Esekiel 10 - Uwumbɔr aagbaŋ

Uwumbɔr aanyuŋ aah nyan Waadichal ni pu na

¹ M nan lik tiwan ni naahn tidipimoor ki bi tiwan ni kpa ifeen ngbaan na aayil paab na, le ki kan tiwan ni bi ke libɔrjal li bi di ŋitakpanyaan ŋa li na nipaacham.

² Uwumbɔr nan bui uja u pee ŋitanyaan aawan na ke, “Koo tifambann aataa ŋi bi tiwan ni kpa ifeen ngbaan na aataab na ni, ki lee mmiisakɔn gbiin aaŋaal, ki di mee yaa kitiŋ ngbaan pu.” M nan si lik u le u buen.

³ Tiwan ni kpa ifeen ngbaan na nan si Uwumbɔr Aadichal aaŋangii wɔb le u buen nitaab, le ntaalangbam gaa Uwumbɔr Aadichal aachinbik mɔmɔk ti doo.

⁴ Nwiihn mu deer ŋinimbil ki mɔk ke Uwumbɔr bi nima chee na nan fii tiwan ni kpa ifeen ngbaan na chee ki ti sil Uwumbɔr Aadichal aabisamɔb chee. Ntaalangbam na nan ti gbiin Lidichal ngbaan, le lichiln ni mɔmɔk woln chain.

⁵ Tiwan ngbaan aafeen aafuuk nan ti nya lipaal aachiln ni. Ni nan naahn Uwumbɔr Mpɔɔnsakpiindaan aaneel la.

⁶ Uwumbɔr aah nan bui uja u pee ŋitanyaan aawan na ke u ti lee mmiisakɔn tifambann aataa ŋi bi tiwan ni kpa ifeen ngbaan na taab na, uja ngbaan nan buen le ki ti sil ŋitaa ngbaan libaa chee.

⁷ Tiwan ni kpa ifeen na nibaa nan di niŋaal lee mmiisakɔn mu nan bi nikaasisik ni na, le ki di ŋa uja u pee ŋitanyaan aawan na aaŋaal ni. Uja ngbaan nan gaa mmiisakɔn ngbaan le ki siir.

⁸ M nan kan ke tiwan ni kpa ifeen ngbaan na mɔmɔk kpa tiwan ni naahn unibɔn aaŋaal na nifeen taab.

^9-10 M nan ki kan ke tifambann aataa ŋinaa mu bi, ki naahn tɔb, libaabaa si kpɔk tiwan ni kpa ifeen na nibaa. Tifambann aataa ngbaan nan moor ke ŋitakpanyaan ŋi kpa kidaak na la, kibaa mɔk nan ki kpa kifambaŋ ki puln ki na.

¹¹ Tiwan ni kpa ifeen ngbaan na yaa nan chuun kan, ni ga ŋmaa buen naah gee lipepel li na, kaa fenn niwon. Ni mɔmɔk nan chuun cha lipepel li ni ban ni buen na la, kaa fenn niwon kpala.

¹² Niwon, ni nipuwɔb, ni niŋaal, ni ifeen, ni tifambann aataa ngbaan mɔmɔk nan ye ŋinimbil ŋmeen la.

¹³ M nan ŋun bi yin tifambann aataa ngbaan ke “Tifambann aataa ŋi chuun na.”

¹⁴ Tiwan ni kpa ifeen ngbaan na nibaa mɔk nan kpa nimbil wɔb munaa pu la. Njan yaan nan ye unaaja aanimbil wɔb la, le lelee ye unibɔn aanimbil wɔb, taataa ye uchinn aanimbil wɔb, le nanaa ye likaagiil aanimbil wɔb.

¹⁵ Ni ni maah nan kan ni Kebar Aamɔɔl chee na ye tiwanbaan la. Tiwan ni kpa ifeen ngbaan na yaa nan fii paacham

¹⁶ ki cha kan, tifambann aataa na mu dii la. N‑yoonn mu mɔmɔk ni taln nifeen ke ni fii paacham na kan, ŋitaa ngbaan fii dii ni la.

¹⁷ Tiwan ni kpa ifeen ngbaan na yaa ti sil kan, le ŋitaa ngbaan mu sil; le ni yaa fii paacham kan, ŋitaa ngbaan mu dii ni, ba pu? tiwan ni kpa ifeen ngbaan na le nan joo ŋi.

¹⁸ Uwumbɔr aawiihn mu deer ŋinimbil na nan siir Waadichal aabisamɔb chee, ki buen ti sil tiwan ni kpa ifeen ngbaan na aapaacham nibaa chee.

¹⁹ Ni nan taln nifeen le ki fii paacham ki cha kitiŋ le m si lik, le ŋitaa ngbaan mu dii buen. Ni nan ti sil Uwumbɔr Aadichal aabisamɔb mu bi liwipuul wɔb na chee siib, le nwiihn mu deer ŋinimbil na woln ni pu.

²⁰ M nan bee ke nima le m nan kan ni Israel yaab Aawumbɔr aataab, Kebar Aamɔɔl chee na, le m bee ke ni ye tiwan ni bi yin ni ke kerubim.

²¹ Ni mɔmɔk nibaabaa nan kpa nimbil wɔb nfum munaa pu la, ni ifeen inana, ni tiwan ni naahn unibɔn aaŋaal na nfeen mɔk aataab.

²² Ninimbil wɔb, ni maah nan kan ni Kebar Aamɔɔl chee na nan ye tiwanbaan la. Ni mɔmɔk nibaabaa nan cha nimɔb wɔb chob la.