Daniel 2 - Uwumbɔr aagbaŋ

Nebukadnesar aah daŋ tidaŋ ti na aabɔr

¹ Nebukadnesar aah jin nnaan ki nan saa ŋibin ŋilee na, le u nan daŋ tidaŋ. Ti nan muk u sakpen le waa nan geen kinyeek ngbaan,

² le ki tun ke bi yin ni waabɔɔb, ni binib bimɔk joo inyɔk tun iwaan aatuln na ke bi dan ki nan kpiir tidaŋ ngbaan aatataa aah ye pu na tuk u. Baah fuu ni ki nan sil unimbiin ni na,

³ le u bui bi ke, “M daŋ tidaŋ tibaa le ti muk mi. M ban ke m bee taatataa la.”

⁴ Le bi gar ubɔr ngbaan Aram yaab aaliin ponn ni ke, “Uwumbɔr tii mpɔɔndaan limɔfal li fɔk na. Tuk timi saadaŋ ngbaan, aan ti ti kpiir taatataa tuk si.”

⁵ Le ubɔr ngbaan ki bui bi ke, “M ŋa nlandak ke nimi le ga tuk mi tidaŋ ngbaan aah ye pu na, ni taatataa mu. Ni yaa kaa ŋman kan, m ga cha bi daa par par nimi ki kuln nimi aadichal mu.

⁶ Tɔ, ni yaa ŋman ki tuk mi tidaŋ ngbaan ni taatataa aah ye pu na kan, m ga tii nimi ipiin ni kipak ki nyuun na. Kina pu na, tuk mi tidaŋ ngbaan ni taatataa aah ye pu na man.”

⁷ Le bi ki gir gar ubɔr ke, “Mpɔɔndaan yaa ba ga tuk timi tidaŋ ngbaan kan, ti ba ga ŋmaa tuk si taatataa.”

⁸ Ubɔr aah ŋun kina na, le u teen ke, “Maah ba dak pu na le na. Ni bi ban ni bii n‑yoonn la,

⁹ naah kan ke m ŋa nlandak ke ni yaa kaa ŋmaa tuk mi tidaŋ ngbaan kan, m ga tii ni mɔmɔk ntafadaan baan na, le cha ni ŋani kina. Ni kii tii tɔb ke ni li geei inyamɔn tuk mi ki mak ke ni yaa ti yunn kan, nibaakan m ga kpeln maalandak. Tuk mi tidaŋ ngbaan man aan m bee ke ni ga ŋmaa tuk mi taatataa mu.”

¹⁰ Le bisusurb ngbaan ki gar u ke, “Unii ubaa aa bi kitiŋ kee pu ki ga ŋmaa tuk mpɔɔndaan saah ban aa bee tiwan ni na. Ubɔr ubaa aa bi, hali ubɔr u kpa mpɔɔn sakpen na ubaa aa kee tuk waabɔɔb, ni bimɔk joo inyɔk tun iwaan aatuln na kina aabɔr aaboln.

¹¹ Mpɔɔndaan aah ban u bee tiwan ni na pɔɔ sakpen a, le unibɔn ubaa aan ŋmaa ŋa kina see ŋiwaa, ŋi mu aa koo binibɔm chee na.”

¹² Ubɔr aah ŋun kina na, le waaŋuul fii sakpen, le u siin ke bi ku waachiln ni aasusurb mɔmɔk Babiloŋ aatiŋ pu.

¹³ Le bi nan siin nkaal ngbaan ke bi ku bi mɔmɔk, ki kpee Daniel ni ujɔtiib na mu.

Uwumbɔr aah kpiir tidaŋ ngbaan mɔk Daniel pu na

¹⁴ Le Daniel nan buen Ariok, u ye binib bi kiir ubɔr na aaninkpel, ki ga ku bisusurb ngbaan na chee. U nan sɔŋ usui,

¹⁵ le ki baa Ariok ke ba ŋa ubɔr siin nkaal ngbaan aaboln? Le Ariok tuk Daniel tiwan ni ŋa na.

¹⁶ Le Daniel siir mala ki ti mee nsan ke bi kpee bi n‑yoonn siib, aan u ga ŋmaa tuk ubɔr tidaŋ ngbaan aatataa.

¹⁷ Waah ŋa kina na le u kun ki ti tuk ujɔtiib Hanania, ni Misael, ni Asaria tiwan ni ŋa na.

¹⁸ U nan bui bi ke bi mee Uwumbɔr u bi paacham na aan u san bi kinimbaak, ki mee u ke u kpiir tidaŋ ngbaan aatataa, aan bi taa ku bi ni Babiloŋ aasusurb biken na.

¹⁹ Kinyeek ngbaan le Uwumbɔr kpiir tidaŋ ngbaan mɔk Daniel tidaŋ ponn ni; le u pak Uwumbɔr u bi paacham na ke:

²⁰ “Uwumbɔr kpa nlan ki pɔɔ sakpen. Li pak u n‑yoonn mɔmɔk man.

²¹ Uma le joo n‑yoonn, ni tiwan nimɔk bi na; u kaani bibɔrb ki nyani bibɔrb; ni ye uma le tii nlan ni mbeem.

²² U kpiir tiwan ni bɔr ki nyoo na; u nyi nimɔk bɔr mbɔmbɔɔn ni na; le nwiihn mann goln uma ubaa.

²³ M pak ki nyuŋni si, n‑yaajatiib Aawumbɔr. Sin le tii mi nlan ni mpɔɔn; aa kii maameel, ki mɔk timi taah ga ti bui ubɔr pu na.”

Daniel tuk ubɔr tidaŋ ngbaan ki kpiir taatataa mu tuk u

²⁴ Le Daniel buen Ariok, u ubɔr nan bui u ke u ku libɔrchiln ni aasusurb na, le ki ti bui u ke, “Taa ku bi. Di mi buen ubɔr chee, aan m ti tuk u waadaŋ ngbaan aatataa.”

²⁵ Le Ariok fii mala ki di Daniel buen ubɔr Nebukadnesar aanimbiin ni, ki ti bui u ke, “M kan Juu aanaagbiib na ubaa, u ga ŋmaa tuk mpɔɔndaan saadaŋ ngbaan aatataa na.”

²⁶ Le ubɔr baa Daniel u bi ki yin u ke Beltesasar na ke, “Aa ga ŋmaa tuk mi tidaŋ ngbaan, ni taatataa aah ye pu na aa?”

²⁷ Le Daniel bui ke, “Mpɔɔndaan, unyɔkdaan u joo inyɔk tun iwaan aatuln na ubaa aa bi, ubɔɔ ubaa mu aa bi ki ga ŋmaa tuk si kina.

²⁸ Tɔ, Uwumbɔr ubaa u bi paacham, ki ŋmaa kpiir iwaan aawan mɔk na baanja le ga ŋmaa ŋa kina. Uma le tuk mpɔɔndaan tiwan ni ga ŋa n‑yoonn mu choo na. M ga tuk si tidaŋ ti aa nan dɔ geen ki daŋ na.

²⁹ “Mpɔɔndaan aah dɔ geen na, aa daŋ tidaŋ ki kan n‑yoonn mu choo na aabɔr; le Uwumbɔr, u kpiir iwaan aawan mɔk binib na mɔk si tiwan ni ga ŋa na.

³⁰ Tɔ, Uwumbɔr le kpiir iwaan aawan ngbaan mɔk mi, naa ye ke m kpa nlan jer biken la, ni ŋa kina ke sin mpɔɔndaan bee saadaŋ ngbaan aatataa, ki bee ilandak i dan aa chee na.

³¹ “Mpɔɔndaan, saadaŋ ngbaan ni, aa kan tiwan ni bi maa ni, ni fɔk ki gbei na si aanimbiin ni, ki moor lak lak, le aa yaa lik ni kan, ijawaan ga chuu si.

³² Bi nan di salmaa u ŋan sakpen na le di naan niyil; ki di tikunabr naan niŋaal ni kibiŋ; ki di tikumann naan nichaŋ;

³³ ki di tikur naan nitaa, ki di tikur ni tiyakr naan nitaafar.

³⁴ Saah nan si lik ni na, le litakpal sakpeln libaa ker nyan ni lijool aamɔgbeln, ubaa aa di uŋaal meeh li, ki nan yun tikur ni tiyakr aataafar na, ki wii ti yak yak.

³⁵ Libuul ngbaan ni le tikur, ni tiyakr, ni tikumann, ni tikunabr, ni salmaa na mɔmɔk wur lir kitiŋ yak yak, ki nan bol bol ke lipeel aapaal pu aatan na. Le libuln daa ni mɔmɔk buen, kaa gur nibaa. Le litakpal na ma filk ki ti ŋa lijool ki biin kitiŋ kee mɔmɔk pu.

³⁶ “Tidaŋ ngbaan le na. Mpɔɔndaan, dandana wee m ga tuk si taatataa.

³⁷ Mpɔɔndaan, sin le ye ubɔrkpaan u jer bibɔrb mɔmɔk na. Uwumbɔr u bi paacham na ŋa si ubɔrkpaan ki tii si kipak, ni mpɔɔn, ni liyimbil mu.

³⁸ U ŋa si unibɔn aah bi nimɔk na aabɔr, ki tii si mpɔɔn tiwakor ni inyoon pu ke aa li lik ni. Sin le ye liyil li bi di salmaa naan li na.

³⁹ Saanaan aapuwɔb, nnaan muken mu ga dan, mu ye tikumann aanaan na, mu ga dan ki nan li joo kitiŋ kee mɔmɔk.

⁴⁰ Mue mu aapuwɔb na, nnaan mu ga kpee nnaa, ki pɔɔ ke tikur ki gbaa wiil tiwan mɔmɔk na ga dan. Tikur aah gbaa wiil tiwan mɔmɔk pu na, kina le nnaan ngbaan ga kuln nnaan mumɔk nan puen bi na.

⁴¹ Aa nan ki kan ke nitaafar ni nitaŋanbim nan ŋmal tiyakr ni tikur la. Nimina mɔk ke nnaan ngbaan aan li kpa kimɔbaan. Mu aapɔɔn ngem ga li pɔɔ ke tikur na; ba pu? tikur nan ŋmal tiyakr ngbaan ponn ni.

⁴² Ntaŋanbim nibaa wɔb nan ye tiyakr le niken mu ye tikur, nimina mɔk ke nnaan ngbaan aapepel libaa ga li pɔɔ, le liken mu aan li pɔɔ.

⁴³ Aa nan ki kan ke bi nan di tikur ni tiyakr le ŋmal tɔb ni; nimina mu mɔk le ke nnaan ngbaan aaninkpiib ga pɔɔn bibaa ke bi li joo tɔb aabim aan ki li kpa kimɔbaan, le ni mu aan kal, ke tikur ni tiyakr aah kaan ŋmal tɔb ni mbamɔm pu na.

⁴⁴ Bibɔrb ngbaan aapuwɔb le Uwumbɔr u bi paacham na ga siin nnaan mu kaan li kpa ndoon na. Ubaa aan ŋmaa nyaŋ mu butɔb ni, le muma tee ga kuln nnaan mɔmɔk ki li bi ki cha n‑yoonn mu kaa kpa ndoon na.

⁴⁵ Aa nan kan litakpal aah ker nyan ni lijool aamɔgbeln aan unii ubaa aa meeh li, le li nan yun tiwanaankaan ni bi di tikur, ni tikumann, ni tiyakr, ni tikunabr, ni salmaa naan ni na. Uwumbɔr u kpa mpɔɔn sakpen na bi tuk si tiwan ni ga ŋa n‑yoonn mu choo na la. M tuk si saah daŋ pu na ni taatataa mu chob la.”

Ubɔr aah pan Daniel pu na

⁴⁶ Le Ubɔrkpaan Nebukadnesar gbaan kitiŋ ki pak Daniel ki bui ke bi toor kitork ki see nnyɔknii tii u.

⁴⁷ Ubɔrkpaan nan ki bui ke, “Saawumbɔr le ye Uwumbɔrkpaan ki jer ŋiwaa mɔmɔk, u ye bibɔrb Aadindaan, ki ye u kpiir iwaan aawan mɔk binib na. Saah kpiir iwaan aawan nimina mɔk mi na le cha m bee kina.”

⁴⁸ Le u tii Daniel tininkpir ti nyuun na, ki tii u ipiin i ŋan sakpen na pam, ki tii u mpɔɔn ke u li lik Babiloŋ aapepel mɔmɔk, ki cha u ye libɔrchiln ni aasusurb mɔmɔk aayidaan.

⁴⁹ Le Daniel cha u tii Sadrak, ni Mesak, ni Abednego mpɔɔn bi li lik Babiloŋ aapepel aatun mɔmɔk; le Daniel ma tee gaar libɔrchiln ni.