Esekiel 6 - Uwumbɔr aagbaŋ

Uwumbɔr len ke ŋiwaa aa ŋan

¹ Uwumbɔr nan yin mi ki len ke,

² “Unibɔn, lik Israel aajoo wɔb ki len tibɔbir lii ŋi pu.

³ Bui Israel aajoo ke ŋi pel Uwumbɔr aamɔboln, bui ŋi ke ŋi li ŋun min Ŋidindaan Uwumbɔr aah joo pu tuk ŋijoo, ni ŋigongon, ni ŋijoo aasisik ni aafatann, ke m ga di kijaak aajuk nan kuln binib aah dooni ŋiwaa nin chee na.

⁴ Ŋiwaabimbin ni baah seer nnyɔknii ŋibimbin ŋi pu na ga ber. Bi ga ku binib bi mɔmɔk bi nima chee na, baawaa aataab.

⁵ M ga di Israel yaab aanikpol yaa; m ga di baakpab yaa ŋiwaabimbin ngbaan chee la.

⁶ Israel aatim mɔmɔk ga kuln, aan baawaa, ni ŋiwaabimbin, ni nnyɔknii aabimbin ga wiil yuk yuk, le baah ŋa tiwan ni mɔmɔk na wɔŋ.

⁷ Bi ga ku binib, ni kookoo, le bi ŋmar na ki len ke min le ye Uwumbɔr.

⁸ “M ga cha bi nya linikul ngbaan ni ki yaa koo ŋitimbol ŋiken ni,

⁹ nin chee bi ga li bi tinaagbiir ni na. Nima le bi ga ti teer mbɔr ki bee ke min le daa bitafal ki jinn bi inimɔɔn, bisui i kaa ŋani maah len pu na, ki yii mi ki labr dii ŋiwaa na pu. Baah tun titunwanbir ki ŋani tiwan ni bii binib aayimbil na pu, le biponn ni ga li sukr bibaa pu.

¹⁰ Bi ga bee ke min le ye Uwumbɔr, ki bee ke maah nan sak bi pu na aa ye tifaan baanja la.”

¹¹ Tidindaan Uwumbɔr len ke, “Ŋmaan aaŋaal. Di aataa taa kitiŋ mpɔɔn pu. Li wii ni mpombiin Israel yaab aah tun titunwanbir ni tiwan ni sukr ponn ni na pu. Bi ga kpoi butɔb ni, ni nkon, ni iween ni.

¹² Binib bi bi dandar na ga buŋ le ki kpo; le binib bi bi duun na ga kpo butɔb ni; le bi gur na ga kpo nkon pu. Bi ga kan maaŋuul aah pɔɔ pu na mɔmɔk.

¹³ Ŋinikpol ga li dɔ ŋmal ŋiwaa ni ŋiwaabimbin ni, ki yaa gbiin ligongoln limɔk paa na pu, ni lijool mɔk pu, ni bususoom mɔk, ni likpaln mɔk taab, ni nin chee mɔk bi seer nnyɔknii tii ŋiwaa na. Le unii mɔmɔk ga bee ke min le ye Uwumbɔr.

¹⁴ Mbamɔn, m taln ŋŋaal le ki kuln baatiŋ. M ga cha ki kpaln nkuun, ki nya ŋŋangii wɔb nteersakpiin ni, ki ti saa Ribla aatiŋ ki bi ŋŋangan wɔb na, kaan di cha nin chee mɔk Israel yaab koo na. Le unii mɔk ga bee ke min le ye Uwumbɔr.”