ ki na ki di tii Yufrates Aamɔɔl aawilir aapepel aayidaan ni waaninkpiib, le bi nan tii bi nterm, ni Uwumbɔr Aadichal ni aadoon aaterm.