Esekiel 41 - Uwumbɔr aagbaŋ

¹ Uja ngbaan nan ki di mi koo kaasisik ni aadiik ni, kima le nan ye Chain Aapepel ni. U nan ŋaŋ nsan mu di ti koo ki ponn ni na: mu aah nan waa pu na nan ye ŋitaa kipiik,

² le nfɔfɔk ye ŋitaa kipiik ni ŋiniin, le mu aagon aah gbei pu ŋipepel mɔmɔk pu na ye ŋitaa ŋiniin. U nan ŋaŋ kidiik ngbaan kibaa: le kaafɔfɔk nan ye ŋitaa imonko itaa ni ŋiniin, le nwawaan ye ŋitaa piitaa ni ŋinaa.

³ U nan siir nima chee le ki koo kidiik ki bi ponn ponn ni na ni. U nan ŋaŋ nsan mu di ti koo ki ponn ni na: le mu aah nan waa pu lipepel libaa wɔb na nan ye ŋitaa ŋitaa, le mu aah waa pu lipepel liken wɔb na nan ye ŋitaa kipiik, le ŋigon ŋi bi lipepel mɔk pu na aah gbei pu na ye ŋitaa kipiik ni ŋilee.

⁴ U nan ŋaŋ kidiik ngbaan, ki kan ke ki ye ŋitaa piitaa ni ŋinaa le ŋipepel ŋinaa mɔmɔk pu. Kidiik kimina nan bi kaasisik ni aadiik na aapuwɔb la. U nan bui mi ke, “Chain Chain Aapepel ni sɔ do.”

Tidir ti bi maa tam Uwumbɔr Aadichal aagon na aabɔr

⁵ Uja ngbaan nan ŋaŋ Uwumbɔr Aadichal aaponn ni aagoln aah gbei pu na, le ki kan ke ni ye ŋitaa kipiik la. Uwumbɔr Aadichal aagoln limina pu, bi nan maa tidiwaatiir tibaa tam li, le taawawaan ye ŋitaa ŋilolele.

⁶ Bi nan maa tidir ngbaan tɔŋ tɔb pu nfum mutataa la, le liker libaa mɔk kpa tidir piitaa. Uwumbɔr Aadichal ngbaan aapaal wɔb aagon aa nan gbei ke liker li bi taab na aagon na, bi nan ŋa kina ke tidir ngbaan ga kal ligoln ngbaan pu mbamɔm.

⁷ Kina pu na, aa yaa nan lik Uwumbɔr Aadichal aagoln ngbaan lipaal wɔb kan, ni nan bi ke ngbigbei ngbaan aah ŋak kina ki ti jon paacham le na. Bi nan ŋa ŋibimbin ŋi bi taar joi na ŋiker ŋilee pu tam Uwumbɔr Aadichal aagoln li bi lipaal wɔb na, aan bi li ŋmaa taar koo tidir ti bi lelee aaker, ni taataa aaker pu na ni. Ŋibimbin aasan ngbaan nan waa.

^8-11 Tidir ngbaan aapaal wɔb aagoln ngbaan aah nan gbei pu na nan ye ŋitaa ŋiniin la; jaaleŋ nan bi ki koo tidir ti bi Uwumbɔr Aadichal aaŋangan wɔb na ni, le uken bi ki koo tidir ti bi ŋŋangii wɔb na ni. M nan kan ke bi ŋa likɔl li aawawaan ye ŋitaa ŋiniin na mann Uwumbɔr Aadichal ki ti ton; le laah paa paacham pu na nan ye ŋitaa kipiik, le li ni tidir ti bi ŋigon chee na aadinyikl ŋak tɔb. Mpaan mubaa nan bi bitotoorb aadir, ni likɔl ngbaan aakaasisik ni, le mu aawawaan ye ŋitaa piitaa ni ŋinaa, ki kpak Uwumbɔr Aadichal aapepel mɔmɔk.

Kidiik ki nan bi liwilir wɔb na aabɔr

¹² Kidiik kibaa nan bi Uwumbɔr Aadichal aawilir wɔb aapaan aah ti doo nin chee na; kaafɔfɔk nan ye ŋitaa nkub ni piiŋmu la, le nwawaan ye ŋitaa nkub ni kipiik ni ŋiloob. Kaagon aah nan gbei pu na nan ye ŋitaa ŋiwae la, ki mann ti ton.

Uwumbɔr Aadichal aaŋaŋ aah nan ti kpaan pu na

¹³ Uja ngbaan nan ŋaŋ Uwumbɔr Aadichal aapaal, le naafɔfɔk nan ye ŋitaa nkub ni imonko itaa ni ŋiniin. Ki nya Uwumbɔr Aadichal aapuwɔb nima chee ki di bɔ dii mpaan na ni ki ti ker kidiik ki bi liwilir wɔb na aapuwɔb mu nan ye ŋitaa nkub ni imonko itaa ni ŋiniin la.

¹⁴ Uwumbɔr Aadichal mbisamɔb wɔb, ni mpaan mu bi ŋipepel ŋilee ngbaan mɔmɔk pu na, mu nan ye ŋitaa nkub ni imonko itaa ni ŋiniin la.

¹⁵ U nan ŋaŋ kidiik ki bi liwilir wɔb na, ni kaasan i kpak ki ŋipepel ŋilee mɔmɔk pu na, le ni mu nan ye ŋitaa nkub ni imonko itaa ni ŋiniin. Bi nan di ŋikpan le tam Uwumbɔr Aadichal aanaakook, ni Chain Aapepel aadiik, ni Chain Chain Aapepel ni,

Uwumbɔr Aadichal aawan mɔmɔk aah ye pu na

¹⁶ ki nyan kitiŋ ki ti tuu takolu tiib. Bi nan ga ŋmaa biin takolu tiib ngbaan pu.

^17-18 Bi nan naan naan ŋibɔkpal aasui, ni tiwan ni kpa ifeen na le ki biin Uwumbɔr Aadichal aaponn ni aagon pu, ki nyan kitiŋ ki ti jer jaaleŋ tiib aapaacham. Bi nan naan naan ŋibɔkpal aasui, ni tiwan ni kpa ifeen na ŋmal tɔb ni, libɔkpal aasub sɔ, le tiwan ni kpa ifeen na paa, ki mann kidiik ngbaan ti ton. Tiwan ni kpa ifeen ngbaan na nibaa mɔk nan kpa ŋinimbil wɔb nfum mulelee la:

¹⁹ unibɔn aanimbil wɔb le lik libɔkpal aasub lipepel libaa, le uchinn aanimbil wɔb mu lik libɔkpal aasub bu bi lipepel liken na. Ni nan ye kina le ki mann ligoln ngbaan ti ton,

²⁰ ki nyan kitiŋ ki ti jer jaaleŋ tiib aapaacham.

²¹ Chain Aapepel ni aabisamɔb aadɔ nan ye ŋikpakpan pu la. Tiwan nibaa nan bi Chain Chain Aapepel aadiik aabisamɔb chee

Idɔ aatork aabimbiln na aabɔr

²² ki naahn idɔ aatork aabimbiln. Laah nan paa paacham pu na nan ye ŋitaa ŋiŋmu la, le nwawaan mu ye ŋitaa ŋinaa. Bi nan di idɔ le ŋa laalɔlɔnn, ni idɔ i dɔ kitiŋ na, ni laapepel mɔmɔk. Uja ngbaan nan bui mi ke, “Teebul umina le si Uwumbɔr aanimbiin ni.”

Jaaleŋ tiib aabɔr

²³ Jaaleŋ ubaa nan bi nsan mu di kina ti koo Chain Aapepel aadiik ni na, le uken bi nsan mu di kina ti koo Chain Chain Aapepel aadiik ni na.

²⁴ Bi nan ye jaaleŋ tiib bilelee le ki piir sisik ni.

²⁵ Bi nan naan ŋibɔkpal aasui ni ifeen aawan ŋa Chain Aapepel aadiik aajaaleŋ tiib ngbaan pu ke baah naan ŋa ŋigon pu pu na. Bi nan di ŋikpan aawan kiir kinaakook aapaal wɔb aabisamɔb.

²⁶ Takolu tiib nan bi kinaakook kee aasikakl ilee ngbaan pu, le bi naan ŋibɔkpal aasui ŋa ŋigon ngbaan pu.