Esra 4 - Uwumbɔr aagbaŋ

Bidim aah kaa nan kii ke bi ki gir maa Uwumbɔr Aadichal pu na

¹ Juda ni Benjaminn yaab aadim nan ŋun ke Israel yaab bi nyan ni tinaagbiir ni ki gir ni na bi maa Bidindaan Uwumbɔr Aadichal,

² le bi buen Serubabel ni itaŋaal ngbaan aayidam chee ki ti bui bi ke, “Cha man ti ter nimi aan ni maa Uwumbɔr Aadichal ngbaan. Ti mu dooni Uwumbɔrbaan u ni dooni na la; ki nyan n‑yoonn mu Asiria Aabɔrkpaan Esaradonn joo ni timi do na, uma le ti toor kitork tii.”

³ Le Serubabel, ni Josua, ni itaŋaal ngbaan aayidam bui bi ke, “Taa ban nimi aaterm ke ti di maa Tidindaan Uwumbɔr Aadichal. Pesia aabɔrkpaan Sairus aah bui timi pu na, timi tibaa le ga maa li.”

⁴ Le baadim, bi nan puen koo kitiŋ ngbaan pu na, pɔɔn bibaa ke bi faan Juda yaab ngbaan ki yɔl bitaakpab, aan bi di cha ki taa ki maa.

⁵ Bi nan tii Pesia aatiŋ aabɔrkpaan aaninkpiib ŋimombil, ke bi ter bi ki jenn Juu yaab ngbaan. Bi nan ŋani kina ki nyan Sairus aayoonn ki ti saa Darius aayoonn.

Bidim aah kaa nan ki kii ke bi ki gir ma Jerusalem pu na

⁶ Ubɔrkpaan Sekes aah nan laa jin nnaan buyoonn na, le binib bi nan koo Jerusalem aatiŋ, ni Juda aatim muken ni na aadim ŋmee tibɔr ti kaa ŋan na bi pu.

⁷ Pesia aabɔrkpaan Ataksekes mu aayoonn, le Bislam, ni Mitredaf, ni Tabeel, ni biŋeen aatɔtiib, mu ki ŋmee kigbaŋ tii ubɔrkpaan ngbaan. Bi nan ŋmee kigbaŋ ngbaan Aram yaab aaliin ni, le bi ti karni ki ki nabr tii u.

⁸ Le lipepel ngbaan aayidaan Rehum, ni waagbaŋmeer Simsai, mu ki ŋmee kigbaŋ ki bii Jerusalem, ki tii Ataksekes ke:

⁹ “Kigbaŋ kee nyan ni Rehum, u ye uyidaan na, ni waagbaŋmeer Simsai, ni biŋeen aatɔtiib, bi ye bibɔjirb, ni bininkpiib biken, bi ye Elam aapepel aatim Erek, ni Babiloŋ, ni Susa ni yaab na,

¹⁰ ki di kpee binib bi mpɔɔndaan Asurbanipal nan nyan bi baatim ni, ki di bi ti kaan Samaria aatiŋ ni, ni Yufrates aamɔɔl aawilir wɔb aapepel ni kookoo na, aajab chee la.”

¹¹ Kigbaŋ ngbaan aabɔr sɔ: “Ubɔrkpaan Ataksekes, timi saanaagbiib, bi bi Yufrates aamɔɔl aawilir aapepel na le ŋmee kigbaŋ kee tii si.

¹² “Ti ban ke sin mpɔɔndaan li nyi ke Juu yaab bi nyan saapepel ŋiken ni ki gir ni na, nan kal Jerusalem ni, le ki ki bi maa titunwanbir aatiŋ ki nya aapuwɔb na. Bi piin ki ki bi maa kaagon, ki ga gbeen doo ŋi.

¹³ Mpɔɔndaan, bi yaa ki gir maa kitiŋ ngbaan ni kaagon kan, binib ngbaan ga yii, kaan ki pa lampoo, le nnaan ni aamombil ga bar.

¹⁴ Mpɔɔndaan, taah ye saatutum na, taa ban ke kina aatuln tun,

¹⁵ kina pu na, ti bui ke aa cha bi lik aayaajatiib aah nan ŋmee tigbann ti bil na ponn ni. Aa yaa ŋa kina kan, aa ga kan ke kitiŋ ngbaan aa si ubaa aapuwɔb kpala, ki nyan n‑yaajayoonn na, ki tii bibɔrb ni ŋipepel aayidam tibɔr n‑yoonn mɔmɔk la. Kaanib pɔɔ njoom pam. Kina pu le bi nan kuln kitiŋ ngbaan.

¹⁶ Mpɔɔndaan, kina pu na, ti bee ke bi yaa ki gir maa ki ni kaagon kan, saan ki ŋmaa joo Yufrates aamɔɔl aawilir wɔb aapepel.”

¹⁷ Ubɔrkpaan ngbaan aah nan gar pu na sɔ: “M dooni lipepel aayidaan Rehum, ni waagbaŋmeer Simsai, ni biŋeen aatɔtiib bi bi Samaria aatiŋ ni, ni Yufrates aamɔɔl aawilir wɔb na.

¹⁸ “Naah ŋmee kigbaŋ ki tii ni mi na, bi nabr ki, ki karn ki tii mi.

¹⁹ M cha bi fiir lik, ki sil kan ke ki nyan n‑yaajayoonn na, Jerusalem nan yiil nnaan mɔmɔk aamɔb, le ki kpa bibɔbam, ni binib bi kaa si nnaan aapuwɔb na pam.

²⁰ Bibɔrb bi kpa mpɔɔn sakpen na nan joo Jerusalem ni Yufrates aamɔɔl aawilir aapepel mɔmɔk, ki gaal lampoo ni ŋimombil,

²¹ kina pu na, ni siin nkaal ke bijab ngbaan di cha kitiŋ ngbaan aamaam, ki ti saa buyoonn m ga tii nimi bumɔb na.

²² Ŋa kina mala man, aan tibir tibaa taa dan m pu.”

²³ N‑yoonn mu ubɔrkpaan Ataksekes aagbaŋ ngbaan fuu Rehum, ni Simsai, ni biŋeen aatɔtiib na, le bi ŋa mala ki buen Jerusalem ni, ki di mpɔɔn kiir Juu yaab ke bi taa ki maa kitiŋ ngbaan.

Uwumbɔr Aadichal aamaam aah ki piin pu na

²⁴ Uwumbɔr Aadichal aamaam nan sil, kaa ki cha, ki ti saa Pesia aabɔrkpaan Darius aanaanjil aabileler ni.