Esekiel 8 - Uwumbɔr aagbaŋ

Ŋiwaa ŋi bi Jerusalem aatiŋ ni na aabɔr

¹ Timi aanaagbiir aabiloloob ni aaŋmaloob aawinŋmu daal, le m ni binaagbiib ngbaan aasalolm nan ka maadichal ni. Libuul ngbaan ni le Tidindaan Uwumbɔr aapɔɔn dan nan gbiin mi.

² M nan waan lik paacham, le ki kan unibɔn aabimbin aajawaan aawan nibaa. Ki nyan uchaŋ mɔk ki di sunn taab na, uwon nan naahn mmii la, le ki nyan uchaŋ mɔk ki di jon paab na, uwon nan moor lak lak ke baah jɔŋ tikumann ti mbamɔm na.

³ U nan taln tiwan ni naahn ŋŋaal na ki di chuu maayikpir. Le Uwumbɔr Aafuur Nyaan yoor mi paacham ki di mi buen Jerusalem aatiŋ ni. U nan di mi buen Uwumbɔr Aadichal aabisamɔb mu bi ponn ni, ki bi ŋŋangan wɔb nin chee liwaal li fiini Uwumbɔr aaŋuul sakpen na si na.

⁴ Nima chee le m kan nwiihn mu deer ŋinimbil ki mɔk ke Israel Aawumbɔr bi nima chee na, ke maah nan kan pu Kebar Aamɔɔl chee na.

⁵ Uwumbɔr nan bui mi ke, “Unibɔn, lik aaŋangan wɔb.” M nan lik, le ki kan ke liwaal li fiini Uwumbɔr aaŋuul sakpen na si gbɔk kitork aabimbiln li bi mbisamɔb ngbaan chee na.

⁶ Uwumbɔr nan ki bui mi ke, “Unibɔn, aa kan tiwan ni bi ŋani na aa? Lik Israel aanib aah ŋani tiwan ni sukr ponn ni do pu, ki moo jenni mi maabuul li bi chain na chee na. Aa ga kan inimɔɔn aawan ni jer nimina na.”

⁷ U nan di mi nyan ni lichinjal aabisamɔb chee, le ki mɔk mi liboln libaa ligoln ni.

⁸ U nan ki bui ke, “Unibɔn, wii ligoln ngbaan do chee na.” M nan wii li nima chee, le ki kan jaaleŋ ubaa.

⁹ U nan ki bui mi ke, “Koo ki ti lik titunwanbir, ni tiwan ni sukr ponn ni aan bi bi ŋani na.”

¹⁰ M nan buen ki ti lik. Bi nan naan ikuub ni tiwakor ti kɔ na ŋmeen, ni Israel yaab aah dooni tiwan niken ni na ŋmeen le gbiin ŋigon ngbaan pu.

¹¹ Israel yaab aasalolm imonko itaa ni kipiik le nan ka nima; Safann aajapɔɔn Jaasania mu nan bi bi ni. Bi mɔmɔk ubaabaa nan ka joo baah joo nnyɔknii seer tiwan ni ponn ni na, le nnyɔknii aaŋmanyuu fii paacham.

¹² Uwumbɔr nan baa mi ke, “Unibɔn, aa kan Israel yaab aah looni ki tun ŋitun ŋi libɔɔl ni na aa? Bi mɔmɔk bi kidiik ki ponn ni ye ŋiwaa ŋmeen na, le ki dooni ŋi. Baah len pu na le ye ke, ‘Uwumbɔr aa waa timi. Waa ki bi timi aatiŋ pu.’”

¹³ Le Uwumbɔr nan ki bui mi ke, “Aa ga ki kan ke bi tun ŋitun ŋi sukr ponn ni ki jer kina na.”

¹⁴ Kina pu na, u nan di mi buen Uwumbɔr Aadichal aaŋangan wɔb aabisamɔb chee ki ti mɔk mi bipiib bi ka wii liwaal Tamus aakpuul na.

¹⁵ U nan baa mi ke, “Unibɔn, aa kan aa? Aa ga ki kan ŋitun ŋi sukr ponn ni ki jer kina na.”

¹⁶ Kina pu na, u nan di mi koon Uwumbɔr Aadichal aachinbik ni. Chain aapepel ni, mbisamɔb chee, kitork aabimbiln, ni baah diir nin chee na aakaasisik ni, bijab moninko ni biŋmu nan ka nima. Bi nan fenn bipuwɔb tii chain aapepel, le ki gbaa kitiŋ ki dooni nwiin mu laa bi puur ni na.

¹⁷ Uwumbɔr nan ki baa mi ke, “Unibɔn, aa kan aa? Juda aanib bimina aa lik faar baah tun ŋitun ŋi sukr ponn ni, ni baah tun mbimbinpɔɔl aatun ŋi kitiŋ kee pu na. Baa lik faar kina, see bi dan nan tun ŋi Maadichal mu ni, ki moo fiini maaŋuul. Lik baah pɔɔn bibaa ki seei mi ŋisiibil ŋi wu sakpen na pu na.

¹⁸ Bi ga kan maaŋuul aah pɔɔ pu na mɔmɔk. Maan san bi kinimbaak, kaan di cha pinn bi mu. Bi ga li tar mpɔɔn pu sakpen ki mee mi limeel, le maan gar bi.”