Daniel 11 - Uwumbɔr aagbaŋ

¹ Min le nan ter u ki tii u mpɔɔn buyoonn Ubɔr Darius nan ye Media yaab aajojoor na aajan aabiln ponn ni na.

² Maah ban m bui si pu na ye ibamɔn la.” Uwumbɔr aatuun ngbaan nan ki bui mi ke, “Bibɔrb bitaa ga ki ji nnaan Pesia aatiŋ ni, ki paan tɔb pu, le unanar mu ga paan ni bi pu, uma ga li kpa liwangol ki jer bitaa na. Buyoonn waapɔɔn ni waawangol ngbaan ga ti moo nyaŋ na, le u ga buen ti kpak Griis aanaan.

Ijipt ni Siria aanaan aabɔr

³ “N‑yoonn ngbaan le ubɔr ubaa ga nyan ni ki ga li kaar ki kpa kipak sakpen. Waanaan ga li wiir pam, le u li ŋani waah gee pu na.

⁴ Buyoonn waapɔɔn ti moo nyaŋ na, le waanaan ga bii ki yakr nfum munaa pu. Bibɔrb bi ga ji nnaan waanaan ni na aan li ye waamaal ni aanib, bi mu aan li kpa mpɔɔn mu u nan kpa na.

⁵ “Ijipt aabɔr ga li pɔɔ pam. Le waatɔb aajab aaninkpel ubaa ga li pɔɔ jer u, ki ga li joo waanaan ni aapepel li wiir ki jer ubɔr ngbaan aapepel na.

⁶ Ŋibin ŋibaa aapuwɔb le Ijipt aabɔr ngbaan ga buen ti ŋa kimɔbaan Siria aabɔr chee, ki ga di ubisal tii u. Kimɔbaan ngbaan mu aan yunn, le bi ga ku upii ngbaan ni uchal, ni ute, ni binaagbiib bi nan dii u nyan ni ute do na, ni unii u sil upuwɔb na.

⁷ Nee aapuwɔb na, naan yunn le upii ngbaan aado yoo ubaa ga ji nnaan ngbaan. U ga tak Siria aabɔr aajab, ki koo baah maa ŋigon ŋi fɔk ki pɔɔ na kiir ntim mu na ni, ki nyaŋ bi.

⁸ U ga yoor baawaa, ni salmaa, ni tikunabr aawan ni bi nan di tii baawaa ngbaan na mɔmɔk ki di gir buen Ijipt aatiŋ ni. Ŋibin siib ga jer ki li ye nsuudoon aabin la;

⁹ ŋee aapuwɔb na Siria aabɔr ga buen ti loon tak Ijipt, le Ijipt yaab ga nyaŋ bi, le bi gir kun.

¹⁰ “Siria aabɔr aajapɔtiib ga ban bijab pam ki gor kiir butɔb. Bi ponn ni ubaa ga san mala ke nwam na ki ti tak bidim bibaa aatim mu kpa ŋigon ŋi fɔk ki pɔɔ na.

¹¹ Ijipt aabɔr aaŋuul ga fii pam le u ga ti to Siria aajab butɔb ki nyaŋ bi.

¹² Waah ga nyaŋ bi ki ku baajab sakpen pu na ga cha u kpaln umakdaan; tɔ, waanyaŋ ngbaan mu aan yunn.

¹³ “Siria aabɔr ga gir ti ban bijab bi wiir jer njan yaab na. Le n‑yoonn yaa nan ŋeer kan, u ga di bijab bi wiir, ki kpa tijawan mbamɔm na gir buen.

¹⁴ Le binib pam ga nya Ijipt aabɔr aapuwɔb. Le bijab bibaa ga nyan ni sin Daniel aatimbol ponn ni, ki ga li bir pam ki mu ga nya upuwɔb, ba pu? bi kan tiwan nibaa tidaŋ ponn ni. Bi mu ga lir.

¹⁵ Kina pu na, Siria aabɔr ga ti loon kitiŋ ki bi maa ŋigon ŋi fɔk ki pɔɔ gob ki na ki nyaŋ ki. Ijipt aatɔb aajab ga di cha kaan ki to butɔb; hali bi ponn ni bi kaar sakpen na aan ki li kpa mpɔɔn mubaa bi jan kijaak.

¹⁶ Siria aabɔr ngbaan ga ŋa bi waah gee pu na, le ubaa aan ŋmaa sil kiir u. U ga sil Kitiŋ ki Ŋan na ni, ki ga li kpa mpɔɔn ki u kuln ki.

¹⁷ “Siria aabɔr ga kpokl ke u di waajab mɔmɔk buen butɔb aaban. U ga li ban ke u bii waadin aanaan mɔmɔk, kina pu na, u ga cha u ni uma ŋa kimɔbaan ki di ubisal tii u; le ni mu aan kal kina.

¹⁸ Nee aapuwɔb, le u ga ti tak ŋitimbol ŋi bi nnyusakpem chee na, ki nyaŋ mu ponn ni pam. Le biwɔwɔm aajab aaninkpel ga nan nyaŋ u ki kuln waamakl ngbaan; mbamɔn, u ga giin Siria aabɔr aamakl ngbaan di ŋa u.

¹⁹ Ubɔr ngbaan ga gir buen waatim mu kpa ŋigon ŋi fɔk ki pɔɔ na udo aatiŋ pu; tɔ, nima chee le bi ga ti nyaŋ u, le waamɔfal ga junn.

²⁰ “Ubɔr uken ga paan ni u pu, uma le ga tun waaninkpel u di mpɔɔn muk binib ki gaa lampoo ke waanaan kan ŋimombil sakpen. Naan yunn le bi ga ku ubɔr ngbaan, le ubaa aan li nyi waakun bɔr; ni mu aan li ye butɔb ponn ni.”

Siria yaab aabɔr aah nan ye utunwanbirdaan pu na

²¹ Le Uwumbɔr aatuun ngbaan ki kpiir tuk mi ke: “Siria yaab aabɔr u ga paan ni na ga li bir pam, kaan li kpa nsan ke u ji nnaan, le ki mu tee ga di beebee nyan ni, ubaa aan li nyi u bɔr, le ki nan gaa nnaan ngbaan.

²² U ga ku unii umɔk nyan sil u pu na, ki kpee Uwumbɔr Aatotoorninkpel mu.

²³ U ga ŋmann ŋitimbol ŋiken, ki cha bi ŋa kimɔbaan, le ki moo kani mpɔɔn kpae; u mu aah joo binib bi na aan li wiir.

²⁴ U ga loon ki tak lipepel li kpa liwangol na ki ŋa tiwan ni ubɔr ubaa aa kee ŋa na, le ki yakr waah gaa tiwan ni mpɔɔn butɔb ponn ni na tii bijab bi ye waadidiliib na. U ga kpokl ke u ti tak ntim mu kpa ŋigon ŋi fɔk ki pɔɔ na, le waayoonn aan ki yunn kpala.

²⁵ “U ga di limakl ki ban bijab bi wiir na ke u ti tak Ijipt yaab aabɔr. Le Ijipt yaab aabɔr ngbaan mu ga gor ni bijab bi wiir ki kpa mpɔɔn jer waajab na ke bi to butɔb. Tɔ, bi ga ŋmann Ijipt yaab aabɔr ngbaan, le u lir.

²⁶ Waasusurb bi duun u sakpen na le ga ban bi kuln u. Bidim ga ku waajab mɔmɔk pel pel.

²⁷ Le bibɔrb bilee ngbaan ga kpaan kal ke bi ji tijikaar lisambil libaa ni, bi mu aalandak ga li ye titunwanbir aalandak la, le bi mɔnn tɔb inyamɔn. Baan kan baah ban pu na, ba pu? baah ban pu na aayoonn aa kee fuu ni.

²⁸ Siria yaab aabɔr ga di waah gaa tiwan ni mpɔɔn butɔb ni na gir kun, ki ga pɔɔn ubaa ke u bii Uwumbɔr aanib aah dii nsan mu na. U ga ŋa waah gee pu na, le ki gir kun udo aatiŋ pu.

²⁹ “Nee aapuwɔb na, u ga buen ti loon tak Ijipt aatiŋ lelee, le n‑yoonn mumina ma tibɔr ga labr lir u pu.

³⁰ Rom yaab ga di iŋɔi dan ki nan tak u, le ijawaan ga chuu u. “U ga gee liŋuul ki fenn upuwɔb ki pɔɔn ubaa ke u bii doo Uwumbɔr aanib aasan. U ga ŋa binib bi yii nsan ngbaan na tiŋann.

³¹ Waajab ngem ga bii Uwumbɔr Aadichal. Bi ga kuln iwiin mɔmɔk aatork, ki di tiwanbir ni bii tiwan nimɔk bi chain na siin nima.

³² Ubɔr ngbaan ga di kimɔmɔɔn kan binib bi puen yii nsan ngbaan na aaterm, le binib bi dii Uwumbɔr na ga sil kiir bi.

³³ Binib ngbaan aaninkpiib bi kpa nlan na ga di baalan yakr tii binib pam. Le bi ponn ni bibaa ga kpo butɔb ni; bi ga see bibaa mu mmii ponn ni bi ti kpo, le ki su bibaa mu kinaayuk ki di bi ŋa kiyondiik ni; tɔ, falaa ngbaan mu aan yunn.

³⁴ Buyoonn linikul ngbaan beenin ku na, Uwumbɔr aanib ga kan nterm siib, binib pam le ga kpee bi pu, bi mu ga li ŋani kina ki ban bibaa aajim pu la.

³⁵ Bi ga ku bilandam ngbaan bibaa, le kina ngbaan ga nyan binib ngbaan baajɔŋ ni. Nimina ga li ŋani kina ki ti saa ndoon, n‑yoonn mu Uwumbɔr siin na.

³⁶ “Siria aabɔr ga li ŋani waah gee pu na la. U ga li kpa kipupuk ke liwaal libaa aa bi ki pii u, ke u kpaan jer Uwumbɔr u kaa kpa ŋeen aatɔ na mu. U ga li ŋani kina ki ti saa buyoonn Uwumbɔr ga daa utafal na. Uwumbɔr aah kpokl ke u ŋa pu na, kina le ga ŋa.

³⁷ Ubɔr ngbaan aatafal aan li bi ŋiwaa ŋi uyaajatiib nan dii na, ni liwaal li bipiib gee na ni. Mbamɔn, utafal aan li bi liwaal libaa, bee Uwumbɔr ni; ba pu? u dak ke u jer ni mɔmɔk.

³⁸ Waah ga ŋa pu na le ye ke u nyuŋ liwaal li kiir ntim mu kpa ŋigon ŋi fɔk ki pɔɔ na. U ga di salmaa, ni tikunabr, ni nleenyaan, ni liwangol aapiin tii liwaal li uyaajatiib aa kee dii li daalbaadaal na.

³⁹ U ga di binib bi dii liwaal yayan na le di kiir waatim mu bi maa ŋigon gob mu na. U ga nyuŋ binib bimɔk tii naadii ke u ye ubɔr na, ki siin bi lituln li kpa kipak na, ki tii bi kitiŋ, ke baapiin le na.

⁴⁰ “Buyoonn Siria aabɔr aayoonn nan ban mu fuu ni na, le Ijipt aabɔr ga ti tak u, le Siria aabɔr ga di waapɔɔn mɔmɔk sil kiir u, u ga di itaan aatɔroku tiib, ni itaan, ni iŋɔi pam jan kijaak ngbaan. U ga loon ntim pam, ke nwam na.

⁴¹ U ga kpaan loon Kitiŋ ki Ŋan na mu, ki ku binib ŋichur ŋichur, le Edom, ni Moab, ni Amonn aatim aanib bi gur siib na ga san ŋmar.

⁴² U ga loon ntim mumina mɔmɔk ki kpee Ijipt aatiŋ mu.

⁴³ U ga yoor Ijipt aatiŋ aawangol li bɔr ki ye salmaa, ni tikunabr, ni liwangol li kpa kidaak na mɔmɔk. U ga nyaŋ Libia ni Kus aatim mu.

⁴⁴ Le tibɔr ti ga nyan ni liwipuul wɔb, ni ŋŋangan wɔb na ga cha ijawaan chuu u, le u moo jan kijaak ke uwaar na, ki ku binib pam.

⁴⁵ U ga kpaan gaa waanaan aaboo sakpiin nnyusakpem ni lijool li Uwumbɔr Aadichal si li paab na aakaasisik ni. Tɔ, u mu ga kpo, le ubaa aan li bi nima ke u ter u.”