Esra 3 - Uwumbɔr aagbaŋ

Uwumbɔr aadoon aah ki piin pu na

¹ Joo cha ni ŋmalole ni na, Israel aanib mɔmɔk nan kal kal baatim ni. Nee aapuwɔb le bi mɔmɔk kuun dan Jerusalem ni,

² le Jehosadak aajapɔɔn Josua, ni bitotoorb biken, ni Sealtiel aajapɔɔn Serubabel, ni udo yaab, kpaan ki ki gir maa bima Israel yaab Aawumbɔr aatork aabimbiln, aan bi ki ŋmaa di kitork aanann see mmii ni li pu, ke Uwumbɔr aanii Moses Aakaal aagbaŋ aah nan mɔk pu na.

³ Binib bi nan nyan ni tinaagbiir ni ki gir ni na nan san binib bi nan koo nima na ijawaan, ki mu tee ki gir maa kitork aabimbiln ngbaan, laah nan puen si nin chee na, le ki ki piin ki joo kichakpiik ni, ni kijook aatork aanann seer mmii ni li pu.

⁴ Bi nan jin Tikakar Aajim, ikaal aah mɔk pu na; nwiin mɔk kan, bi nan toor nwiin ngbaan aatork aah ye pu na,

⁵ ki kpee na, bi nan ki toor kitork ki bi ga di kiwakomɔŋ ngbaan see mmii ni na aatork, ni Uŋmapɔɔn Aajim Aatork, ni kitork ki mɔmɔk ye ke bi kuun ki doon Uwumbɔr na, ni ipiin aatork ki bi nan tii Uwumbɔr, bisui aageehn pu na.

⁶ Binib ngbaan aa nan kee piin ki ki bi maa Uwumbɔr Aadichal, le bi nan piin ki toor kitork ma, ki joo seer mmii ni tii Uwumbɔr, ŋmalole aawiin mbaa daal.

Uwumbɔr Aadichal aamaam aah ki piin pu na

⁷ Binib ngbaan nan tii ŋimombil ke bi di pa binib bi kpii ŋitakpal na, ni binib bi lar ki duur ŋikpan na, ki tii tijikaar, ni ndaan, ni olif aakpan ke bi di tun ti kpeln Taya ni Saidonn yaab chee santina aasui, Lebanonn aatiŋ ni. Le bi ga di kina aasugen di deen ni nnyusakpem ni ki nan saa Jopa aatiŋ mɔk. Pesia aabɔrkpaan Sairus le nan tii nsan ke bi ŋa kina mɔmɔk.

⁸ Baah nan ki gir ni Uwumbɔr Aadichal aapaan ni, Jerusalem ni na, aabileler aaŋmalee ni, le bi nan piin lituln. Serubabel, ni Josua, ni bido yaab bi gur na mɔmɔk, ni bitotoorb, ni Liifai yaab, ni binib bi mɔmɔk nan nyan ni tinaagbiir ni ki gir ni Jerusalem ni na, nan kpaan ki tun lituln ngbaan. Liifai yaab bi nan saa ŋibin moninko ki jer na le nan ye Uwumbɔr Aadichal ngbaan aamaam aaninkpiib.

⁹ Liifai aanii Jesua, ni ujapɔtiib, ni udo yaab, ni Kadmiel, ni ujapɔtiib bi aataŋaal nan ye Hodafia yaab na, le nan kpaan ki loln nsan Uwumbɔr Aadichal aamaam ngbaan ni. Henadad aataŋaal yaab bi mu ye Liifai yaab na nan ter bi.

¹⁰ Bijab ngbaan aah nan piin ki bi bilni Uwumbɔr Aadichal aadinyikl aatakpal na, le bitotoorb di baawanpeenkaan peen, le ki joo kakaan tiib biŋaal ni, ki sil baasisiiyaan chee, le Asaf aataŋaal yaab bi ye Liifai yaab na mu yoor baachayakrtuun. Bi nan gaa ilahn ki pak Uwumbɔr, Ubɔr David aayoonn aakaal aah nan mɔk pu na.

¹¹ Bi nan gaa ilahn ki pak Uwumbɔr ke, “Uwumbɔr kpa tiŋann, le waah gee Israel yaab pu na aa kpa ndoon.” Unii mɔk nan tar mpɔɔn pu, le ki pak Uwumbɔr, waah cha bi ŋmaa bil Uwumbɔr Aadichal aadinyikl aatakpal pu na.

¹² Bitotoorb ni Liifai yaab, ni itaŋaal aayidam bi nan por na pam nan kan njan Aameen Aadichal na, le baah si lik Uwumbɔr Aadichal aadinyikl aatakpal ngbaan na, bi nan kaani le ki wii, mpombiin pu, le bi gur na ma nan tar mpɔɔn pu ni mpopiin ŋmeen.

¹³ Ubaa aa nan nyi ni ye iwiil na, ni ni ye mpopiin aafuuk na, ba pu? kifuuk ngbaan nan fuu dandar dandar.