Daniel 3 - Uwumbɔr aagbaŋ

Nebukadnesar aawanaankaan aabɔr

¹ Ubɔrkpaan Nebukadnesar nan cha bi di salmaa naan tiwanaankaan nibaa, naafɔfɔk nan ga li pii ŋitaa imonko inaa ni ŋiniin, le naawiwiir mu nan pii ŋitaa ŋiwae, le ki cha bi di ni siin Dura aateer pu, Babiloŋ aapepel ni.

² Le ubɔr cha bi yin ni waanaan ni aaninkpiib mɔmɔk ke bi kuun dan: bi yin bisalolm, ni biyidam, ni butɔb aajab aaninkpiib, ni bi bilni ŋimombil na, ni bibɔjirb, ni bininkpiib bimɔk bi ŋipepel mɔmɔk ni na, ke bi mɔmɔk dan nan kan waah ga di tiwanaankaan ngbaan mɔk binib pu na.

³ Bininkpiib mɔmɔk aah nan kuun dan bi nan kan kina ki sil tiwanaankaan ngbaan aanimbiin ni na,

⁴ le unii u mooni tibɔr na teen mpɔɔn pu ki bui ke, “Ŋitimbol mɔmɔk aanib, ŋinibol mɔmɔk, ni iliin mɔmɔk aanib,

⁵ ni ga ŋun kakaan aawiil, ki ŋun baah pii ŋiwul, ki gbaa tibar, le tiwangbaakaan ni gur na nin paan ni. Buyoonn tiwangbaakaan ngbaan piin na, ni mɔmɔk gbaan kitiŋ ki doon salmaa aawanaankaan ni Ubɔrkpaan Nebukadnesar di siin na.

⁶ Unii u yii kaa gbaan ki doon ni na, bi kpaan di u mee ŋa mmii sakpiin na ni.”

⁷ Kina pu na, baah ŋun tiwangbaakaan aah piin kina na, le ŋitimbol mɔmɔk aanib, ni ŋinibol mɔmɔk, ni iliin mɔmɔk aanib gbaan ki doon tiwanaankaan ni bi di salmaa naan ni aan Ubɔrkpaan Nebukadnesar di siin na.

Baah galn Daniel aajɔtiib bitaa ke bi yii ubɔr aamɔb pu na

⁸ N‑yoonn mumina le Babiloŋ aanib bibaa nan kan nsan ke bi bii Juu yaab ngbaan.

⁹ Le bi buen ti bui Ubɔrkpaan Nebukadnesar ke, “Uwumbɔr cha mpɔɔndaan aamɔfal li fɔk.

¹⁰ Mpɔɔndaan siin nkaal ke buyoonn tiwangbaakaan ti piin na kan, binib mɔmɔk gbaan ki doon salmaa aawanaankaan na;

¹¹ ki ki len ke unii umɔk yii kaa gbaan ki doon ni na kan, bi di udaan mee ŋa mmii sakpiin na ni.

¹² Juu aanib bibaa bi, bima le aa tii bi mpɔɔn ke bi li lik Babiloŋ aapepel na, Sadrak, ni Mesak, ni Abednego, bima le yii mpɔɔndaan aamɔb. Baa dooni saawaal, kaa gbaani ki dooni salmaa aawanaankaan ni aa di siin na.”

¹³ Ubɔr aah ŋun kina na, le waaŋuul fii ki ti nyaŋ, le u bui ke bi li joo ni bijab bitaa ngbaan unimbiin ni.

¹⁴ Le u bui bi ke, “Sadrak, ni Mesak, ni Abednego, ni ye mbamɔn ke naa dooni maawaal, kaa gbaani maah di salmaa naan tiwan ni ki di siin na aanimbiin ni ii?

¹⁵ Dandana ma, ni yaa ki ŋun kakaan aawiil, ni ŋiwul, ni tibar, ni tiwangbaakaan ni gur na kan, ni gbaan ki doon tiwanaankaan ngbaan. Ni yaa kaa ŋa kina kan, bi ga kpaan di nimi mee ŋa mmii sakpiin na ni. Ni dak ke liwaal libaa ga ŋmaa gaa nimi lii ii?”

¹⁶ Le Sadrak, ni Mesak, ni Abednego gar u ke, “Mpɔɔndaan, taan pɔɔn tibaa ke ti len tibɔr tibaa ki nyan tibaa tibɔr ni.

¹⁷ Uwumbɔr u ti dooni u ki dii u na ga ŋmaa nyan timi mmii sakpiin ngbaan ni ki nyan timi saapɔɔn ni.

¹⁸ Hali u yaa kaan ŋa kina kan, si mpɔɔndaan li nyi ke taan doon saawaal, kaan gbaan ki doon salmaa aawan ni aa naan siin na.”

Bi jin tibɔr ki siin ke bi ku Daniel aajɔtiib bitaa ngbaan

¹⁹ Sadrak, ni Mesak, ni Abednego aah len kina na, le Nebukadnesar aaŋuul fii, le unimbil wɔb ŋa gbilngbiln. Kina pu le u cha waajab moo ŋa idɔ kpee mmii sakpiin ngbaan ni aan mu moo ton ki ti saa nfum mulole mu aah ti ton pu na;

²⁰ le ki bui waajab bi kpa mpɔɔn sakpen na ke bi buu bijab bitaa ngbaan iŋmin ki di bi mee ŋa mmii mu gaal sakpen na ni.

²¹ Le bi buu bi iŋmin, bi beenin pee baawanpeenkaan—ŋibɔkul, ni tikpar, ni tiyikpupur, ni tiwan niken mɔmɔk—mee ŋa mmii sakpiin ngbaan ni.

²² Tɔ, ubɔr aah nan siin ke bi moo ŋa idɔ mmii ni aan mu ton sakpen na, imiigaal nan wun ku bikikiib bi nan di bijab ngbaan buen mmii ngbaan chee na.

²³ Iŋmin nan beenin buu Sadrak, ni Mesak, ni Abednego, le bi ti lir mmii ngbaan aakaasisik ni.

²⁴ Nebukadnesar nan fii sil mala, waah kan iwaan aawan ni na pu, le ki baa waaninkpiib ke, “Taa ba buu bijab bitaa le ki di mee ŋa mmii sakpiin ngbaan ni ii?” Le bi gar u ke, “Een, mpɔɔndaan, ti ba ŋa kina la.”

²⁵ Le u ki baa bi ke, “Tɔ, ni ŋa kinye aan m waa bijab binaa chuun kpak mmii ngbaan ni? Iŋmin aa ki buu bi, le nibaa aa mɔk ke mmii seer bi; le unanar na ma naahn Uwumbɔr aatuun la.”

Baah nyan bijab bitaa ngbaan lii ki moo kpee bi tininkpir pu na

²⁶ Kina pu na, Nebukadnesar nan buen mmii ngbaan aabuul aajaaleŋ chee ki ti yin ke, “Sadrak, Mesak, Abednego, Uwumbɔr u kaa kpa ŋeen aatɔ na aanaagbiib, nya ni man.” Libuul ngbaan ni, le bi nyan ni.

²⁷ Bisalolm, ni biyidam, ni butɔb aajab aaninkpiib, ni ubɔr aaninkpiib mɔmɔk nan kuun ni bi nan lik bijab bitaa, bi mmii ngbaan aa ŋman ki ŋa bi nibaa na. Biyikpir, ni baawanpeenkaan aa wun mmii, le biwon nibaa chee aa nu iŋmanyuu.

²⁸ Le ubɔr bui ke, “Pak Sadrak, ni Mesak, ni Abednego Aawumbɔr man. U tun ni waatuun le mu nan gaa waanib bitaa bi dii u ki gaa u ki kii na lii. Bi yii maamɔb ke bi ga di baamɔfal pa baah ba ga gbaan ki doon maawaal pu na pu; ke Baawumbɔr baanja le bi ga gbaan ki doon u.

²⁹ “Le m siin nkaal dandana, ke litimbol, bee linibol, bee iliin imɔk aanib yaa len tibɔr ti kaa ŋan na Sadrak, ni Mesak, ni Abednego Aawumbɔr pu na kan, bi ga daa par par u, ki kuln udaan aadichal. Uwumbɔr uken aa ki bi ki ga ŋmaa gaa unii lii kina.”

³⁰ Le ubɔr nan moo kpee Sadrak, ni Mesak, ni Abednego tininkpir Babiloŋ aapepel ni.