Esekiel 5 - Uwumbɔr aagbaŋ

Esekiel aah kuu uyikpir ni ulangbaln pu na

¹ Uwumbɔr nan bui ke, “Unibɔn, ban kijaak aajuk ki ka na ki di ki kuu aayikpir ni aalangbaln mɔmɔk. Aa yaa ŋa kina doo kan, aa ŋaŋ ki bee taanyunyuun, ki yakr ti nfum mutaa pu.

² Butɔb aajab aah ŋa tiwan ni mɔmɔk ki gob Jerusalem aatiŋ na yaa nan jer kan, aa di liker libaa ŋa mmii ni, kitiŋ ngbaan ponn ni. Di saajaak aajuk chɔi chɔi liker liken buyoonn aa nyan kitiŋ ngbaan ni ki bi chuun na. Di liker li gur na yaa libuln ni, aan m di maajaak aajuk paan ti pu.

³ Gur tikor siib ki di gbin saawanpeenkaan aamɔju,

⁴ ki lee ti ponn ni siib ki di ŋa mmii ni ti wu. Tima ngbaan aamii le ga yaa gaa Israel aatimbol mɔmɔk.”

⁵ Ndindaan Uwumbɔr nan ki len ke, “Lik Jerusalem aatiŋ. M di ki siin dulnyaa aakaasisik ni la, le ntim mu gur na mann goln ki.

⁶ Le Jerusalem aatiŋ yii maakaal, ki mɔk ke ki kpa mbiin jer ntim muken, kaa kii maamɔb ki jer ntim mu mann goln ki na. Jerusalem aatiŋ yii maah mɔk pu na, ki yii ke kaan joo maakaal.

⁷ Jerusalem aatiŋ, li pel min Aadindaan Uwumbɔr aah bi len pu na. Saah kaa joo maakaal, ni maah mɔk pu na na, aa ban tibɔbir ti jer ŋitimbol ŋi mann goln si na aabɔbir. Aa dii ŋitimbol ŋiken aakaal la.

⁸ Kina pu na, min Aadindaan Uwumbɔr le len ke aa ye maadin la. M ga ji si tibɔr nin chee ŋitimbol mɔmɔk ga kan si na.

⁹ Jerusalem aanib aah tun lituln li sukr ponn ni na pu, le m ga daa kitafal sakpen, ke maah kaa kee daa bitafal pu na, le kaan ki ŋa kina.

¹⁰ Kina pu na, tetiib ni natiib bi bi Jerusalem ponn ni na ga ŋmɔ baabim, le mbim mu ga ŋmɔ tetiib ni natiib. M ga daa nitafal le ki cha bi ŋmar na yaa buen ŋipepel mɔmɔk ni.

¹¹ “Kina pu na, maah ye Uwumbɔr u bi n‑yoonn mɔmɔk na, ki ye Aadindaan Uwumbɔr, maamɔboln sɔ: naah di titunwanbir, ni tiwan ni sukr ponn ni na bii Maameen Aadichal na, m ga kuln nimi kaan san nimi kinimbaak.

¹² Nimi aanib ŋiker ŋitaa ponn ni aaker libaa ga kpo iween, ni nkon aakun kitiŋ ngbaan ponn ni; le liker liken ga bee kijaak aajuk aakun ni, kitiŋ ngbaan aagbaan; le m ga di litatar na yaa tii libuln, ki di maajaak aajuk paan bi pu.

¹³ “Nimi le ga gaa maaŋuusakpeln ki ti saa buyoonn m ga bab na. Nimina yaa nan ŋa kan, le ni ga bee ke min Uwumbɔr le di maaŋuusakpeln na len ni chee, naah yii maah mɔk nimi pu na pu.

¹⁴ Ŋitimbol ŋi mɔk mann goln nimi na aanii umɔk jer na ga lik seen nimi, ki gbii ŋinyin dandar ki lik nimi la.

¹⁵ “Maaŋuul yaa fii ni pu sakpen aan m daa nitafal liŋuul pu kan, ijawaan ga chuu ŋitimbol ŋi mann goln nimi na. Biponn ni ga li sukr ni pu, le bi ga li joo nimi ŋani yaansara.

¹⁶ Maan ki cha ni kan tijikaar, le ni ga kpo nkon aaween pu ke ipiin i ka sakpen na le aah choo i nan kuln nimi na.

¹⁷ M ga cha nkon ni ipeel i bir na ku nimi aabim, ki cha iween, ni linikul, ni butɔb ku nimi. Min Uwumbɔr le len kina.”