Esekiel 11 - Uwumbɔr aagbaŋ

Jerusalem aah ga bee fam pu na

¹ Uwumbɔr Aafuur Nyaan nan yoor mi paacham ki buen Waadichal aabisamɔb mu bi liwipuul wɔb na chee. Mbisamɔb nima chee le m ti kan bijab moninko ni biŋmu, le ŋitimbol ngbaan aasalolm bilee bimina, Asur aajapɔɔn Jaasania, ni Benaya aajapɔɔn Pelatia ŋmal bi ni.

² Uwumbɔr nan bui mi ke, “Unibɔn, bijab bimina le kpokl titunwanbir ki tii nsurm mu kaa ŋan na kitiŋ kee ni.

³ Bi len le ke, ‘Naan yunn le ti ga ki piin ŋidichal aamaam. Kitiŋ kimina bi ke likumbuul na la, timi le ye tinann ti bi li ponn ni na, li mu tee lek timi mmii.’

⁴ Tɔ, unibɔn, len tibɔbir lii bi pu.”

⁵ Uwumbɔr Aafuur Nyaan nan gbiin mi, le u bui mi ke m di inaŋ imina tii Israel aanib ke: “Israel aanib, m nyi naah len ki kpokl pu na.

⁶ Ni ku binib kitiŋ kee ponn ni do sakpen, le ŋinikpol dɔ gbii ki ponn ni.

⁷ “Kina pu na, min Nidindaan Uwumbɔr aah bi tuk nimi pu na sɔ. Kitiŋ kee sil ye lisaamɔnkumbuul, tɔ, ba ye tinann? Binib bi ni ku na le ye tinann. Naan ki li bi do, m ga jenn nyan nimi kitiŋ kee ni.

⁸ Ni san kijaak aajuk ijawaan la aa? M ga cha bijab bi joo kijaak aajum na dan ki nan tak nimi.

⁹ M ga nyan ni kitiŋ kee ni ki di nimi tii biwɔwɔm. M siin nimi ke ni kpo la,

¹⁰ le bi ga ku nimi butɔb ni, nimi aatiŋ pu. Le unii mɔmɔk ga bee ke min le ye Uwumbɔr.

¹¹ Kitiŋ kimina aan ŋmaa kiir nimi ke likumbuul aah kiir tinann ti bi li ponn ni na pu na. Ni yaa po bi nin chee Israel aatiŋ ni na kan, m ga daa nitafal.

¹² Ni ga bee ke min le ye Uwumbɔr, ki bee ke naah nan joo ŋitimbol ŋi bi gbɔk nimi na aakaal na, ni nan bii maakaal ma, ki yiil maamɔb la.”

¹³ Maah bi nabr Uwumbɔr aabɔr kina na, le Pelatia lir kpo. M nan tar lir kitiŋ lichichikr le ki teen ke, “Ndindaan Uwumbɔr, maa kii. Aa ban aa ku unii umɔk gur Israel aatiŋ pu na la aa?”

Uwumbɔr aah nan puu tipuur ti tii binaagbiib ngbaan na

¹⁴ Uwumbɔr nan ki len m chee tibɔr,

¹⁵ ki bui ke, “Unibɔn, binib bi koo Jerusalem ponn ni na bi len aa ni Israel yaab biken bi bi tinaagbiir ni na aabɔr la. Bi len le ke, ‘Binib bi bi tinaagbiir ni na aah bi kitiŋ ki daa sakpen na, baan ki ŋmaa li dooni Uwumbɔr. U di kitiŋ kee tii timi la.’

¹⁶ “Tɔ, di maah len pu na tuk aado yaab binaagbiib biken. Min le cha bi ti bi ŋitimbol ŋi daa na ni, le ki cha bi yaa ki bi ntim muken ni. N‑yoonn mumina m ga li bi bi chee baah buen ntim mu ni na.

¹⁷ “Kina pu na, di min Aadindaan Uwumbɔr aah len pu na tuk bi. M ga kuun ni bi maah cha bi yaa ki bi ntim mu ni na, ki giin Israel aatiŋ tii bi.

¹⁸ Bi yaa gir ni kan, bi kuln baah kan tijɔŋ aawaa ŋi sukr ponn ni na.

¹⁹ M ga tii bi nsuupɔɔn ni nlandak pɔɔn. M ga chuu nyan baatafalaaŋun aasui mu pɔɔ ke litakpal na, ki ga di nsui mu kpa ŋuntii na tii bi.

²⁰ Le bi ga li joo maakaal, ki li ŋani maah bui bi pu na mbamɔm. Bi ga li ye maanib, le m mu ga li ye Baawumbɔr.

²¹ M tee ga daa binib bi dooni tijɔŋ aawaa ŋi sukr ponn ni na aatafal. M ga daa bitafal baah tun pu na pu.” Tidindaan Uwumbɔr le len kina.

Uwumbɔr aanyuŋ aah nyan Jerusalem aatiŋ ni pu na

²² Tiwan ni kpa ifeen ngbaan na nan piin ki fiir, le ŋitaa na mu dii ni. Israel yaab Aawumbɔr aawiihn mu deer ŋinimbil na nan woln ni pu.

²³ Nwiihn mu deer ŋinimbil ngbaan na nan nyan kitiŋ ngbaan ni, le ki di buen lijool li bi kitiŋ ngbaan aawipuul wɔb na pu.

²⁴ Tidaŋ ngbaan ni, Uwumbɔr Aafuur Nyaan nan ki yoor mi paacham ki di giin binaagbiib biken chee Babiloŋ aatiŋ pu. Le tidaŋ ngbaan doo,

²⁵ le m tuk binaagbiib ngbaan Uwumbɔr aah di tiwan ni mɔmɔk mɔk mi na.