Esekiel 7 - Uwumbɔr aagbaŋ

Israel aatiŋ aadoon peen ni a

¹ Uwumbɔr nan len m chee tibɔr ki bui ke,

² “Unibɔn, min Aadindaan Uwumbɔr aah len Israel aatiŋ aabɔr ti na sɔ: Kitiŋ ngbaan aadoon le na.

³ “Israel aatiŋ, ndoon ngbaan fuu ni a. M ga ji si tibɔr saatuln pu, le aa ga kan maaŋuul. M ga teen si, saatun ŋi sukr ponn ni na mɔmɔk pu.

⁴ Maan san si kinimbaak, kaan di cha si. M ga daa aatafal saah tun ŋitun ŋi aan ŋi sukr ponn ni na pu, le aa bee ke min le ye Uwumbɔr.”

⁵ Tidindaan Uwumbɔr aah ki len pu na sɔ: “Tibɔbir tibaa ga dan aa pu le tiken paan ni.

⁶ Ni mɔmɔk doo a. Ndoon ngbaan le na. Saabɔr doo a.

⁷ Nimi binib bi bi kitiŋ pu na aadoon choo. N‑yoonn peen ni le njim aan ki li bi ŋijoo aawaachur ni, see nlanŋmal ŋmeen.

⁸ “Libuul limina ni le ni ga kan maaŋuul aah pɔɔ pu na. Naah tun pu na le m ga di ji nimi tibɔr, le ki teen nimi aatun ŋi sukr ponn ni na pu.

⁹ Maan san nimi kinimbaak, kaan di cha nimi. M ga daa nitafal, nimi aatun ŋi sukr ponn ni na pu, le ni bee ke min le ye Uwumbɔr, ki bee ke min le dar nitafal.”

¹⁰ Israel yaab aabɔbir aawiin choo.

¹¹ Mbimbin mu pɔɔ na moo kpae la. Kipupuk nyaŋ sakpen a. Mbimbin mu pɔɔ na joo ni mbiin la. Baawangol, ni baanyaan, ni baanyuŋ nibaa kina aan gur.

¹² N‑yoonn ngbaan choo. N‑yoonn peen ni, le kitiirk aan nan ki li kpa ŋitaa; ba pu? Uwumbɔr aah ga nan daa unii mɔmɔk aatafal pu na ga li ye mbaa la.

¹³ Uwumbɔr aatafadaan aah ga dan unii mɔmɔk pu na, utitiir ubaa aan li bi ki nan kan waah nan lir tiwan ni pu na aanyoor. Binib bi tun titunwanbir na aan ŋmar daalbaadaal.

¹⁴ Ukpiin wii, le unii mɔk gor ubaa pu. Ubaa mu aan fii buen butɔb yaan, ba pu? Uwumbɔr aaŋuul ga dan unii mɔmɔk pu mbaa la.

Israel yaab aatunwanbir aatafadaan

¹⁵ Kijaak bi kitiŋ ponn ni, le iween ni nkon bi ŋidichal ni. Unii umɔk bi timoor ni na ga kpo kijaak ni la, le iween ni nkon ga ku umɔk bi kitiŋ ponn ni na.

¹⁶ Bibaa ga san buen ŋijoo ni ke ŋinanjel ŋi tiwan faani ŋi tifatann ni na la. Bi mɔmɔk ga li du baatunwanbir pu.

¹⁷ Unii mɔk aaŋaal aan li pɔɔ, le bitaŋaayil ga li gbaa.

¹⁸ Bi ga peen tiwan ni saak kuub na, le biwon gbaa tɔtɔk. Biyil ga li ye ŋiyikun la, le bi mɔmɔk ga ji inimɔɔn.

¹⁹ Bi ga di baasalmaa ni tikunabr mae kitiŋ ponn ni ke timoor na; ba pu? baasalmaa ni tikunabr aan ŋmaa gaa bi lii buyoonn Uwumbɔr di waaŋuusakpeln lii ni bi pu na. Baan ŋmaa di ni kuln baakpeek, bee bi di ni gbiin bipuu. Salmaa ni tikunabr le di bi koon titunwanbir ponn ni.

²⁰ N‑yoonn mubaa bi nan kpa kigaak baatakpanyaan pu la, le bi di ŋi ŋa ŋiwaa ŋi sukr ponn ni na. Nima le cha Uwumbɔr cha baawangol sukr biponn ni.

²¹ Uwumbɔr len ke, “M ga cha biwɔwɔm su bi nnaayuk pɔɔn, le binib bi bii ikaal na yoor baawangol ki bii li.

²² Binaayukb yaa di mpɔɔn koo ki ti bii Maadichal li ye liwangokpaan na kan, maan gar.

²³ “Tiwan mɔmɔk gur bi yɔl yɔl la, le linikul gbii kitiŋ pu, le ntim ponn ni ye mbimbin mu pɔɔ na ŋmeen.

²⁴ M ga cha ŋitimbol ŋi tun titunwanbir sakpen na dan do ki nan gaa nimi aadichal. M yaa cha ŋitimbol ngbaan bii naah dooni nimi aawaa ŋi na kan, nimi aajab bi pɔɔ sakpen na aawon ga yɔl.

²⁵ Tibɔbir choo, le ni ga li ban nsuudoon, kaan kan.

²⁶ Tibɔbir tibaa ga dan, le tiken paan ni ti pu, le tibɔbir ga li puu fuur ni nimi ke nkpen aah puu pu na. Ni ga gaŋ maabɔnabtiib ke bi tuk nimi baah kan tibɔr ti ga dan ni pu na. Bitotoorb aan li kpa nibaa bi di mɔk binib, le bininkpiib aan li kpa nsurm mubaa bi tii.

²⁷ Ubɔr ga wii ikpowiil, le kitiŋ aayidaan aamakl ga wɔŋ, le binib aawon ga li gbaa ijawaan pu. M ga daa nitafal naah tun pu na pu, le ki ji nimi tibɔr naah ji biken tibɔr pu na. Nimina le ga mɔk nimi ke min le ye Uwumbɔr.”