Daniel 7 - Uwumbɔr aagbaŋ

Daniel aah daŋ ki kan ipeel inaa i na aabɔr

¹ Belsasar aah nan jin nnaan Babiloŋ aatiŋ ni njan aabiln ponn ni na, le m nan daŋ tidaŋ kinyeek. M nan ŋmee tidaŋ ngbaan aah ye pu na bil.

² Maah nan kan pu kinyeek ngbaan na sɔ: Libuln nan daar ki nyani ŋipepel mɔmɔk ki ti yur nnyusakpem.

³ Le ipeel sakpiin inaa ibaa nyan ni nnyusakpem ni, i mɔmɔk bi ibaabaa kaa naahn tɔb.

⁴ Njan yoo nan naahn uchinn, le ki tee kpa likaagiil aafeen. Maah si lik kina na, le m kan ke ifeen na chuu bar nyan lir kitiŋ. Le bi chuu fiin upeel ngbaan siin utaajal ŋilee pu ke unibɔn na, le ki di unibɔn aalandak tii u.

⁵ Kipeewanbiik sakpeŋ kiken nan ki nyan ni ki si kitaajal pu. Ki nan kpob isikakpab itaa kimɔb ni, le nneel bui ki ke, “Li ŋmɔ, ŋmɔ tinann saah gee pu na mɔk.”

⁶ Maah nan si lik kina na, le upeel uken mu ki nyan ni. U nan naahn unaamuun la, le ki tee kpa ifeen inaa upuwɔb. Ifeen ngbaan nan naahn unyoon aafeen la; le u kpa ŋiyil ŋinaa. Le Uwumbɔr tii u ujojoor aapɔɔn.

⁷ Maah nan beenin si lik na, le upeel nanar mu nyan ni. U nan kpa mpɔɔn, kaa ŋan, ki kpa ijawaan mu. U nan di waakur aanyin ŋi filk sakpen na nyaŋ waadim, ki taa taa bi ŋmal titan ni. U nan kpa iyiin kipiik, kaa nan bi ke ipeel iken na.

⁸ Maah nan si lik iyiin ngbaan na, le m kan n‑yiin waatiir mubaa tur nyan ni iyiin kipiik na ponn ni. Mu nan tur iyiin kipiik na ponn ni itaa lii. N‑yiin mue nan kpa unibɔn aanimbil, ni bumɔb bu puk kipupuk sakpen a.

Daniel kan Uwumbɔr aah ji binib tibɔr pu na

⁹ Maah nan beenin si lik na, le bi di ŋibɔrjal nan siin. Le Uwumbɔr u bi n‑yoonn mɔmɔk na nan kal libɔrjal libaa pu. Waawanpeenkaan nan piin ke nkokoyon na la, le waayikpir mu piin sakpen. Waabɔrjal aataa nan ye mmii la, le ki gaal ke imiigaal na,

¹⁰ ki naahn ke nnyun le aah puu cha na. Binib ŋichur ŋichur le nan bi nima, bi nan ye binib churbakaa, ki si gbɔk u, bi ti tun waatuln tii u. Le tibɔr aajim aayoonn fuu ni a, le bi kpar tigbann.

¹¹ Maah nan beenin si lik na, m nan beenin ŋun n‑yiin waatiir na aah beenin seei ki puk kipupuk pu na. Maah si lik na, le m kan ke bi ku upeel nanar na, ki di waawon mee ŋa mmiigaal ni, le u wun.

¹² Bi nan chuu gaa ipeel iken na aapɔɔn i chee, ki tee tii i limɔfal i li bi ni yunn siib.

¹³ Kinyeek aadaŋ ngbaan ponn ni, le m nan kan udaan u naahn unibɔn aabo na. U nan chuun choo m chee, ki bi ntaalangbam ni, le ki buen Uwumbɔr u bi n‑yoonn mɔmɔk na chee; le bi ti di u mɔk u.

¹⁴ Le u tii u mpɔɔn, ni kipak, ni nnaan aapɔɔn, ke binib bi bi ŋitimbol mɔmɔk, ni ŋinibol mɔmɔk, ni iliin mɔmɔk aanib na li dooni u. Waapɔɔn ga li bi n‑yoonn mɔmɔk, le waanaan mu aan li kpa ndoon.

Tidaŋ ngbaan aatataa sɔ

¹⁵ Tiwan ni m nan daŋ tidaŋ ki kan ni na nan chuu mi ijawaan, le ki muk mi pam.

¹⁶ Le m buen bi si nima chee na ubaa chee ki ti bui u ke u tuk mi taatataa. Le u tuk mi taatataa.

¹⁷ U nan bui mi ke, “Ipeel sakpiin inaa ngbaan ye nnaan aabɔŋ munaa mubaa le ga dan kitiŋ kee pu.

¹⁸ Le Uwumbɔr u kaa kpa ŋeen aatɔ na aanib ga gaa nnaan aapɔɔn ki li joo mu n‑yoonn mɔmɔk.”

¹⁹ Le m nan ban ke m moo bee upeel nanar, u aabimbin aa nan bi ke iken na, u nan kpa ijawaan ki di waanyanyar ti ye tikumann na, ni waanyin ŋi ye tikur na di ŋmɔ waadim ki taa taa bi pu na aabɔr mbamɔm.

²⁰ M nan ki ban ke m moo bee waayiin kipiik i nan bi uyil pu na, ni n‑yiin waatiir mu nan nyan ni puwɔb ki tur iyiin itaa lii na aabɔr. Mu nan kpa ŋinimbil ni bumɔb ki kpa kigaak aapupuk. Mu nan kpa ijawaan jer iken na mɔmɔk.

²¹ Maah nan beenin si lik na, le n‑yiin ngbaan to Uwumbɔr aanib butɔb ki nyaŋ bi.

²² Le Uwumbɔr u bi n‑yoonn mɔmɔk na dan ki nan di mbamɔn tii uma Uwumbɔr u kaa kpa ŋeen aatɔ na aanib. N‑yoonn nan fuu ni ke Uwumbɔr aanib ngbaan gaa nnaan aapɔɔn.

²³ Baah nan tuk mi naatataa pu na sɔ: “Upeel nanar ngbaan ye nnaan mu ga dan kitiŋ kee pu kaan li naahn nnaan muken na la. Mu ga wii kitiŋ kee mɔmɔk ki taa taa ki pu.

²⁴ Saah kan iyiin kipiik i na, i ŋaŋ bibɔrb kipiik bi ga ji nnaan ngbaan na la. Le ubɔr uken ga dan; u ni bibɔrb biken na aabimbin aan li kpaa, le ki ga nyaŋ bibɔrb bitaa.

²⁵ U ga sii Uwumbɔr u kaa kpa ŋeen aatɔ na, ki muk uma Uwumbɔr waanib. U ga pɔɔn ubaa ke u kpeln baah dii isan i na, ni baajim aakuun mu, le Uwumbɔr aanib ga li bi waapɔɔn ni ki ti saa ŋibin ŋitaa ni ligeln.

²⁶ Le paacham aabɔjil ga kal ki ji tibɔr, ki gaa waapɔɔn, ki kuln u kookoo.

²⁷ Kitiŋ kee mɔmɔk aanaan aapɔɔn mɔmɔk ga kpaln Uwumbɔr u kaa kpa ŋeen aatɔ na aanib aanaan la. Baanaan aapɔɔn aan li kpa ndoon, le dulnyaa wee ni aaninkpiib mɔmɔk ga tun baatuln ki kii baamɔi.”

²⁸ Maah nan ŋmee pu bil na le na. Ijawaan nan chuu mi sakpen, le nwon yɔl, le m nan di tibɔr ngbaan mɔmɔk ŋa nsui ni.