Esra 5 - Uwumbɔr aagbaŋ

¹ N‑yoonn ngbaan le Uwumbɔr aabɔnabr bilee bimina, Hagai, ni Ido aajapɔɔn Sekaria nan piin ki tuk Juu yaab bi koo Jerusalem ni Juda aatim muken ponn ni na tibɔr, Israel yaab Aawumbɔr u joo bi na aayimbil pu.

² Sealtiel aajapɔɔn Serubabel, ni Jehosadak aajapɔɔn Josua aah ŋun baabɔr ngbaan na, le bi piin ki ki bi maa Uwumbɔr Aadichal, Jerusalem ponn ni, le Uwumbɔr aabɔnabr bilee ngbaan ter bi.

³ Naa nan yunn, le Yufrates aamɔɔl aawilir wɔb aapepel aayidaan Tatenai, ni Setar Bosenai, ni baaninkpiib biken kpaan dan Jerusalem, ki nan baa bi ke, “Ŋma tii nimi nsan ke ni maa Uwumbɔr Aadichal lee ki toor li?”

⁴ Bi nan ki baa ki bee binib bi mɔmɔk ter lituln ngbaan ni na aayimbil.

⁵ Tɔ, Uwumbɔr nan bi Juu yaab aayidam ngbaan chee, le Pesia aaninkpiib ngbaan aa nan ŋmaa ŋa nibaa, see bi ŋmee kigbaŋ tii ubɔrkpaan Darius, ki ŋun waah ga len pu na waahr.

⁶ Baah nan di tibɔr ti tun ubɔrkpaan ngbaan chee na sɔ:

⁷ “Ubɔrkpaan Darius, Uwumbɔr cha saayoonn li kpa nsuudoon.

⁸ “Ti ban ke sin mpɔɔndaan li nyi ke ti nan buen Juda aapepel, ki ti kan ke bi kpir ŋitakpasakpiin, le ki di maa Uwumbɔr sakpiin na Aadichal, ki di ŋikpan sakpiin saŋ laagon ponn ni. Bidimaab ngbaan joo nlandiin le maa li, le ni cha mɔb mbamɔm.

⁹ “Le ti nan baa binib ngbaan aayidam ke ŋma tii bi nsan ke bi ki gir maa Uwumbɔr Aadichal ngbaan ki toor li.

¹⁰ Ti nan ki baa bi ki bee baayimbil, ke aa li nyi binib bi loln nsan aan lituln ngbaan tun na.

¹¹ “Bi nan gar timi ke, ‘Ti ye Uwumbɔr u naan paacham ni taab na aatutum la, le ki ki bi maa uma Uwumbɔr Aadichal li Israel yaab aabɔrkpaan ubaa nan puen maa n‑yaayoonn na.

¹² Tɔ, tiyaajatiib nan cha Uwumbɔr u naan paacham ni taab na aaŋuul fii, le u nan cha Babiloŋ aatiŋ aabɔr Nebukadnesar, u nan ye Kaldii aanii na, nan nyaŋ bi ki chur bi tinaagbiir. Bi nan wii Uwumbɔr Aadichal, le ki di binib ngbaan buen tinaagbiir ni, Babiloŋ aatiŋ ni.

¹³ Le Ubɔrkpaan Sairus aah nan jin nnaan Babiloŋ aatiŋ ni libiln li ponn ni na, le u tii nsan ke bi ki gir maa Uwumbɔr Aadichal ngbaan.

¹⁴ U nan ki giin Uwumbɔr Aadichal ponn ni aasalmaa ni tikunabr aasambil ŋi Nebukadnesar nan yoor li ponn ni na, Jerusalem ni, ki ti di siin waawaa aadir ni Babiloŋ ni na. Ubɔrkpaan Sairus nan di ŋisambil ngbaan ŋa uja u bi yin u ke Sesbasar, aan u nan ye Juda aayidaan na aaŋaal ni la.

¹⁵ Ubɔrkpaan ngbaan nan bui u ke u di ni giin ti siin Uwumbɔr Aadichal ponn ni, Jerusalem aatiŋ ni, ki ki gir maa Lidichal ngbaan, laah nan si nin chee na.

¹⁶ Le Sesbasar nan dan ki nan bil laadinyikl aatakpal; le laamaam nan piin ki nan saa din wee, tɔ, Uwumbɔr Aadichal ngbaan aamaam aa kee doo.’

¹⁷ “Mpɔɔndaan, cha bi lik nnaan aagbann ni, Babiloŋ aatiŋ ni, ki lik ke Sairus nan sil tii kina aasan ke bi ki gir maa Uwumbɔr Aadichal Jerusalem ni aan waa nan siin, ki cha ti ŋun saamɔboln tibɔr tee ni.”