Esekiel 1 - Uwumbɔr aagbaŋ

NJAN AABƆKPIIRKAAN ( Esekiel 1.1–7.27 ) Uwumbɔr aabɔrjal aabɔr

¹ Ŋibin piitaa aaŋmanaa aawiin iŋmu daal, le min Esekiel u aate ye Busi, aan m ye utotoor na, ni Juu yaab biken bi nan bi tinaagbiir ni na, nan koo gbɔk Kebar Aamɔɔl, Babiloŋ aatiŋ ni. Kitaapaak nan chuu piir, le Uwumbɔr kpiir ubaa mɔk mi.

² Baah nan chuu ubɔr Jehoyachinn buen tinaagbiir ni pu na aabiŋmuŋmur ni le nan bi na.

³ Kebar Aamɔɔl chee, Babiloŋ aatiŋ ni, nima chee, le m ŋun Uwumbɔr len m chee tibɔr le ki cha waapɔɔn gbiin mi.

⁴ M nan waan lik paacham le ki kan kitaabuŋ nyan ni ŋŋangan wɔb ki choo. Utaal nan moor ntaalangbam sakpem mubaa ni, le ntaalangbam ngbaan chee nan wiin chain. Utaal ngbaan aah nan moor nin chee na, tiwan nibaa nan moor nima chee ke tikumann na.

⁵ M nan waa tiwanfuurkaan ninaa nibaa kitaabuŋ ngbaan aakaasisik ni, ke binib na.

⁶ Ni mɔmɔk nibaabaa nan kpa nimbil wɔb munana, ni ifeen inana la.

⁷ Tiwan ngbaan aataa nan tok kaa gɔr nibaa chee, le ni kpa itaabuseen ke unaaja na. Ni nan moor ke tikumann ti bi jɔŋ ti mbamɔm na la.

⁸ Ni nan ki kpa iniŋaal inana kpee nimbil wɔb munana ni ifeen inana na pu. Iŋaal ngbaan nan bi ifeen ngbaan ibaabaa mɔk taab la.

⁹ Nibaa mɔk nan taln naafeen ilee le ki ti ton niken aafeen, le ni di ŋa likpakpaln pu. Ni yaa siir ki cha kan, ni dii tɔb la, kaa fenn niwon.

¹⁰ Tiwanfuurkaan ngbaan nibaabaa aanimbil wɔb munana ngbaan aa nan naahn tɔb; unibɔn aanimbil wɔb le nan bi nimɔb wɔb, le uchinn aanimbil wɔb bi ŋŋangii wɔb, le unaaja aanimbil wɔb bi ŋŋangan wɔb, le likaagiil aanimbil wɔb bi nipuwɔb.

¹¹ Nibaabaa mɔk aafeen ilelee nan taln le ki ti ton niken ni si gbɔk ni na aafeen, le ki di ilelee i gur na tam niwon.

¹² Nibaa mɔk nan kpa nimbil wɔb munana mu lik ŋipepel ŋinaa mɔmɔk pu na, kina pu na, ni mɔmɔk ga nan ŋmaa kpaan ki chuun buen naah gee lipepel li na, kaa fenn niwon.

¹³ Tiwan nibaa nan bi tiwanfuurkaan ngbaan aakaasisik ni ki naahn mmii, ki chuun n‑yoonn mɔmɔk. Mmii ngbaan nan gaa le ki too pelb pelb ke utaal aah moor pu na.

¹⁴ Tiwanfuurkaan ngbaan mu nan ber ti nya do ki ber ti nya do ki dii mmii ngbaan aah too pelb pelb pu na la.

¹⁵ Maah si lik tiwanfuurkaan ngbaan na, le m kan tifambann aataa ŋinaa meehr kitiŋ ki kpak tiwanfuurkaan ngbaan nibaabaa.

¹⁶ Tifambann aataa ngbaan nan naahn tɔb la; kibaa mɔk nan moor lak lak ke litakpanyaan li kpa kidaak na la, le kibaa mɔk ki kpa kifambaŋ ki puln kiken na,

¹⁷ kina pu na, tifambann aataa ngbaan mɔmɔk ga ŋmaa buen ŋipepel mɔmɔk wɔb.

¹⁸ Tifambann ngbaan mɔmɔk pu nan ye ŋinimbil ŋmeen la.

¹⁹ Tiwanfuurkaan ngbaan yaa nan foor kan, tifambann aataa ngbaan mu foor dii ni la, le tiwanfuurkaan ngbaan yaa fii paacham kan, ŋitaa ngbaan mu fii dii ni.

²⁰ Tiwanfuurkaan ngbaan nan chuun naah gee pu na la, le tifambann aataa ngbaan mu ŋani tiwan nimɔk tiwanfuurkaan ngbaan ŋani na, ba pu? nima le nan joo ŋi.

²¹ Kina pu na, tiwanfuurkaan ngbaan yaa chuun, bee ni fii paacham kan, kina le ŋitaa ngbaan mu ŋani.

²² Tiwan nibaa nan naahn tikur ti bi joo pi kidiik ki moor lak lak ke litakpanyaan li wiin chain na ki bi tiwanfuurkaan ngbaan aayil paacham.

²³ Tiwan ngbaan aataab le tiwanfuurkaan ngbaan nan si ki taln ifeen ilelee ti ton niken ni si gbɔk ni na, le ki di ifeen ilelee mu tam niwon.

²⁴ M nan ŋun naah fii aan naafeen kpa kifuuk ki na pu; kifuuk ngbaan nan naahn nnyusakpem aafuuk la, ki naahn butɔb aajab bi wiir sakpen na aafuuk, ki ki naahn Uwumbɔr Mpɔɔnsakpiindaan aaneel. Ni yaa kaa ki fiir kan, ni kpab naafeen la,

²⁵ le kifuuk nan tee beenin nya ni tiwan ni bi ke tikur ti bi niyil paab na ni.

²⁶ Tiwan nibaa nan bi tiwan ni naahn tikur na paacham ki naahn libɔrjal li bi di ŋitakpanyaan ŋa li na. Tiwan nibaa nan ka libɔrjal ngbaan pu ki naahn unibɔn.

²⁷ Tiwan ngbaan nan moor ke tikumann le aah pu mmii aakaasisik ni na. Ni nan moor ki wiin ke nwiihn na,

²⁸ ki bi ke waakpimanja aah bi pu na. Nwiihn mu nan deer ŋinimbil ngbaan na le nan mɔk ke Uwumbɔr bi nima chee.