Esra 1 - Uwumbɔr aagbaŋ

Ubɔr Sairus aah nan bui ke Juu yaab gir kun pu na aabɔr

¹ Sairus aah nan ye Pesia aabɔr pu na aajan aabiln ni, le Uwumbɔr nan cha waah nan di waabɔnabr Jeremia len pu na gbiin. U nan cha Sairus siin nkaal mumina, ki cha bi ŋmee mu ki di tun waanaan mɔmɔk ni ke:

² “Pesia aanaan aabɔr Sairus le siin nkaal mue. Uwumbɔr u ye Paacham Aadindaan na le ŋa mi dulnyaa wee mɔmɔk aajojoor, le ki tii mi lituln ke m maa lidichal Jerusalem aatiŋ ki bi Juda aatiŋ ni na tii u.

³ Uwumbɔr li bi nimi bi mɔmɔk ye waanib na chee. Ni buen Jerusalem ki ti gir maa lidichal tii Israel yaab Aadindaan Uwumbɔr, u bi dooni u Jerusalem ni na.

⁴ Waanib bi bi tinaagbiir ni na ubaa yaa ban nterm u di gir kan, binib bi koo gbɔk u na le ga tii u nterm ngbaan. Bi nan tii bi tikunabr, ni salmaa, ni tijikaar, ni tiwakor ti tun ŋitun na, ni ipiin i bi ga ti di tii Uwumbɔr, Waadichal ni, Jerusalem ponn ni na.”

⁵ Le Juda aamaal yaab, ni Benjaminn aamaal yaab aayidam, ni bitotoorb, ni Liifai yaab, ni unii umɔk Uwumbɔr koo usui ni na, gor ke bi ti gir maa Uwumbɔr Aadichal, Jerusalem ponn ni.

⁶ Bimaantɔtiib nan ter bi ki tii bi tiwan pam; bi nan tii bi tikunabr aasambil, ni salmaa, ni tijikaar, ni tiwakor ti tui ŋitun na, ni tiwanbankaan niken, ni ipiin i bi ga ti di tii Uwumbɔr Aadichal ni na.

⁷ Ubɔr Sairus nan giin ŋisambil ni tiyir ti Ubɔr Nebukadnesar nan yoor Uwumbɔr Aadichal, ni Jerusalem ponn ni, ki nan di siin waawaa aadir ni na, tii bi.

^8-10 U nan di ni tii nnaan ni aamombil aaninkpel, Mitredaf, le u ŋmee ni mɔmɔk aah ye pu na tii Juda aayidaan Sesbasar: Salmaa aasambil piitaa, ni tikunabr aasambil lichur libaa, ni ŋisambil ŋiken moninko ni ŋiwae, ni salmaa aasambim piitaa, ni tikunabr aasambim ikui inaa ni kipiik, ni tiwanbankaan niken lichur libaa.

¹¹ Ni mɔmɔk aah nan ti kpaan na, ni nan ye ŋichur ŋiŋmu ni ikui inaa, ki ye salmaa ni tikunabr aasambil, ni tiwanbankaan niken, le Sesbasar ni binib bi nan nyan tinaagbiir ni Babiloŋ ni na di gir kun Jerusalem ni.