Daniel 1 - Uwumbɔr aagbaŋ

DANIEL NI UJƆTIIB BITAA NA AABƆR ( Daniel 1.1–6.28 ) Binachipɔm bi nan bi Nebukadnesar aabɔrchiln ni na

¹ Jehoyakim aah nan ye ubɔrkpaan Juda aatiŋ pu na aabitatar ni, le Babiloŋ Aabɔrkpaan Nebukadnesar nan ti tak Jerusalem ki gob kitiŋ ngbaan.

² Uwumbɔr nan cha u nyaŋ Ubɔrkpaan Jehoyakim ki chuu u ki gaa Uwumbɔr Aadichal aawangol libaa ki di bi buen waawaa aadiik, Babiloŋ aatiŋ ni, ki di Uwumbɔr Aadichal aawan ngbaan di bil waawaa aawangol aadiik ni.

³ Ubɔr ngbaan nan cha waaninkpel u bi yin u ke Aspenas na nyan Israel aanaagbiib bi u nan chur na ponn ni binachipɔm bi nyan ni libɔrdichal ni, ni bininyuum do na bibaa.

⁴ Bi nan ye binachipɔm bi ŋan, ki kpa nlan, bi bi mɔk bi tiwan mbamɔm na, aan bi ŋmaa bae tiwan mala mala, kaa kpa iween ibaa na, aan bi li bi ubɔr aadichal ni. Aspenas aatuln le nan ye ke u mɔk bi tiwan aan bi li ŋmaa karni ki ŋmaa ŋmee Babiloŋ yaab aaliin.

⁵ Ubɔr ngbaan nan ki bui ke bi cha binachipɔm ngbaan li ji ubɔr aachiln ni aanib aah ji tijikaar ti na, ki li nyu baah nyu ndaan mu na mu iwiin mɔmɔk. Bi ga nan mɔk bi tiwan kina ki ti saa ŋibin ŋitaa le bi nin buen ti kan ubɔr.

⁶ Daniel, ni Hanania, ni Misael, ni Asaria, bi mɔmɔk nan ye Juda aanib na, nan ŋmal baah nyan binachipɔm bi na ponn ni.

⁷ Ubɔr aaninkpiib aaninkpel ngbaan nan ki tii bi Babiloŋ yaab aayimbil ŋimina: U nan yin Daniel ke Beltesasar, ki yin Hanania ke Sadrak, ki yin Misael ke Mesak, ki yin Asaria ke Abednego.

⁸ Daniel nan ŋa nlandak ke waan ji tijikaar ti ubɔr aachiln ni aanib ji na, kaan nyu baadaan mu ki bii waah dii nsan mu na; kina pu na, u nan bui Aspenas ke u ter u,

⁹ le Uwumbɔr nan cha Aspenas san Daniel kinimbaak.

¹⁰ Tɔ, Aspenas mu nan tee san ubɔr ijawaan, le ki bui Daniel ke, “Ubɔr mɔk waah ban ni li ji tijikaar ti, ni ndaan mu na, le aa yaa kaa nan gbiin unimbil ke binachipɔm biken na kan, nibaakan u ga ku mi.”

¹¹ Le Daniel buen Aspenas aah di ukikiir u tii u ni ujɔtiib bitaa na chee,

¹² le ki ti bui u ke, “Ŋaanii ki tɔŋ timi ki ti saa iwiin kipiik. Li tii timi tinann aah kaa bi tijikaar ti na ni, ni nnyun baanja aan ti li ji ki nyu.

¹³ Iwiin kipiik ngbaan yaa ti jer kan, aa di timi ŋaŋ binachipɔm bi ji ubɔr aachiln ni aanib aajikaar na, ki lik ke ulau jer uken.”

¹⁴ U nan kii ke bi ŋa kina ki ti saa iwiin kipiik ki lik.

¹⁵ N‑yoonn ngbaan aah nan fuu ni na, bi nan kan ke bi kpa laafee ki pɔɔ jer bi mɔmɔk nan ji ubɔr aachiln ni aajikaar na.

¹⁶ Kina pu na, ki nyan liyaadaal ngbaan ki joo cha, ukikiir ngbaan nan cha bi gur ji tijikaar ti kaa kpa tinann na, ki nyu nnyun baanja la, kaa ji ubɔr aah nan bui ke bi li ji tijikaar ti na.

¹⁷ Uwumbɔr nan tii binachipɔm binaa ngbaan nlan, ni ichiin, ni laasaab. U nan ki kpee Daniel nlan mu ga cha u bee tidaŋ ni tibɔkpiirkaan aatataa na.

¹⁸ Ŋibin ŋitaa ŋi ubɔr nan siin na aah nan saa na, le Aspenas nan di binachipɔm ngbaan buen Nebukadnesar chee.

¹⁹ Ubɔr nan len bi mɔmɔk chee tibɔr, le Daniel, ni Hanania, ni Misael, ni Asaria nan kan u chee lineen ki jer biken na. Kina pu na, bi nan kpaln ubɔr aachiln ni aanib la.

²⁰ Mbaan mubaa aa nan bi ubɔr baa, bee limukl libaa dan, aan binachipɔm binaa ngbaan aa ŋmaa gar. Bi nan nyi tiwan ki jer bibɔɔb, ni binib bi joo inyɔk tun iwaan aatuln ki bi nnaan ngbaan ni na.

²¹ Daniel nan beenin bi ubɔr aachiln ni le Pesia Aabɔrkpaan Sairus nan nyaŋ Babiloŋ yaab butɔb ni.