Esekiel 16 - Uwumbɔr aagbaŋ

Jerusalem yaab aah kaa ŋani Uwumbɔr aah ban pu na aabɔr

¹ Uwumbɔr nan ki len m chee tibɔr ki bui ke,

² “Unibɔn, kpiir mɔk Jerusalem aatiŋ kaah ŋa tiwan ni aan ni sukr ponn ni na.

³ Tuk Jerusalem aatiŋ Kidindaan Uwumbɔr aah joo pu tuk ki na: “Bi nan ma si Kanaann aatiŋ pu la. Aate nan ye Amor aaja la, le aana ye Hef aapii.

⁴ Baah nan ma si na, ubaa aa nan gii saaŋeel, ubaa aa nan fu si nnyun, ubaa aa nan di n‑yaan ŋmir si, kaa di likekeln poo si.

⁵ Ubaa aa nan san si kinimbaak ke u ŋa tiwan nibaa tii si. Baah nan ma si na, ubaa aa nan gee si. Bi nan di si mee kinanchaŋ ni la.

⁶ “M nan jer nima chee le ki kan aa dɔ saasin ponn ni ki fenni aawon, le m nan bui si ke, ‘Li kpa limɔfal.’

⁷ M nan cha aa muun ke busub bu kpa laafee na. Aa nan pɔɔk, ki fɔk, le ki ŋa upiisapɔɔn. Saabii nan nyan ki ŋan, le saayikpir mu muun, aa mu aa nan gbab nibaa.

⁸ “Maah nan ki jer nima chee na, le m kan ke aa ŋeer kibɔtiik. M nan di maabɔkul biin aa pu, le ki puu tii si ke m ga li gee si. Mbamɔn, m ni si nan ŋa tichar aamɔbaan, le aa kpaln m yoo.” Aadindaan Uwumbɔr aah len pu na le na.

⁹ “M nan ban nnyun le ki finn nyan nsin mu gbaa gbaa si na. M nan di olif aakpan ŋmir aawon.

¹⁰ M nan di ŋibɔkul ŋi bi ŋa ŋi pu nyɔla nyɔla na le peen si, le ki tii si igban aanaatak ŋi ŋan sakpen na, ki tii si ŋitanyaan, ki tii si ŋitan ŋi ŋar bɔl bɔl na aakpalk.

¹¹ M nan di nleenyaan gbin si, m gbin si nleen, ni iŋaal aaleen mu.

¹² M nan tii si tafajɔnjɔn, ni kiyibubuuk ki ŋan sakpen na ke aa di buu aayil.

¹³ Aa nan kpa salmaa ni tikunabr aawanyaan, le ki gbab ŋikeken ŋi kpa nyɔla nyɔla ki ye ŋitanyaan, ni ŋi ŋar bɔl bɔl na, n‑yoonn mɔmɔk. Aa nan ŋmɔ n‑yonyaan aaboroboro la, le aa kpa tisiir, ni olif aakpan ki ji. Saanyaan nan deer ŋinimbil la, le aa kpaln upiibɔr.

¹⁴ Saanyaan sakpeŋ pu, aa nan ye uyimbidaan ŋitimbol mɔmɔk ni la, ba pu? min le nan tii si kina aanyaan.” Aadindaan Uwumbɔr aah len pu na le na.

¹⁵ “Le aa nan gur joo saanyaan ni liyimbil ngbaan le doo unii umɔk dan ke u ban si na chee.

¹⁶ Aa nan di saakeken ŋibaa le toor saah dooni ŋiwaa nin chee na, ki joo aabaa tii unii mɔmɔk ke upiidagoor na.

¹⁷ Aa nan di maah tii si tikunabr ni salmaa u na ŋa ŋiwaa ŋi naan bijab na ki dooni ŋi ki cha mi Uwumbɔr.

¹⁸ Aa nan yoor ŋikeken ŋi m nan tii si, aan ŋi kpa nyɔla nyɔla na di biin ŋi pu, le ki joo olif aakpan ni tulalee aayon mu m nan tii si na, tii ŋi.

¹⁹ M nan tii si tijikaar: n‑yon mu ŋan sakpen na, ni olif aakpan, ni tisiir, le aa di ni tii ŋiwaa ipiin ke ŋi ter si.” Aadindaan Uwumbɔr aah len pu na le na.

²⁰ “Le aa di aajapɔtiib ni aabisatiib bi aa nan ma tii mi na toor kitork tii ŋiwaa. Nimina aa ye tibɔbir sakpen ke aa yii maah tuk si pu na,

²¹ kaa ti nin joo maabim toor kitork tii ŋiwaa aa?

²² N‑yoonn mu mɔmɔk aa nan tun kidagook aatuln li sukr ponn ni na, saa nan teer saabiyar ni daalbaadaal ke saa nan gbab nibaa, le ki dɔ fenni aabaa aasin ni.”

Jerusalem aatiŋ aah nan ye upiidagoor buyoonn na

²³ Aadindaan Uwumbɔr nan len ke, “Saamɔfal junn a. Li junn a. Aa tun titunwanbir timina mɔmɔk,

²⁴ le ki maa nin chee bi dooni ŋiwaa, ki tun kidagook aatuln na nsan mɔmɔk aamɔgbeln.

²⁵ Aa di kininsuŋ bii saanyaan. Aa di aabaa tii unii umɔk dan ke u ban si na, le nwiin mɔmɔk kan, aa moo ŋani aabaa udagoor.

²⁶ Aa cha aamaantɔtiib Ijipt yaab bi gee bipiib sakpen na doon aa chee, le ki di kidagook aatuln ngbaan fiin maaŋuul.

²⁷ “Le m yoor ŋŋaal ke m daa aatafal, ki gaa aa chee maanyoor. M di si tii Filistia yaab bi kaa gee si aan biponn ni sukr saaninsuŋ aatun pu na.

²⁸ “Biken aah kaa lee saakpeek na, le aa san dii Asiria yaab. Sin le nan ye baapiidagoor, le bi mu aa nan lee si kikpeek.

²⁹ Aa nan ki ye Babiloŋ aatimbol li ye biwankoob ni biwandaab na yaab mu aapiidagoor, le bi mu aa nan lee si kikpeek.”

³⁰ Aadindaan Uwumbɔr aah bi len pu na sɔ: “Aa ŋa nimina mɔmɔk ke upiidagoor u kaa san inimɔɔn na la.

³¹ Aa maa baah dooni ŋiwaa nin chee, ki tun kidagook aatuln na kitiŋ ponn ni aasan mɔmɔk ni. Aa mu aa tee ban ŋimombil ke upiidagoor aah ban pu na.

³² Aa bi ke upii u doo bicham chee ki nya uchal aapuwɔb kaa tee gee uchal na la.

³³ Bi pa maakpayal la, le aa ma tii aabɔtiib ipiin ni igaŋgaŋlik ke bi nya ni ŋipepel mɔmɔk ki nan doon aa chee.

³⁴ Aa ma aadagoor ti ki bi kibaa. Ubaa aa chuu si mpɔɔn ke aa li ye udagoor. Saa kan tipar tibaa kina pu; sin le labr pa bi. Mbamɔn, aa sil bi aabaa.”

Uwumbɔr aah jin Jerusalem aatiŋ tibɔr pu na

³⁵ Jerusalem aatiŋ, sin udagoor, li pel Uwumbɔr aah bi len pu na.

³⁶ Aadindaan Uwumbɔr aah len pu na sɔ: “Aa chuu gbabr saakeken ke upiidagoor aah ŋani pu na, le ki di aabaa tii aabɔtiib ni saawaa ŋi sukr ponn ni na, le ki di saabim toor kitork tii ŋiwaa.

³⁷ Nimina pu na, m ga kuun ni aabɔtiib bikpokb bi aa nan gee bi na, ni saah nan kaa gee bi na nan kpaan. M ga cha bi nan mann goln si, le m chuu gbabr si ki cha bi kan si aaŋmeen.

³⁸ M ga di kidagook ni linikul le mɔk saabɔr aah bii pu na, le maaŋuul li fii ki pɔɔ na ni, m di nkun daa aatafal.

³⁹ M ga di si ŋa baapɔɔn ni, le bi ga ber ŋibuu ŋi ponn ni aa tun kidagook aatun ki dooni ŋiwaa na. Bi ga di saakeken ni saaleenyaan buen ki cha si aaŋmeen.

⁴⁰ “Bi ga peei kinipaak ke bi mae si ŋitakpal, le ki ga di baajaak aajum ku si.

⁴¹ Bi ga see saadichal lii, ki cha kipiipaak kan saatafadaan. M ga cha aa di cha kidagook aatuln, ki cha aa taa ki tii aabɔtiib ipiin.

⁴² N‑yoonn ngbaan le maaŋuul ga jer, le nsui sɔŋ. Maaŋuul aan ki fii aa pu, le maapiipoln mu ga doo.

⁴³ Aa suln saah nan ye ubo aan m joo si pu na, le ki cha maaŋuul fii saah tun ŋitun ŋi na pu. Nima pu le m cha aa pan ni mɔmɔk pu. Ba ŋa aa di kidagook di kpee tiwan ni mɔmɔk aa ŋani aan ni sukr ponn ni na pu?” Aadindaan Uwumbɔr le len kina.

Na aah bi pu na, bisal mu bi kina la

⁴⁴ Uwumbɔr bui ke, “Jerusalem aatiŋ, binib ga li joo liyataŋakl limina ŋakl si ke: ‘Na aah bi pu na, bisal mu bi kina la.’

⁴⁵ Aa sil ye aana aabisal. Waa nan gee uchal ni waabim kpala. Aa bi ke aakpetiib bi kaa nan gee bichatiib ni baabim na la. Aa ni ntim mu ye aakpetiib na aana ye Hef aanii, le nite ye Amor aanii.

⁴⁶ “Aakpel upol le ye Samaria aatiŋ ki ni kaatimbim bi ŋŋangan wɔb na. Aanaal le ye Sodom aatiŋ ki ni kaatimbim bi ŋŋangii wɔb na.

⁴⁷ Aasui nan piin ke aa di aataa taŋ baataa ni, ki li tun ŋitun ŋi sukr ponn ni na aa? Aayii, naa nan yunn le aa nan tun kina aatun ki jer baah nan tun pu na, saatuln mɔmɔk ni.”

⁴⁸ Aadindaan Uwumbɔr nan ki len ke, “Maah ye Uwumbɔr u bi n‑yoonn mɔmɔk na, aanaal Sodom aatiŋ ni kaatimbim aa nan tun titunwanbir ti sin ni saatimbim tun na.

⁴⁹ Ki ni kibisatiib nan kpa kigaak baah kpa tijikaar sakpen bi ji pu na pu, aan ki bi nsuudoon, ni lifuur ni na pu; bitafal mu aa nan tee bi bigiim ni binib bi lann na ponn ni.

⁵⁰ Bi nan kpa kigaak ni tafalaaŋun, le ki ŋani tiwan ni sukr ponn ni na m chee, kina pu le m nan kuln bi, saah nyi pu na.

⁵¹ “Samaria aatiŋ aa nan tun saah tun titunwanbir ti na aageln libaa. Aa tun ŋitun ŋi sukr ponn ni ki jer Samaria aatiŋ aah nan tun pu na pel pel. Saatun yɔl yɔl ngbaan cha aanaabitiib bi aa chee ke baah kaa tun taani kpala le na.

⁵² Ni ŋeer ke aa gaa saanimɔɔn. Saatunwanbir ti nyaŋ sakpen na pu le aanaabitiib bi aa chee ke baah kaa tun taani kpala le na. Li joo saanimɔɔn ki cha i koo aasil, ba pu? aa cha aanaabitiib gur naahn bi bi chain na la.”

Sodom ni Samaria aatim aah ga ki gir maa pu na

⁵³ Uwumbɔr nan ki bui Jerusalem aatiŋ ke, “M ga ki tii Sodom ni kaatimbim, ni Samaria ni kaatimbim liwangol. Mbamɔn, m ga tii aa mu liwangol.

⁵⁴ Inimɔɔn ga chuu si, le saanimɔɔn ga mɔk aanaabitiib baah soor si pu na.

⁵⁵ Bi ga ki kan liwangol, le aa ni saatimbim mu ga gir maa.

⁵⁶ Saah nan kpa kigaak buyoonn na, aa nan ŋani Sodom aatiŋ mbɔnyun,

⁵⁷ waahr aan saah nan tun titunwanbir ti na nin nyan mpaan pu. Aa mu gur bi ke kima na la, aa gur ye mbɔnyun aatiŋ le Edom yaab, ni Filistia yaab, ni ntim mu bi gbɔk si kaa gee si na chee.

⁵⁸ Aa ga ji kininsuŋ ni tiwan ni sukr ponn ni aa tun na aafalaa.” Uwumbɔr le len kina.

Tipuur ti bi n‑yoonn mɔmɔk na

⁵⁹ Aadindaan Uwumbɔr bui ke, “Saah suln saah puu tipuur ti na bɔr ki bii tipuur kpaan ti m ni sin nan puu tii tɔb na, m ga ŋa si tiwan ni ŋeer si na la.

⁶⁰ Saah nan laa diin aan m puu tipuur kpaan ti tii si na, m ga gbiin ti, le m ni si ki puu tipuur ti ga li bi n‑yoonn mɔmɔk na tii tɔb.

⁶¹ Aa yaa nan ki gaa aakpel ni aanaal kan, aa ga teer saah nan tun pu na le inimɔɔn chuu si. M ga cha bi li bi ke bisatiib na le ki tii si, kina mu aa nan bi maapuur kpaan ti m nan puu tii si na ni.

⁶² M ga ki gir fikr tipuur ti m nan puu tii si na, le aa bee ke min le ye Uwumbɔr.

⁶³ M ga di cha pinn si saah tun taani u mɔmɔk na, aa mu tee ga teer taani ngbaan bɔr, le inimɔɔn ga chuu si sakpen, le saan ki ŋmaa waar aamɔb.” Aadindaan Uwumbɔr le len kina.