Daniel 8 - Uwumbɔr aagbaŋ

Daniel aah daŋ tidaŋ ki kan upihja ni uŋoob pu na

¹ Ubɔr Belsasar aah nan ti saa ŋibin ŋitaa nnaan ni na, le m nan ki daŋ tidaŋ ki kan iwaan aawan lelee.

² Tidaŋ ngbaan ponn ni, m nan kan ke m si Susa, kitiŋ ki bi maa ligoln mann goln ki aan ki bi Elam aapepel ni na ni la. M nan si gbɔk Ulai Aamɔɔl la,

³ le ki kan upihja u kpa iyiin ilee i fɔk na si gbɔk limɔɔl ngbaan. Waayiin ngbaan mubaa nan fɔk ki pɔɔ jer muken na.

⁴ M nan si lik upihja ngbaan aah joo waayiin ngbaan ber toŋ liwilir, ni ŋŋangan, ni ŋŋangii pu na. Le kiwakork kibaa aa nan ŋmaa bui u ke u di cha, bee ki ŋmar waapɔɔn chee. U nan ŋani waah gee pu na ki moo kan mpɔɔn.

⁵ Maah nan si dak lik tibɔr tee aatataa aah ye pu na, le uŋoja ubaa nyan ni liwilir wɔb, ki san mala mala le utaa aa ti ki piir kitiŋ. U nan kpa n‑yiin mu fɔk ki gbei na unimbil aakaasisik ni.

⁶ U nan san tok upihja u m ba puen kan u si gbɔk limɔɔl na, ki di waapɔɔn mɔmɔk ber toŋ u.

⁷ M nan kan u buen ti tak upihja ngbaan. Waaŋuul nan fii sakpen, le u ber ti saa upihja ngbaan ki kool waayiin ilee na. Upihja ngbaan aa nan kpa mpɔɔn u sil kiir u. U nan saa u lii kitiŋ ki taa u ŋmal titan ni, le ubaa aa ŋmaa gaa u lii.

⁸ Le uŋoja ngbaan moo pɔɔk ki mak pam, le buyoonn waapɔɔn ti ban mu nyaŋ na, le waayiin ngbaan chuu koo. Mu aah koo na, le iyiin inaa i fɔk ki gbei na nyan mu aabuul ni. I mɔmɔk nan lik yaapepel ibaabaa la.

⁹ Iyiin inaa ngbaan ponn ni mubaa pu le n‑yiin waatiir mubaa nan ki nyan ni, le mu aapɔɔn nan ti saa ŋŋangii, ni liwipuul, ni Kitiŋ ki Ŋan na ni.

¹⁰ Mu nan kan mpɔɔn le ki ti kpaan tak iŋmabi i bi paacham na ibaa, ki ker ibaa lii ni kitiŋ ki taa taa i pu.

¹¹ Mu nan sii Uwumbɔr u ye paacham aajab aaninkpel na, kaa ki cha binib toor kitork tii u, ki bii Waadichal.

¹² Binib nan tun titunwanbir li ponn ni, kaa toor iwiin mɔmɔk aatork ki ba ye ke bi toor li ponn ni na, le ki di isan i ye ibamɔn ke bi dii i na lii. Tiwan nimɔk n‑yiin ngbaan nan ŋa na, nan kpa mu tinyoor la.

¹³ Le m ŋun Uwumbɔr aatuuntiib ubaa baa uken ke, “Tiwan ni bi tidaŋ ngbaan ponn ni na ga yunn kinye? Titunwanbir ti gaa iwiin mɔmɔk aatork na ga yunn ki ti saa kinye? Baah taar paacham aaŋmabi ni Uwumbɔr Aadichal pu pu na ga yunn ki ti saa kinye?”

¹⁴ Le m ŋun Uwumbɔr aatuuntiib uken gar njan yoo na ke, “Ni ga li ŋani kina ki ti saa iwiin lichur ni nkub ni piiŋmu. N‑yoonn mue le kijook ni kichakpiik ni aatork aan ki li bi. Nee aapuwɔb le bi ga toor Uwumbɔr Aadichal.”

Uwumbɔr aatuun Gabriel aah kpiir tidaŋ ngbaan aatataa tuk Daniel pu na

¹⁵ Maah nan si pɔɔni mbaa ke m bee tidaŋ ngbaan aatataa na, libuul ngbaan ni le m kan unii ubaa si nnimbiin ni.

¹⁶ Le m ŋun nneel nyan ni Ulai Aamɔɔl wɔb ki bui ke, “Gabriel, kpiir waah kan tiwan ni na aatataa mɔk u.”

¹⁷ Le Gabriel dan nan sil gbaŋ mi, le ijawaan chuu mi le m lir kitiŋ. Le u bui mi ke, “Unibɔn, bee tiwan ngbaan aatataa. Tidaŋ ngbaan ye dulnyaa wee aah ga nan doo pu na aabɔr la.”

¹⁸ Waah nan bi len kina na, le nnimbil bɔln, le m lir kitiŋ kaa ki nyi mbaa chee. Le u chuu mi, ki fiin mi siin ntaa pu,

¹⁹ le ki bui mi ke, “M bi mɔk si Uwumbɔr aaŋuul aah ga joo ni tiwan ni na la. Tidaŋ ngbaan mɔk kookoo aayoonn aabɔr la.

²⁰ “Saah kan upihja u kpa iyiin ilee na ye Media ni Pesia aanaan la.

²¹ Uŋoja na mu ye Griis aanaan la, le n‑yiin mu fɔk ki gbei, ki baa unimbil aakaasisik ni na ye mu aabɔr.

²² N‑yiin ngbaan aah nan koo aan iyiin inaa i nyan ni mu aabuul ni na ye nnaan ngbaan aah ga nan yakr nfum munaa pu pu na la, mu mu aan nan li pɔɔ ke njan aanaan na.

²³ “N‑yoonn mu nnaan munaa mue nan gur kpa mbiin sakpen ki yak mu kuln, ki ŋeer ntafadaan na, le ubɔr u bir ki kpa mbeebeelan na ga ji nnaan.

²⁴ U ga pɔɔk pam, ni mu aan li ye ubaa aapɔɔn pu. U ga bii tiwan pam, ki kan linyaŋ tiwan nimɔk u ŋa na ponn ni. U ga bii doo binib bi pɔɔ na, ki kpaan kpee Uwumbɔr aanib mu.

²⁵ Waah kpa beebee aalan pu na, u ga di kina aalan nyaŋ tiwan nimɔk u ŋani na. U ga li kpa kigaak, ki ga ku bii binib pam kaan cha bi li nyi. U ga kpaan fii sil Uwumbɔr u ye bibɔrb mɔmɔk Aayidaan na pu, le waah ga nan doo pu na aan nyan ni unibɔn aapɔɔn ni.

²⁶ Kijook ni kichakpiik ni aatork aadaŋ ti m kpiir taatataa tuk si na ga sil gbiin kina. Aa mu taa tee cha ti nya lipaal dandana wee, ba pu? ni ga yunn pam le ti nin ŋa kina.”

²⁷ Tidaŋ ngbaan pu, le min Daniel aataakpab nan yɔl, le m nan buŋ ni ti yunn pam. Le m nan pɔɔk ki ki piin ki tun lituln li ubɔr nan di ŋa ŋŋaal ni na. Tidaŋ ngbaan nan gar mi pam, le maa bee taatataa.