Esra 7 - Uwumbɔr aagbaŋ

Esra aah fuu ni Jerusalem ni pu na

¹ Nee aapuwɔb, Ataksekes aah nan ye Pesia aabɔrkpaan buyoonn na, le uja ubaa nan bi, bi nan yin u ke Esra. Esra aate le nan ye Seraya, le Seraya mu aate nan ye Asaria, u aate nan ye Hilkia na.

² Hilkia aate nan ye Salum la, le Salum mu aate nan ye Sadok, u aate nan ye Ahitub na.

³ Ahitub aate nan ye Amaria la, le Amaria mu aate nan ye Asaria, u aate nan ye Merayof na.

⁴ Merayof aate le nan ye Serahia, le Serahia mu aate nan ye Usi, u aate nan ye Buki na.

⁵ Buki aate nan ye Abisua la, le Abisua mu aate nan ye Fineas, le Fineas aate nan ye Eleasar, u aate nan ye utotoorninkpel Aaronn na.

^6-7 Esra nan ye ugbanbae la, le ki nyi Israel yaab Aadindaan Uwumbɔr aakaal i u nan di tii Moses na mbamɔm. Esra Aadindaan Uwumbɔr aah nan bi u chee pu na, ubɔrkpaan ngbaan nan tii u tiwan ni mɔmɔk u ban na la. Ataksekes aanaan yoonn aabilolole ni, le Esra, ni Israel yaab bibaa, ni bitotoorb, ni Liifai yaab, ni Uwumbɔr Aadichal ni aawangbaab ni bilahngaab, ni bikikiib, ni bitutum, nan nyan Babiloŋ ki cha Jerusalem.

^8-9 Njan aaŋmal aajan aawiin daal le bi nan nyan Babiloŋ ni, le Uwumbɔr nan ter bi, le bi ti fuu Jerusalem, ŋmaŋmu aajan aawiin daal.

¹⁰ Esra nan di ubaa tii Uwumbɔr Aakaal aabaem la, le ki tun yaah len pu na, ki joo i, ni yaah len pu na mɔk Israel aanib.

Ubɔr Ataksekes aah nan ŋmee kigbaŋ ki tii Esra na aabɔr

¹¹ Ubɔrkpaan Ataksekes le nan di kigbaŋ kimina tii Esra, u ye utotoor ni ugbanbae, u nyi ikaal i Uwumbɔr nan di tii Israel yaab mbamɔm na ke:

¹² “Kigbaŋ kee nyan ni ubɔrkpaan Ataksekes chee la, le ki cha Esra u ye utotoor, ni ugbanbae, u nyi Uwumbɔr u bi Paacham na Aakaal na chee.

¹³ “Min le siin ke maanaan mɔmɔk ni aanib bi ye Israel yaab na, ni bitotoorb, ni Liifai yaab, ki ban ke bi gir dii si buen Jerusalem na kpa kina aasan.

¹⁴ Min, ni maasusurb bilole na, le tun si ke ni ti lik ke Jerusalem, ni Juda aatim yaab joo Saawumbɔr Aakaal mu u di ŋa aaŋaal ni na aan baa joo mu.

¹⁵ Aa ga li joo salmaa ni tikunabr aapiin i m ni maasusurb ban ke ti di tii Israel yaab Aawumbɔr, u Waadichal bi Jerusalem ni na.

¹⁶ Aa ga ki li joo salmaa, ni tikunabr ti aa ga gaa Babiloŋ aapepel mɔmɔk ni aapiin i Israel aanib ni bitotoorb ga tii Baawumbɔr, u Waadichal bi Jerusalem ni na.

¹⁷ “Aa taa ji ŋimombil ngbaan yɔl yɔl, aa di ŋi daa inaaja, ni ipihja, ni ipihbi, ni njikaabim, ni ŋisubil aadaan, ki di ni toor kitork, Uwumbɔr Aadichal aatork aabimbiln pu, Jerusalem ni.

¹⁸ Aa ga ŋmaa di salmaa ni tikunabr ti gur na ŋa nimi Aawumbɔr aah ban ke ni di tun pu na.

¹⁹ Aa ti di ŋisambil ŋi bi di tii si ke bi li joo tun Uwumbɔr Aadichal ponn ni aatuln na, ŋa Uwumbɔr aaŋaal ni Jerusalem ni.

²⁰ Aa yaa ki ban tiwan nimɔk bi di tun Uwumbɔr Aadichal ni aatuln na kan, aa ga ŋmaa di nnaan ni aamombil daa ni.

²¹ “M siin Yufrates aamɔɔl aawilir aapepel aaninkpiib bi tun nnaan aamombil aatuln na, ke bi tii Esra, u ye ugbanbae ki nyi Uwumbɔr u bi Paacham na Aakaal mbamɔm na, tiwan ni mɔmɔk u ban na,

²² ki ti saa tikunabr ti aanyunyuun ga pii ndibim kuruwaa ŋichur ŋitaa ni ikui inaa na, ni njikaabim kuruwaa ŋichur kipiik na, ni ŋisubil aadaan kpalba tiib ŋichur ŋilee na, ni olif aakpan kpalba tiib ŋichur ŋilee na, ni n‑yaan waah ban pu na.

²³ Aa tii tiwan ni mɔmɔk Uwumbɔr u bi Paacham na ban Waadichal ni na, ki taa cha waaŋuul fii m pu, bee bi ga nan paan m pu na.

²⁴ Aa taa gaa bitotoorb, ni Liifai yaab, ni biwangbaab ni bilahngaab, ni bikikiib, ni bitutum, ni unii umɔk tun Uwumbɔr Aadichal ni aatuln na ubaa lampoo.

²⁵ “Le sin Esra, di nlan mu Uwumbɔr tii si na ban binib bi ga li lik ŋitun aabɔŋ na, ni bibɔjirb bi ga li joo Yufrates Aamɔɔl Aawilir aapepel aanib bi mɔmɔk bi Saawumbɔr aakaal ponn ni na. Aa mɔk unii umɔk aa nyi Nkaal ngbaan na.

²⁶ Unii umɔk yii Saawumbɔr aakaal, bee nnaan mue aakaal na kan, bi daa utafal libuul ngbaan ni. Bi ku u, bee bi jenn nyan u kitiŋ ngbaan ni, bee bi gaa waawangol, bee bi di u ŋa kiyondiik ni.”

Esra aah pak Uwumbɔr pu na

²⁷ Le Esra bui ke, “Pak Uwumbɔr, u ye tiyaajatiib Aadindaan na man. U cha ubɔrkpaan kpa mpopiin ke u nyuŋ uma Uwumbɔr Aadichal li bi Jerusalem ni na kina.

²⁸ Uwumbɔr aageehn pu le ubɔrkpaan ngbaan, ni waasusurb, ni waaninkpiib bi kpa mpɔɔn sakpen na lik faar mi. Ndindaan Uwumbɔr pɔɔk ntaakpab, le m ŋman ki cha Israel yaab aataŋaal pam aayidam nyan Babiloŋ ki dii mi gir Jerusalem ni.”