Esekiel 12 - Uwumbɔr aagbaŋ

Uwumbɔr aabɔnabr u nan ŋa ke ukusann na

¹ Uwumbɔr nan len m chee tibɔr ki bui ke,

² “Unibɔn, aa koo binib bi ye bimɔyiib na ponn ni la. Baah ye bimɔyiib na le bi kpa ŋinimbil, ki mu aa waa nibaa; bi kpa ŋitafal, ki mu aa ŋun tibɔr tibaa.

³ “Tɔ, unibɔn, buu ukusann aatuln, ki nya waahr aan nwiin nin lir. Cha unii mɔmɔk kan ke aa nyan ki cha nibaa chee la. Nibaakan bimɔyiib ngbaan ga kan si.

⁴ Nwiin aah kaa kee lir na, buu saatuln ki li cha kikusɔŋ yaan, aan bi li waa si, ki cha bi kan si kijook wɔb ke saah cha kikusɔŋ le na.

⁵ Buyoonn bi si lik si na, chee saadichal liboln ki di saatuln dii li ponn ni nya lipaal.

⁶ Cha bi kan saah di saatuln buŋ aabɔgbiln pu pu na, ki poo biin aanimbil pu ki li cha mbɔmbɔɔn ni, kaa nyi saah cha nin chee na. Saah ga ŋa pu na le ye nsurm kpaan ki tii Israel yaab.”

⁷ M nan ŋa Uwumbɔr aah bui mi ke m ŋa pu na. Liyaadaal ngbaan m nan buu lituln ke ukusann na, le naah ti bɔln kijook wɔb na, m di ŋŋaal chee liboln ligoln ni, ki dii nyan. Binib mɔmɔk aah nan si lik na, le m di maatuln buŋ mbɔgbiln pu ki siir.

⁸ Kitaak aah woln na, le Uwumbɔr nan ki len m chee tibɔr ki bui ke,

⁹ “Unibɔn, Israel aamɔyiib ngbaan aah bi baa si saah ŋani tiwan ni na,

¹⁰ tuk bi min Aadindaan Uwumbɔr aah bi tuk bi pu na. Jerusalem aatiŋ aajojoor, ni binib bi koo nima chee na aanaŋ sɔ.

¹¹ Bui bi ke saah ŋa tiwan ni na le ye tiwan ni ga ŋa bi na aamɔkl, ke bi ga li ye bikusam ni binaagbiib la.

¹² Ujojoor u joo bi na ga di waatuln buŋ ubɔgbiln pu ki loon dii liboln li bi chee ligoln ni tii u na libɔmbɔln ni ki san. U ga poo biin unimbil pu, kaan li waa waah cha nin chee na,

¹³ le m ga taln maapɔɔk ki chuu u ki ponn ni, le ki di u buen Babiloŋ aatiŋ ni, nin chee u ga ti kpo, kaan kan kitiŋ ngbaan kpala na.

¹⁴ M ga cha waachiln ni aanib, ni waasusurb, ni waakikiib yaa buen ŋipepel mɔmɔk, le binib ga li chuun ban bi ke bi ku bi.

¹⁵ “M yaa cha bi yaa ki koo ŋitimbol ŋiken ni, ni ntiyayam ni kan, bi ga bee ke min le ye Uwumbɔr.

¹⁶ M ga cha bi ponn ni siib nya butɔb, ni nkon, ni iween ngbaan ni, aan bi yaa ŋmal ŋitimbol ngbaan ni kan, bi ga kan baabimbin mu sukr ponn ni na aah tun pu na, ki tii naadii ke min le ye Uwumbɔr.”

Uwumbɔr aabɔnabr u jii na aamɔkl

¹⁷ Uwumbɔr nan ki len m chee tibɔr ki bui ke,

¹⁸ “Unibɔn, aa yaa bi ji tijikaar kan, aa li jii, ki yaa bi nyu tiwanyukaan kan, aa cha aawon li gbaa ijawaan pu.

¹⁹ Tuk ŋitimbol ngbaan mɔmɔk ke Aadindaan Uwumbɔr aabɔr ti u joo tii Jerusalem aanib bi beenin koo kitiŋ ngbaan pu na sɔ: Bi yaa bi ji tijikaar kan, bi ga li jii la, ki yaa bi nyu tiwanyukaan kan, biwon ga li gbaa ijawaan pu. Binib bi mɔmɔk koo nima chee na aah kaa joo ikaal pu na, baatiŋ ga doon nkuun.

²⁰ Ntim mu ponn ni gbii binib dandana na ga kuln, le litingbaln ngbaan ga kpaln kipɔɔkuun. N‑yoonn ngbaan le bi ga bee ke min le ye Uwumbɔr.”

Uwumbɔr aah len pu na ga ŋa

²¹ Uwumbɔr nan ki len m chee tibɔr ki bui ke,

²² “Unibɔn, ba ŋa Israel aanib ŋakl liyataŋakl limina n‑yoonn mɔmɔk ke: ‘N‑yoonn jer la, le bibɔnabr aabɔr ma aa gbiini?’

²³ Tɔ, tuk bi min Bidindaan Uwumbɔr aah kpa pu ki joo cha kina wɔb na. M ga cha kina aayataŋakl doo. Ubaa aan ki ŋakl li Israel aatiŋ pu daalbaadaal. Tuk bi ke: N‑yoonn fuu ni, le tibɔnabrkaan bi gbiini.

²⁴ “Inyamɔn aadaŋ, ni tibɔnabrkaan ti ye inyamɔn na aan ki li bi Israel aanib ni.

²⁵ Min Uwumbɔr le ga len bi chee, le maah len pu na ga ŋa. Ntaam mubaa aan ki li bi. Nimi bimɔyiib aamɔfal ni, le m ga ŋa maah sak nimi ke m ga ŋa pu na. Min Nidindaan Uwumbɔr len a.”

²⁶ Uwumbɔr nan ki len m chee tibɔr ke,

²⁷ “Unibɔn, Israel yaab dak ke saabɔkpiirkaan ni saah di maabɔr ti tuk bi na ye n‑yoonn mubaa aabɔr la.

²⁸ Kina pu na, tuk bi ke min Bidindaan Uwumbɔr len ke: Ntaam aan ki li bi. Maah len pu na le ga ŋa. Min Bidindaan Uwumbɔr le len kina.”