Esekiel 2 - Uwumbɔr aagbaŋ

Uwumbɔr aah nan bui Esekiel ke u ŋa waabɔnabr pu na

¹ Maah kan kina na, le m tar lir kitiŋ lichichikr, le ki ŋun nneel len ke, “Unibɔn, fii sil. M ban m len aa chee tibɔr la.”

² Nneel ngbaan aah bi len kina na, le Uwumbɔr Aafuur Nyaan koo m ni le ki fiin mi siin ntaa pu, le m ŋun nneel na ki len ke,

³ “Unibɔn, m tun si Israel aanib chee la. Bi nya mpuwɔb ki nyan sil m pu, ki beenin ye binib bi yiir maamɔb ke biyaajatiib aah nan bi pu na.

⁴ Bi ye tafalaaŋundam le kaa pak mi, kina pu le m bi tun si bi chee ke aa ti bui bi min Bidindaan Uwumbɔr aah bi tuk bi pu na.

⁵ Binib bi yii maamɔb ngbaan na yaa ti ŋun tii si, bee baa ŋun tii si kan, bi ga bee ke Uwumbɔr aabɔnabr nan bi bikaasisik ni.

⁶ “Sin unibɔn, taa li san bi ijawaan, ki taa li san baah len pu na mu ijawaan. Bi ga yii si ki lik seen si; ni ga li bi ke unii aah koo inyoohn chee pu na la. Taa san binib bi yii maamɔb ngbaan na ijawaan, ki taa li san baah len pu na mu ijawaan.

⁷ Aa ga bui bi maah tuk si ke aa len pu na mɔmɔk, hali bi yaa kaan pel aa chee kan, aa len ti mɔmɔk. Li nyi baah ye bimɔyiib bi na.

⁸ “Unibɔn, li pel maah ga tuk si pu na. Taa li ye umɔyiir ke bima na. Waar aamɔb ki ji tiwan ni m ban m di tii si na.”

⁹ M nan kan ŋŋaal mubaa taln mɔk ni mi, ki ŋub kigbaŋ ki bi kpae ki na.

¹⁰ Ŋŋaal ngbaan nan chuu kpar kigbaŋ ngbaan, le m kan ke ki kpa ŋŋmeen ŋipepel mɔmɔk ŋilee pu, ki ye mpombiin aawiil, ni ikpowiil, ni idun aaŋmeen.