Esra 6 - Uwumbɔr aagbaŋ

Baah ban ki kan Ubɔr Sairus aah nan ŋmee kigbaŋ ki na pu na

¹ Kina pu le ubɔrkpaan Darius nan tii nsan ke bi ban kan kigbaŋ ngbaan, nnaan aagbann ponn ni, Babiloŋ aatiŋ pu,

² le bi nan ti kan ki Ekbatana aatiŋ ki bi Media aapepel ni na, le ki ŋmee kina:

³ “Ubɔrkpaan Sairus aah nan jin nnaan na aajan aabiln ponn ni, le u nan siin nkaal, ke bi ki gir maa Uwumbɔr Aadichal li nan bi Jerusalem ponn ni na, aan bi li toor kitork nima, ki kpee kitork ki bi joo seer mmii ni na mu. Uwumbɔr Aadichal ngbaan aapaacham aafɔfɔk li ye ŋitaa imonko inaa ni kipiik, ki li waa kina mu.

⁴ Bi yaa di ŋitakpal maa iluul itaa kan, bi ti di likpaln paan. Nnaan ponn ni aamombil le bi ga di tun lituln ngbaan mɔmɔk.

⁵ Ki kpee na, salmaa ni tikunabr aasambil ŋi Ubɔr Nebukadnesar nan yoor ni Uwumbɔr Aadichal ponn ni, Jerusalem ni, ki di buen Babiloŋ aatiŋ ni na, bi ki giin ŋi mɔmɔk ti siin ŋaah nan si nin chee Uwumbɔr Aadichal ngbaan ponn ni, Jerusalem ni na.”

Darius aah bui ke bi cha lituln ngbaan li tun pu na

⁶ Le Darius nan di tibɔr timina tun ke: “Yufrates aamɔɔl aawilir wɔb aapepel aayidaan Tatenai, ni Setar Bosenai, ni niŋeen aatɔtiib, taa ki bɔ Uwumbɔr Aadichal ngbaan aabɔr ni man,

⁷ ki taa ki leŋ nsan laamaam. Cha man Juda aapepel aayidaan ni Juu yaab aayidam ki gir maa Uwumbɔr Aadichal, laah nan si nin chee na.

⁸ M sil do ki siin ke ni ter bi aan bi ki gir maa li. Yufrates aamɔɔl aawilir aapepel aah kani lampoo chee nnaan ponn ni aamombil ŋi na, le ni ga li joo pa lituln ngbaan pu mala mala, aan lituln ngbaan taa ki sil.

⁹ Iwiin mɔmɔk kan, ni li tii bitotoorb baah ban tiwan ni na, ki taa yii. Ni yaa ye inaajabi, bee ipiih, bee ipihbi kan, ni tii bi, aan bi li joo seer mmii ni tii Uwumbɔr u bi paacham na. Bi yaa ti ki ban njikaabim, bee n‑yaan, bee ŋisubil aadaan, bee olif aakpan kan, ni tii bi.

¹⁰ Ni li ŋani kina, aan bi li ŋmaa toor kitork ki ga piir Uwumbɔr u bi paacham na aasui, ki mee u ke u ŋa waanyoor ŋa m ni njapɔtiib pu.

¹¹ M ki siin nkaal ke unii umɔk yii maamɔb na kan, bi nyan nlɔkdɔ waadiik ni, ki kpir mumɔb chɔk chɔk, ki di saa chaar u, ki cha waadichal kpaln litapuln.

¹² Uwumbɔr u lee Jerusalem ke bi li dooni u nima chee na, cha ubɔr, bee litimbol li yii nkaal mue ki pɔɔn bibaa ke bi ber uma Uwumbɔr Aadichal ngbaan nima chee na lir. Min Darius le siin nkaal ngbaan. Unii mɔmɔk li joo mu mbamɔm.”

Baah di Uwumbɔr Aadichal tii uma Uwumbɔr pu na

¹³ Le uyidaan Tatenai, ni Setar Bosenai, ni biŋeen aatɔtiib ŋa ubɔrkpaan ngbaan aah siin pu na.

¹⁴ Juu yaab aayidam ngbaan nan maa Uwumbɔr Aadichal ngbaan mala, le Hagai ni Sekaria bi nan ye Uwumbɔr aabɔnabr na nan pɔɔk bitaakpab. Israel yaab Aawumbɔr, ni Pesia aabɔrkpaam Sairus, ni Darius, ni Ataksekes aah nan bui bi pu na, bi nan doo Uwumbɔr Aadichal ngbaan aamaam.

¹⁵ Ubɔrkpaan Darius aayoonn aabiloloob ni aaŋmal u bi yin u ke Adar na aawiin itaa daal, le bi nan doo laamaam.

¹⁶ Le Israel aanib, bitotoorb, ni Liifai yaab, ni binib bi mɔmɔk nan nyan ni tinaagbiir ni ki gir ni na, nan di Uwumbɔr Aadichal ngbaan tii uma Uwumbɔr, ni mpopiin ŋmeen.

¹⁷ Baah nan ban bi di li tii Uwumbɔr na, bi nan kɔr inaaja nkub, ni ipiih ikui ilee, ni ipihbi ikui inaa, ki toor kitork, le ki di iŋoob kipiik ni ilee toor titunwanbir aachapinn aatork; uŋoob ubaa mɔk si Israel aanibol kipiik ni ŋilee na aasisii.

¹⁸ Bi nan ki tii bitotoorb ni Liifai yaab Uwumbɔr Aadichal ni aatuln Jerusalem ni, Moses aakaal aagbaŋ aah nan mɔk pu na.

Lakr‑jer Aajim

¹⁹ Libiln li paa na aajan aaŋmal aawiin kipiik ni inaa daal, le binib bi nan nyan ni tinaagbiir ni ki gir ni na nan jin Lakr‑jer Aajim.

²⁰ Bitotoorb ni Liifai yaab mɔmɔk nan toor bibaa, kaa ki kpa tijɔŋ tibaa. Liifai yaab le nan kɔr Lakr‑jer Aajim aatork aawakor tii binib bi mɔmɔk nan nyan ni tinaagbiir ni ki gir ni na, ni bitotoorb, ni bibaa.

²¹ Israel yaab bi mɔmɔk nan nyan ni tinaagbiir ni ki gir ni na, ni binib bi nan yii binib biken bi nan koo kitiŋ ngbaan pu na aawaa aasan, ki dan ke bi nan li dooni Israel yaab Aadindaan Uwumbɔr na mɔmɔk nan ŋman tiwakor ngbaan.

²² Bi nan di mpopiin jin Boroboro u kaa kpa boroboro aanyɔk na Aajim ki ti saa iwiin ilole. Uwumbɔr aah nan cha Asiria aabɔrkpaan san bi kinimbaak ki ter bi, bi maa bima Israel yaab Aawumbɔr Aadichal na pu, le bi nan kpa mpopiin pam.