Esekiel 3 - Uwumbɔr aagbaŋ

¹ Uwumbɔr nan bui ke, “Unibɔn, ŋmɔ kigbakpaikee kimina, aan ki li cha Israel aanib chee ki ti len tibɔr.”

² M nan waar mmɔb, le u di kigbakpaikee ngbaan tii mi ke m ŋmɔ.

³ U nan ki bui ke, “Unibɔn, di kigbakpaikee ki m di tii si na ŋmɔ; cha ki gbiin aapuul.” M nan di ki ŋman, le ki mɔ mmɔb ni ke tisiir na.

⁴ Uwumbɔr nan ki bui mi ke, “Unibɔn, li cha Israel aanib chee ki ti tuk bi maah bui si ke aa ti bui bi pu na.

⁵ Maa tun si litimbol li aanib len liwɔwɔln na chee, m tun si Israel yaab chee la.

⁶ M yaa tun si ŋitimbokpaan ŋi aanib len iliyayan i saa ŋun na chee kan, bima le ga pel aa chee,

⁷ le Israel aanii ubaa aan li ban ke u pel; baan kpaan pel min mbaa chee kpala. Bi mɔmɔk kpa tafalaaŋun le ki ye bimɔyiib.

⁸ M ga cha aa mu li kpa tafalaaŋun aan saabimbin li pɔɔ ke bima na.

⁹ M ga cha aa li nyal baa ke litakpal na, ki li pɔɔ ke litakpanyaan na; taa li san bimɔyiib ngbaan ijawaan.”

¹⁰ Uwumbɔr nan ki nab ke, “Unibɔn, pel suuna ki teer maah tuk si pu na mɔmɔk.

¹¹ Li cha aado yaab bi bi tinaagbiir ni na chee, ki ti bui bi min Bidindaan Uwumbɔr aah bi tuk bi pu na, hali bi yaa kaan pel aa chee kan, aa len ti mɔmɔk.”

¹² Uwumbɔr Aafuur Nyaan nan yoor mi paacham le m ŋun nneel mu ŋuuni kaakaan na len ke, “Pak Uwumbɔr aanyuŋ paacham man.”

¹³ M nan ŋun tiwanfuurkaan na aafeen gbaa tɔb paacham, le tifambann aataa na aafuuk bi ke kitiŋ le aah dam ki puu na.

¹⁴ Uwumbɔr aapɔɔn nan di mpɔɔnsakpiin mubaa le dan m pu, le Waafuur Nyaan aah yoor mi buen na, le nsui fii, le liŋuul chuu mi.

¹⁵ M nan ti fuu Tel Abib aatiŋ ki bi Kebar Aamɔɔl chee aan binaagbiib na koo nima chee na, ki koo nima ti saa iwiin ilole, le maah ŋun ki kan pu na nyaŋ mi kookoo.

Uwumbɔr aah di Esekiel ŋa ukikiir pu na

¹⁶ Iwiin ilole ngbaan aah jer na, le Uwumbɔr len m chee tibɔr.

¹⁷ U nan len ke, “Unibɔn, m di si ŋa Israel aatimbol aakikiir la. Aa di nsakm mu m di tii si na nabr bi.

¹⁸ M yaa len ke utunwanbirdaan ga kpo, le saa sak u ke u kpeln waabimbin aan ki ŋmar kan, u ga kpo, ki beenin ye utunwanbirdaan, le m ga chuu si taani waakun pu.

¹⁹ Aa yaa sak utunwanbirdaan, le u yii, kaa kpeln waabimbin kan, u ga kpo ki beenin ye utunwanbirdaan, le aa ma ga ŋmar.

²⁰ “Unibamɔnn ubaa yaa piin ki bi tun titunwanbir aan m di u siin mbimbin mu bir na ni, aan saa sak u kan, u ga kpo. Waatunwanbir pu le u ga kpo, maan teer waatunyaan na bɔr, le m ga chuu si taani waakun pu.

²¹ Aa yaa sak unibamɔnn ke u taa tun titunwanbir aan u yaa ŋun tii si, kaa tun titunwanbir kan, u ga li kpa limɔfal, le aa mu ga ŋmar.”

Esekiel aah kaan ki ŋmaa len tibɔr pu na

²² M nan bee ke Uwumbɔr aapɔɔn bi m chee le ki ŋun u len ke, “Fii sil ki li cha kifataŋ ni. M ga ti len aa chee tibɔr nima chee.”

²³ M nan fii buen kifataŋ ni, le ki ti kan Uwumbɔr aanyuŋ wiin chain nima chee, ke maah nan kan Kebar Aamɔɔl chee pu na. M nan tar lir kitiŋ lichichikr,

²⁴ le Uwumbɔr Aafuur Nyaan koo m ni ki fiin mi siin ntaa pu. Uwumbɔr nan bui mi ke, “Li chaa kun ki ti laŋ aabaa pu saadichal ni.

²⁵ Unibɔn, m ga ti buu si iŋmin, le saan ki ŋmaa nya binib ni.

²⁶ M ga cha aalambil kpal aan aa taa ŋmaa sak bimɔyiib ngbaan.

²⁷ Tɔ, m yaa nan ki len, ki ki lɔkr aalambil ke aa len kan, aa ga bui bi min Bidindaan Uwumbɔr aah bi tuk bi pu na. Bi ponn ni ngem ga ŋun, le baah ye litimbol li yii maamɔb na aanib na, ngem mu aatafal aan li bi aa ni.”