Esekiel 4 - Uwumbɔr aagbaŋ

Esekiel aah mɔk bi baadim aah ga tak Jerusalem pu na

¹ Uwumbɔr nan bui ke, “Unibɔn, ban litambipapaln ki di li bil aanimbiin ni, ki naan Jerusalem aatiŋ aah bi pu na paan li pu.

² Ŋa ŋibuu, ni ŋibimbin aawan, ki naan butɔb aajab aakpuk, ni ŋidɔgen ŋi bi ga di gbaa wiil kaagon na mann goln saah naan Jerusalem aatiŋ ki na. Nima le ga mɔk ke bijab gob ki a.

³ Aa yaa ŋa kina doo kan, aa ban tikur aapeln li pee na ki di ŋum ke ligoln na, aa ni kitiŋ ngbaan aakaasisik ni. Fenn toŋ kitiŋ ngbaan. Bijab gob ki le na, sin le ye u bi gob ki na. Nimina le ga li ye limɔkl ki tii Israel yaab.

^4-5 “Nee aapuwɔb na, doon aaŋangan aasikakl pu, le m ga di Israel aatimbol aabɔbir nyiŋ aa pu. Aa ga li dɔ nima ki ji baabɔbir ngbaan aafalaa ki ti saa iwiin ikui itaa ni imonko inaa ni kipiik. M di nwiin mubaa le siin si ki ŋeer libiln libaabaa ki ti saa baatafadaan aah ga ti doo buyoonn na.

⁶ Aa yaa ti doo kina kan, aa fenn doon ŋŋangii aasikakl mu pu, ki ji Juda aatimbol aabɔbir aafalaa ki ti saa iwiin imonko ilee, nwiin mubaa li ye baatafadaan aabiln libaa.

⁷ “Di aanimbil kaan bijab aah ga gor pu ki ti gob Jerusalem aatiŋ pu na. Fik aaŋaal mɔk kitiŋ ngbaan ki di maah tuk si pu na tuk kaanib.

⁸ M ga buu si bil, le aa taa ŋmaa fenn doon nsikakl muken pu ki ti saa buyoonn butɔb aajab aah gob Jerusalem aatiŋ pu na ti jer.

⁹ “Ban njikaabim, ni ŋituun, ni iyuu, ni njikaabim muken. Di ni mɔmɔk ŋmal tɔb ni, ki di ŋa boroboro. Nima le aa ga li ji ki ti saa iwiin ikui itaa ni imonko inaa ni kipiik i aa dɔ aaŋangan aasikakl pu na.

¹⁰ Nwiin mubaa kan, saajikaar le ga li ye boroboro u aanyunyuun ye njikaabim lichakpaal libaa na, uma le aa ga li joo ki ti woln kitaak.

¹¹ Saah ga nyu nnyun mu na mu aan li wiir, aa ga li nyu n‑yikubim mulee le nwiin mubaa.

¹² Aa ga li joo unibɔn aabikuun le tuur saamii, muma pu le aa ga li ŋani saaboroboro, ki ŋmɔ u nin chee binib mɔmɔk ga li waa si na.”

¹³ Uwumbɔr nan ki bui ke, “Nimina le ga li ye Israel yaab aah ga li ji tijikaar ti Nkaal bui ke ti kɔ na, buyoonn m cha bi yaa ki bi biwɔwɔm aatim ni na.”

¹⁴ Le m nan gar ke, “Ndindaan Uwumbɔr, maa kii, maa kee bii mbaa daalbaadaal. Maah fii ubo na, maa kee ŋman kiwakork ki kpo na, bee upeel aah chuu ki na. Maa kee jin tijikaar ti kɔ na.”

¹⁵ Kina pu le Uwumbɔr bui ke, “Ni ŋan. M ga cha aa li joo ŋinaabindun le tuur saamii, le aa ga ŋmaa di ŋima ŋa saaboroboro, naan ki li ye unibɔn aabikuun.”

¹⁶ U nan ki len ke, “Unibɔn, maan ki cha tijikaar li bi Jerusalem aatiŋ ni ke taah nan bi pu na. Binib bi bi nima na aasui ga bii, le bi ga li san ijawaan baah ga li ŋaŋi baajikaar ti bi ji na, ni baah nyu nnyun mu na pu.

¹⁷ Baajikaar ni nnyun ga doo; bitaakpab ga yɔl, le baatunwanbir pu bi ga foor doo.”