Daniel 12 - Uwumbɔr aagbaŋ

Kookoo aayoonn aabɔr

¹ Uwumbɔr aatuun mu pee ŋitanyaan aawanpeenkaan na len ke, “N‑yoonn ngbaan yaa nan fuu ni kan, Uwumbɔr aatuun Maikel u kpa mpɔɔn ki kii Israel aanib na ga dan. Le tibɔbir aayoonn ga fuu ni, tibɔbir ti kaa kee ŋa n‑yoonn mu Uwumbɔr naan ŋitimbol na ga fuu ni. N‑yoonn ngbaan yaa nan fuu ni kan, saanib bimɔk aayimbil bi Uwumbɔr Aagbaŋ ni na ga ŋmar.

² Bi puen kpo na pam le ga fikr nkun ni: bibaa ga kan limɔfal li kaa kpa ndoon na, le bibaa mu ji inimɔɔn i kaa kpa ndoon na.

³ Bilandam bi mɔk biken ke bi li tun litulnyaan na ga li wiin chain ke kitaapaak aah wiin pu na, ki wiin ke iŋmabi i bi paacham na, ki cha n‑yoonn mu kaa kpa ndoon na.

⁴ “Tɔ, Daniel, kpab kigbaŋ ngbaan ki ŋal biin ki pu ki ti saa dulnyaa aadoon; le binib pam ga bii baayoonn ke bi bee tiwan ni bi ŋani na aatataa.”

⁵ Le m kan bijab bilee bibaa si gbɔk limɔɔl libaa, ubaa si lidapuul lee, le uken mu si lidapuul liken.

⁶ Le ubaa baa Uwumbɔr aatuun mu si dandar limɔɔl aapaacham na ke, “Ni ga yunn kinye aan iwaan aawan nimina doo?”

⁷ Le Uwumbɔr aatuun ngbaan yoor uŋaal ilee paacham; le m ŋun u puu tipuur Uwumbɔr u bi n‑yoonn mɔmɔk na aayimbil pu ki len ke, “Ni ga li ye ŋibin ŋitaa ni ligeln la. Buyoonn Uwumbɔr aanib aapɔɔn ga kuln na, le tiwan nee mɔmɔk ga ŋa doo.”

⁸ M ŋun waah len pu na, ki mu aa bee taatataa. Le m baa ke, “Tɔ, maaninkpel, ni mɔmɔk ga doo kinye?”

⁹ Le u kii ke, “Daniel, li cha n‑yoonn mue; ba pu? tibɔr timina ye tibɔbɔrkaan la, ki ga li bɔr ki ti saa ndoon aayoonn.

¹⁰ Uwumbɔr ga toor binib pam ki nya bi tijɔŋ ni aan bi ŋa chain. Binib bi kpa mbiin na aan bee taatataa le ki ga li moo ŋani mbiin; binib bi kpa nlan na baanja le ga bee taatataa.

¹¹ “Ki nya buyoonn bibiindam cha bi taa ki toor iwiin mɔmɔk aatork Uwumbɔr Aadichal ni na, nima le ye buyoonn tiwanbir ni bii tiwan nimɔk bi chain na ga sil Uwumbɔr Aadichal ngbaan ni, iwiin lichur ni ikui ilee ni imonko inaa ni kipiik le ga jer.

¹² Binib bi ga li si chob aan iwiin lichur ni ikui itaa ni piitaa ni iŋmu ti jer na ga li kpa mpopiin.

¹³ “Kina pu na, sin Daniel, li si chob ki ti saa ndoon ngbaan; le aa ga kpo, ki mu tee ga fikr ki ti gaa saapal, ndoon aayoonn ngbaan.”