Daniel 4 - Uwumbɔr aagbaŋ

Nebukadnesar ki gir daŋ tidaŋ lelee

¹ Ubɔrkpaan Nebukadnesar nan di tibɔr timina tun ŋitimbol, ni ŋinibol, ni iliin mɔmɔk aanib chee ke: “M dooni ni mɔmɔk.

² Li pel man maah kan lijinjiir ni iwaan aawan ni aan Uwumbɔr u kaa kpa ŋeen aatɔ na di kpiir mɔk mi na.

³ Uwumbɔr aah joo iwaan aawan ni mɔk timi na nyaŋ a. Waah ŋani lijinjiir aawan ni na kpa mpɔɔn sakpen a. Uwumbɔr ga li ye ubɔr n‑yoonn mɔmɔk; u ga li joo binib n‑yoonn mɔmɔk.

⁴ “M nan koo maabɔrdichal ni mpopiin ni, ki kani tinyoor ti wiir na aamɔɔn.

⁵ Le m nan daŋ tidaŋ ki kan ijawaan aawan nibaa tidaŋ ngbaan ponn ni buyoonn m dɔ geen na.

⁶ M nan cha bi ti yin ni Babiloŋ aabɔrchiln ni aasusurb mɔmɔk ke bi nan tuk mi tidaŋ ngbaan aatataa aah ye pu na.

⁷ Le bibɔɔb, ni binib bimɔk joo inyɔk tun iwaan aatuln na mɔmɔk nan dan, le m nan tuk bi tidaŋ ngbaan, le baa nan ŋmaa kpiir taatataa mɔk mi.

⁸ Le Daniel koo ni. M nan ki di maawaal aayimbil Beltesasar, le di yin u. Uwumbɔr u bi chain na Aafuur Nyaan bi u chee, le m tuk u maah daŋ pu na.

⁹ M nan bui u ke: Beltesasar, bibɔɔb aabɔr, m nyi ke Uwumbɔr u bi chain na Aafuur Nyaan bi aa chee, ki nyi ke aa ŋmaa beer iwaan aawan mɔmɔk aatataa. Maadaŋ le bi na. Tuk mi taatataa aah ye pu na.

¹⁰ “Buyoonn m dɔ geen na, le m daŋ tidaŋ ki kan busub sakpem bubaa si kitiŋ aakaasisik ni.

¹¹ Bu nan moo filk ki filk kpae ki ti saa kitaapaak, le dulnyaa wee aanib mɔmɔk waa bu.

¹² Bu aafar nan ŋan ki ti nyaŋ; le ki lu ŋisubil ŋi dulnyaa wee aanib mɔmɔk ga ŋmaa moo ŋi na. Ipeel nan doo bu aaboon ni ki fuur, le inyoon mu ter yaadil bu aabon pu, le unibɔn mɔk moo bu aasubil.

¹³ “Maah nan bi dak tidaŋ ngbaan pu na, le m kan Uwumbɔr aatuun nyan ni kitaapaak ki sunni choo, ki gor ubaa ki lik mbamɔm.

¹⁴ U nan teen mpɔɔn pu ki len ke, ‘Chuu gaa busub ngbaan lii man, ki gaa gii bu aabon; ki per bu aafar ki cha bu aasubil yaa. Jenn ipeel ngbaan bu taab ki fiin inyoon ngbaan bu aabon pu man.

¹⁵ Di cha bu aasukpiil li li si man, ki di tikur ni tikumann aabuen di ŋmaan li, ki cha li li si timoor ni nima. “‘Cha limaln lir uja wee pu, ki cha u ni ipeel ni tisufar li kpaan koo tɔb chee.

¹⁶ Waan ki li kpa unibɔn aasui ki ti saa ŋibin ŋilole, u ga li gur kpa tiwakor aasui la.

¹⁷ Uwumbɔr aatuuntiib bi gor bibaa ki lik mbamɔm na aalandak le na. Kina pu na, cha binib mɔmɔk dulnyaa wee mɔmɔk ni bee ke Uwumbɔr u kaa kpa ŋeen aatɔ na kpa mpɔɔn unibɔn aanaan mɔmɔk pu, ki ga ŋmaa di mu tii umɔk u gee na, hali unii u binib lik seen u na.’”

¹⁸ Le Ubɔrkpaan Nebukadnesar bui ke, “Tidaŋ ti m daŋ na le bi na. Tɔ, Beltesasar, tuk mi taatataa aah ye pu na. Maasusurb ubaa aa ŋmaa tuk mi taatataa, le aa ma ga ŋman, ba pu? Uwumbɔr u bi chain na Aafuur Nyaan bi aa chee.”

Daniel aah kpiir tidaŋ ngbaan aatataa ki len pu na

¹⁹ Daniel, u bi ki yin u ke Beltesasar na, aah ŋun kina na, ijawaan nan chuu u sakpen, le waa ki ŋmaa len tibaa. Le ubɔr bui u ke, “Beltesasar, taa cha ijawaan chuu si, tidaŋ ngbaan pu.” Le Beltesasar gar u ke, “Mpɔɔndaan, m ba ga li gee sakpen ke tidaŋ timina ni taatataa li ye saadim yaan ki taa li ye sin yaan.

^20-22 “Mpɔɔndaan, sin le ye busub bu fɔk ki ti too kitaapaak, aan dulnyaa wee aanib mɔmɔk waa bu, aan bu aafar ŋan sakpen, aan bu lun ŋisubil ŋi dulnyaa wee aanib mɔmɔk ga moo bab, aan ipeel doo butaab ki fuur, le inyoon mu ŋa yaadil bu aabon ni na. Aa fɔk ki pɔɔ. Saapɔɔn ti pii kitaapaak, le ki gbiin dulnyaa wee mɔmɔk.

²³ Mpɔɔndaan, saah nan si lik na, le Uwumbɔr aatuun nyan ni paacham ki sunn ni ki nan len ke, ‘Chuu gaa busub ngbaan lii man ki kuln bu, ki tee cha bu aasukpiil li si. Di tikur ni tikumann aabuen ŋmaan li, ki cha li li si timoor ni nima. Cha limaln lir uja wee pu, ki cha u ni ipeel li koo tɔb chee, ki ti saa ŋibin ŋilole.’

²⁴ “Mpɔɔndaan, nimina le ye taatataa, nima le Uwumbɔr u kaa kpa ŋeen aatɔ na di tiwan ni ga ŋa si n‑yoonn mu choo na tuk si.

²⁵ Bi ga jenn nyan si binib chee, le aa ni ipeel ga ti li kpaan koo tɔb chee. Aa ga ŋmɔ timoor ke unaa na ki doo lipaal, nin chee limaln ga li lir aa pu na, ki ti saa ŋibin ŋilole. N‑yoonn ngbaan le aa ga tii naadii ke Uwumbɔr u kaa kpa ŋeen aatɔ na le kpa mpɔɔn unibɔn aanaan mɔmɔk pu, le ki ga ŋmaa di mu tii unii umɔk u gee na.

²⁶ Uwumbɔr aatuuntiib nan bui ke bi di cha busub ngbaan aasukpiil li li si kitiŋ. Nimina mɔk ke aa yaa nan tii naadii ke Uwumbɔr le joo dulnyaa wee mɔmɔk kan, aa ga ki gir ji saanaan.

²⁷ Kina pu na, mpɔɔndaan, li dii maasurm. Di cha titunwanbir aatuln, ŋa tiwan ni ŋan na, ki san bigiim kinimbaak. Le saawangol ga moo kpee.”

²⁸ Tɔ, nimina mɔmɔk nan ŋa Nebukadnesar kina.

²⁹ Iŋmal kipiik ni ilee aah jer na, le u nan bi chuun libɔrdichal aapaacham Babiloŋ ni,

³⁰ le ki bui ke, “Lik man Babiloŋ aah kpa mpɔɔn pu na. Min le maa ki ke maatiyil, ke m di mɔk maapɔɔn, ni maapak, ni maah kpa liyimbil pu na.”

³¹ Waahr aan u nin len tibɔr ngbaan doo na, le nneel nyan ni paacham ki len ke, “Ubɔrkpaan Nebukadnesar, li pel maah ban m len pu na. M nyan saanaan aapɔɔn aa chee dandana.

³² Bi ga jenn nyan si binib chee, le aa ni ipeel le ga li kpaan koo tɔb chee, le aa li ŋmɔ timoor ke unaa na ki ti saa ŋibin ŋilole. N‑yoonn ngbaan le aa ga tii naadii ke Uwumbɔr u kaa kpa ŋeen aatɔ na kpa mpɔɔn unibɔn aanaan mɔmɔk pu, ki ga di mu tii unii umɔk u gee u na.”

³³ Libuul ngbaan ni, le tibɔr ngbaan kpaan ŋa kina. Bi nan jenn Nebukadnesar binib chee, le u ŋman timoor ke unaa na. Limaln nan lir uwon pu, le waakor muun ke likaagiil aakokor na, le waanyanyar mu fɔk ke ukaa aanyanyar na.

Nebukadnesar aah pak Uwumbɔr pu na

³⁴ Le ubɔr ngbaan bui ke, “Ŋibin ŋilole ngbaan aah jer na, le m waan lik kitaapaak, le maalan ki gir ni m chee. Le m pak Uwumbɔr u kaa kpa ŋeen aatɔ na, ki nyuŋ u waah bi n‑yoonn mɔmɔk pu na pu. U ga li joo dulnyaa wee n‑yoonn mɔmɔk, le waanaan aan li kpa ndoon.

³⁵ U lik binib bi bi taab na ke baa ye nibaa u chee. Waatuuntiib ni binib bi bi taab do na bi uŋaal ni la. Ubaa aan ŋmaa kpak waageehn bee u baa u waah ŋani tiwan ni na pu.

³⁶ “Maalan aah ki gir ni m chee na, le bi ki di maapak, ni maapɔɔn, ni maayimbil, ni maanaan tii mi. Maaninkpiib, ni maaninyuum nan ki gaa mi iŋaal ilee, le ki ki di maanaan aapɔɔn tii mi, hali ki pak mi ki jer maah nan bi pu na.

³⁷ “Le dandana wee, min Nebukadnesar pak ki nyuŋ Paacham Aabɔrkpaan ngbaan ki tii u kipak. Waah ŋani tiwan nimɔk na ye mbamɔn ki tok, le u ga ŋmaa sunn binib bi kpa kigaak na taab.”