Esekiel 9 - Uwumbɔr aagbaŋ

Uwumbɔr aah daa Jerusalem yaab aatafal pu na

¹ M nan ŋun Uwumbɔr teen mpɔɔn pu ke, “Nimi bijab bi ga daa kitiŋ ngbaan aatafal na, dan do man. Li joo ni nimi aajawan man.”

² Libuul ngbaan ni le bijab biloob nyan ni Uwumbɔr Aadichal aapaal aabisamɔb mu bi ŋŋangan wɔb na ni, ubaa mɔk joo tijawan. Uja ubaa nan pee ŋitanyaan aawanpeenkaan ki ŋmal bi ni, ki joo tiwan ni u ga di ŋmee na. Bi mɔmɔk nan dan, le ki nan sil tikumann aatork aabimbiln na chee.

³ Le Israel yaab Aawumbɔr aawiihn mu deer ŋinimbil na fii mu aah ba bi ifeen aawan chee ni na paacham, ki di buen Uwumbɔr Aadichal aabisamɔb chee. Uwumbɔr nan yin uja u pee ŋitanyaan aawanpeenkaan na ki nan bui u ke,

⁴ “Koo Jerusalem aatiŋ ponn ni, ki daan unii umɔk aasui bii aan ni muk u baah tun ŋitun ŋi sukr ponn ni kitiŋ ngbaan ponn ni na aayigbeer pu kidaan.”

⁵ M nan ki ŋun Uwumbɔr bui bijab biken na ke, “Dii u koo kitiŋ ngbaan mɔmɔk ponn ni, ki li ku binib man. Ni taa gur ubaa; ni taa san ubaa kinimbaak man.

⁶ Ku bijaninkpiib, ni binachipɔm, ni bipiisapɔm, ni bipiib bi joo mbim na, ni mbim man. Ni taa meeh unii umɔk kpa kidaan uyigbeer pu na. Piin Maadichal ni do man.” Kina pu na, bi nan di bisalolm bi si Uwumbɔr Aadichal ni nima chee na le piin.

⁷ Uwumbɔr nan ki bui ke, “Koor Maadichal aakoobil man. Cha ŋinikpol gbiin laachiln man. Piin lituln man.” Kina pu na, bi nan piin ki bi ku binib, kitiŋ ngbaan ni.

⁸ Baah bi ku binib kina na, m nan si nima mbaa baanja la. M nan tar lir kitiŋ lichichikr le ki teen ke, “Ndindaan Uwumbɔr, saaŋuul fii Jerusalem aatiŋ pu sakpen le aa ban aa ku unii umɔk gur Israel aatiŋ pu na aa?”

⁹ Uwumbɔr nan gar ke, “Israel aanib ni Juda aanib aabɔr gbii titunwanbir ti bir sakpen na. Bi ku binib kitiŋ kee mɔmɔk pu, le ki di libiil gbiin Jerusalem aatiŋ ni. Bi bui ke min Uwumbɔr yii baatiŋ, kaa ki waa bi.

¹⁰ Maan san bi kinimbaak, m ga ŋa bi baah ŋa biken pu na.”

¹¹ Uja u nan pee ŋitanyaan aawan na nan gir ni ki nan tuk Uwumbɔr ke, “M tun saah mɔk mi pu na doo a.”