Daniel 10 - Uwumbɔr aagbaŋ

Daniel aadaŋ ti u nan daŋ Tigris aamɔɔl chee na

¹ Sairus aah nan ye Pesia aabɔrkpaan buyoonn na aabitatar ponn ni, le Uwumbɔr nan kpiir tibɔr tee tuk Daniel, u bi ki yin u ke Beltesasar na. Tibɔr ngbaan nan ye tibɔbamɔnn la, le ti mu aatataa nan pɔɔ pam ke unii bee ti. Tidaŋ ponn ni le Uwumbɔr nan kpiir taatataa tuk u.

² N‑yoonn ngbaan le m nan bi mpombiin ni ki ti saa ŋikpaakoo ŋitaa.

³ Maa nan jin tijikaanyaan tibaa, bee tinann, kaa nyun ndaan mu, kaa chaa maayikpir ki ti saa ŋikpaakoo ŋitaa.

⁴ Libiln aajan aaŋmal aawiin moninko ni inaa daal, le m nan si gbɔk Tigris aamɔɔsakpeln,

⁵ le ki yaar lik paacham ki kan unii ubaa si pee ŋitan ŋi ŋan na aawanpeenkaan, ki buu salmaa aagbapapaln.

⁶ Uwon nan moor lak lak ke nleenyaan na. Le unimbil wɔb mu moor ke utaal aah moor pu na, le unimbil bi ke mmii mu gaal na. Uŋaal ni utaa nan moor ke tikumann ti bi pir ti mbamɔm na, le uneel naahn kinipaak aafuuk.

⁷ Min baanja le nan kan lijinjiir aawan ngbaan. Bijab bi nan si m chee na aa nan kan nibaa; ijawaan mu nan tee chuu bi, le bi san ti bɔr.

⁸ M nan gur si mbaa baanja le ki lik iwaan aawan ngbaan. Mpɔɔn mubaa aa nan ki bi m chee, le nnimbil wɔb kpeln, le nwon mɔmɔk yɔl.

⁹ Maah nan ŋun waaneel na, le m fik ki lir kitiŋ mpuul pu ki dɔ chik.

¹⁰ Le ŋŋaal mubaa chuu mi ki fiin mi gbaan ntaaŋaayil pu; le nwon beenin gbaa.

¹¹ Le Uwumbɔr aatuun ngbaan bui mi ke, “Daniel, Uwumbɔr gee si pam. Fii sil ki pel mbamɔm maah ban m len pu na. Uwumbɔr le tun ni mi aa chee.” Waah len kina na, le m fii sil, le nwon beenin gbaa.

¹² Le u ki bui mi ke, “Daniel, taa san ijawaan. Njan aawiin mundaal aa nan sunn aabaa taab ki piin ki bi mee u ke u tii si nlan na, le Uwumbɔr nan ŋun saameel. Saameel ngbaan pu le m dan.

¹³ Paacham aatuun u joo Pesia aanaan na le kiir mi nsan ni ki ti saa iwiin moninko ni mubaa. Le Uwumbɔr aatuun Maikel, u ye Uwumbɔr aatuuntiib aayidaan ubaa na dan ki nan ter mi, ba pu? m nan gur bi Pesia aatiŋ ni mbaa baanja la.

¹⁴ M dan ke m nan cha aa bee tiwan ni ga nan ŋa saanib n‑yoonn mu choo na la. Lijinjiir aawan ngbaan ye n‑yoonn mu choo na aabɔr la.”

¹⁵ Waah len kina na, le m si lik kitiŋ, kaa ŋmaa waar mmɔb ki len tibaa.

¹⁶ Le Uwumbɔr aatuun u nan naahn unibɔn na, taln uŋaal ki di mee mmɔgban. Le m bui ke, “Uninkpel, lijinjiir aawan ni m kan tidaŋ ponn ni na tii mi iween ki cha nwon yɔl sakpen.

¹⁷ M gur naahn ke unaagbiija le aah si udindaan aanimbiin ni na. M ga ŋa kinye ki len aa chee tibɔr? Maa ki kpa mpɔɔn, bee kifuurk kibaa nwon ni.”

¹⁸ Le u ki gir chuu mi le nwon moo pɔɔk.

¹⁹ Le u bui mi ke, “Uwumbɔr gee si, kina pu na, taa cha nibaa li muk si, bee ni faan si.” Waah ki len kina na, le nwon moo pɔɔk sakpen, le m bui ke, “Maaninkpel, tuk mi saah kpa pu aa len na. Aa cha nwon chuu a.”

^20-21 Le u baa mi ke, “Aa nyi budabu pu m dan aa chee na aa? M dan ke m nan kpiir baah ŋmee pu Ibamɔn Aagbaŋ ponn ni na le tuk si. Tɔ, m ga gir ti jan Paacham aatuun mu kii Pesia aatiŋ na kijaak. Nee aapuwɔb le Paacham aatuun mu kii Griis aatiŋ na mu ga dan. Ubaa aa bi ki ga ter mi see Maikel, Uwumbɔr aatuun mu kii Israel aatiŋ na baanja.