Esra 2 - Uwumbɔr aagbaŋ

Binib bi nyan ni tinaagbiir ni ki gir ni na sɔ

¹ Binib bi nan nyan ni tinaagbiir ni ki gir ni na pam le nan nyan ni Babiloŋ aapepel ni, ki buen Jerusalem aatiŋ, ni Juda aatim muken ni, bi mɔmɔk cha bido aatim ni. Ubɔr Nebukadnesar aah nan chur bi tinaagbiir buen Babiloŋ buyoonn na, bi nan gur koo nima la.

² Binib bi nan ye baasalolm na le nan ye Serubabel, ni Josua, ni Nehemia, ni Seraya, ni Reelaya, ni Modekai, ni Bilsann, ni Mispar, ni Bigfai, ni Rehum, ni Baana.

^3-20 Israel aamaal yaab aataŋaal i nan nyan ni tinaagbiir ni ki gir ni na aakahm sɔ: Paros aataŋaal—binib ŋichur ŋilee ni nkub ni imonko itaa ni kipiik ni bilee; Sefatia aataŋaal—binib ikui itaa ni imonko itaa ni kipiik ni bilee; Ara aataŋaal—binib ikui ilole ni imonko itaa ni kipiik ni biŋmu; Jesua ni Joab aayaabitiib bi ye Pahaf Moab aataŋaal na—binib ŋichur ŋilee ni ikui iniin ni kipiik ni bilee; Elam aataŋaal—binib lichur ni ikui ilee ni piiŋmu ni binaa; Satu aataŋaal—binib ikui iwae ni imonko ilee ni biŋmu; Sakai aataŋaal—binib ikui ilole ni imonko itaa; Bani aataŋaal—binib ikui iloob ni imonko ilee ni bilee; Bebai aataŋaal—binib ikui iloob ni moninko ni bitaa; Asgad aataŋaal—binib lichur ni ikui ilee ni moninko ni bilee; Adonikam aataŋaal—binib ikui iloob ni imonko itaa ni biloob; Bigfai aataŋaal—binib ŋichur ŋilee ni piiŋmu ni biloob; Adinn aataŋaal—binib ikui inaa ni piiŋmu ni binaa; Ater u bi nan ki yin u ke Hesekia na aataŋaal—binib imonko inaa ni kipiik ni biniin; Besai aataŋaal—binib ikui itaa ni moninko ni bitaa; Jora aataŋaal—binib nkub ni kipiik ni bilee; Hasum aataŋaal—binib ikui ilee ni moninko ni bitaa; Gibar aataŋaal—binib imonko inaa ni kipiik ni biŋmu.

^21-35 Binib bi aayaajatiib nan koo ntim mumina ponn ni na aanib bi mu nan gir ni na sɔ: Betlehem aatiŋ yaab—binib nkub ni moninko ni bitaa; Netofa aatiŋ yaab—binib piiŋmu ni biloob; Anatof aatiŋ yaab—binib nkub ni moninko ni biniin; Asmafef aatiŋ yaab—binib imonko ilee ni bilee; Kiriaf Jearim, ni Kefira, ni Beerof aatim yaab—binib ikui ilole ni imonko ilee ni bitaa; Rama ni Geba aatim yaab—binib ikui iloob ni moninko ni ubaa; Mikmas aatiŋ yaab—binib nkub ni moninko ni bilee; Betel ni Ai aatim yaab—binib ikui ilee ni moninko ni bitaa; Nebo aatiŋ yaab—binib piiŋmu ni bilee; Magbis aatiŋ yaab—binib nkub ni piiŋmu ni biloob; Elam aatiŋ kiken na yaab—binib lichur ni ikui ilee ni piiŋmu ni binaa; Harim aatiŋ yaab—binib ikui itaa ni moninko; Lod, ni Hadid, ni Ono aatim yaab—binib ikui ilole ni moninko ni biŋmu; Jeriko aatiŋ yaab—binib ikui itaa ni imonko ilee ni biŋmu; Senaa aatiŋ yaab—binib ŋichur ŋitaa ni ikui iloob ni piitaa.

^36-39 Bitotoorb aamaal aataŋaal i mu nan nyan ni tinaagbiir ni ki gir ni na sɔ: Jesua aayaabitiib aasaloln Jedaya aataŋaal—binib ikui iwae ni imonko itaa ni kipiik ni bitaa; Imer aataŋaal—binib lichur ni piiŋmu ni bilee; Pasur aataŋaal—binib lichur ni ikui ilee ni imonko ilee ni bilole; Harim aataŋaal—binib lichur ni kipiik ni bilole.

^40-42 Liifai aamaal aataŋaal i mu nan gir ni na sɔ: Hodafia aayaabitiib Jesua ni Kadmiel aataŋaal—binib imonko itaa ni kipiik ni binaa; Uwumbɔr Aadichal ni aawangbaab ni bilahngaab bi aayaaja nan ye Asaf na aataŋaal—binib nkub ni moninko ni biniin; Uwumbɔr Aadichal aakikiib bi aayaajatiib nan ye Salum, ni Ater, ni Talmonn, ni Akub, ni Hatita, ni Sobai na aataŋaal—binib nkub ni piitaa ni biwae.

^43-54 Uwumbɔr Aadichal ponn ni aatutum aataŋaal i nan nyan ni tinaagbiir ni ki gir ni na mu sɔ: Siha, ni Hasufa, ni Tabaof, ni Keros, ni Siaha, ni Padonn, ni Lebana, ni Hagaba, ni Akub, ni Hagab, ni Samlai, ni Hanann, ni Gidel, ni Gahar, ni Reaya, ni Resinn, ni Nekoda, ni Gasam, ni Usa, ni Pasea, ni Besai, ni Asna, ni Meunim, ni Nefisim, ni Bakbuk, ni Hakufa, ni Harhur, ni Basluf, ni Mehida, ni Hasa, ni Bakos, ni Sisera, ni Tema, ni Nesia, ni Hatifa.

^55-57 Solomonn aatutum aataŋaal i mu nan gir ni na sɔ: Sotai, ni Hasoferef, ni Peruda, ni Jaala, ni Dakonn, ni Gidel, ni Sefatia, ni Hatil, ni Pokeref‑Hasebaim, ni Ami.

⁵⁸ Uwumbɔr Aadichal ni aatutum, ni Solomonn aatutum aayaabitiib bi nan nyan ni tinaagbiir ni ki gir ni na yaa ti kpaan kan, bi nan ti saa binib ikui itaa ni imonko inaa ni kipiik ni bilee la.

^59-60 Delaya, ni Tobia, ni Nekoda aayaabitiib bi nan nyan ni Tel Mela, ni Tel Harsa, ni Kerub, ni Adann, ni Imer aatim ni ki mu gir ni na, nan ye binib ikui iloob ni piiŋmu ni bilee la, bi mu aa nan tee kpa limɔkl li ga mɔk ke bi ye Israel aanib na.

^61-62 Bitotoorb aataŋaal yee mu aa nan kan limɔkl li ga mɔk ke biyaajatiib nan ye bitotoorb na; ima le nan ye Hobaya, ni Hakos, ni Basilai. Basilai aataŋaal ngbaan aayaaja nan yoor Gilead aatiŋ aaja u bi nan yin u ke Basilai na aabisal, le ki gur joo uchool aayimbil yin ubaa. Baah kaa nan ŋmaa kan itaŋaal ngbaan aayaajatiib aamɔkl na, baa nan di bi kpee bitotoorb pu.

⁶³ Juu yaab aayidaan nan bui bi ke baan ŋmaa ji tijikaar ti bi di tii Uwumbɔr ipiin na, see utotoor u ga ŋmaa di tiwan ni bi yin ni ke Urim ni Tumim na mɔk ke bi ga ŋmaa ji ti na bi nima.

^64-67 Binib bi nan nyan ni tinaagbiir ni ki gir ni na nan ti saa binib ŋichur imonko ilee ni ŋilee ni ikui itaa ni imonko itaa la. Baanaagbiib, bijab ni bipiib, nan ti saa binib ŋichur ŋilole ni ikui itaa ni piitaa ni bilole la. Uwumbɔr Aadichal ni aawangbaab, ni bilahngaab, bijab ni bipiib, nan ti saa binib ikui ilee la. Itaan nan ti saa itaan ikui ilole ni piitaa ni iloob la. Tiwakor ti naahn ubon na mu nan ti saa ikui ilee ni imonko ilee ni tiŋmu la. Laakumii tiib nan ti saa ikui inaa ni piitaa ni biŋmu la. Ibon nan ti saa ŋichur ŋiloob ni ikui ilole ni moninko la.

⁶⁸ Binib bi nyan ni tinaagbiir ni ki gir ni na aah nan ti fuu Uwumbɔr Aadichal chee, Jerusalem ponn ni na, le itaŋaal ngbaan aasalolm bibaa nan tii ipiin, ke bi ki gir di maa Uwumbɔr Aadichal ngbaan, laah nan puen si nin chee na.

⁶⁹ Bi nan tii baah ga nyaŋ pu na; le ipiin ngbaan nan ti saa salmaa u aanyunyuun ga pii njikaabim kuruwaa ikui iŋmu na, ni tikunabr ti mu aanyunyuun nan ti saa njikaabim kuruwaa ŋichur ŋilee ni ikui iniin na, le bitotoorb aawanpeenkaan mu nan ti saa nkub.

⁷⁰ Bitotoorb, ni Liifai yaab, ni binib ngbaan bibaa nan kal kal Jerusalem, ni kaatingbaan ni; le Uwumbɔr Aadichal ni aawangbaab, ni bilahngaab, ni bikikiib, ni laatutum kal kal ntim mu bi gbɔk Jerusalem na; le Israel yaab bi gur na kal kal biyaajatiib aatim ni.