Amos 8 - Uwumbɔr aagbaŋ

Ŋisubil aadaŋ

¹ Tidindaan Uwumbɔr le nan ki di tiwan nimina mɔk mi tidaŋ ponn ni. Tidaŋ ngbaan ponn ni m nan kan ŋisubil ŋi ŋeer limool na kibɔɔkuuk ponn ni. Le Uwumbɔr baa mi ke, “Amos, aa waa ba?” Le m bui u ke, “M waa ŋisubil ŋi ŋeer limool na kibɔɔkuuk ponn ni la.”

² Le Uwumbɔr bui mi ke, “Buyoonn maanib Israel yaab ga doo na ŋeer le na; maan ki kpeln maalandak ke maan daa bitafal.

³ Liyaadaal ngbaan kan, baah gaa ilahn i libɔrdichal ni na ga kpaln ikpowiil la. Ŋinikpol ga po li dɔ ni kookoo la. Le bi ga di bi mae liŋmiŋmiln.”

Israel aatiŋ aah ga doo pu na

⁴ Li pel nimina man, nimi bi muk bifalaadam, ki ban ke ni ku doo bigiim kitiŋ kee ni na.

⁵ Ni bui nibaa ke, “Taan ŋmaa kiir ke iwinyaan daal ti jer waahr aan ti nin kooh timi aajikaar. Bayoonn aan likpaakool aawiin ga doo, aan ti ki piin ki kooh timi aawan, ki cha ti tii kidaak ki pɔɔ na, ki di tiwaŋaŋkaan ni kaa ye nibamɔnn na di ŋaŋ ki ji biwandaab?

⁶ Ti ga ŋmaa di tigbengbir kooh kidaak ki pɔɔ na. Ti ga kan ugiin u kaan ŋmaa pa waapɔln na, hali kaan ŋmaa pa ŋinaatak pu na ki daa u, ki di u ŋa unaagbiija.”

⁷ Uwumbɔr u ye Israel yaab Aadindaan na le puu ke, “Maan suln baatunwanbir pu kpala.

⁸ Kina pu na, kitiŋ ga deŋ, le unii umɔk bi kitiŋ kee pu na aasui ga bii. Kitiŋ mɔmɔk ga nyɔŋ, ki ga fii ki gir lir ke Nail Aamɔɔsakpeln na.

⁹ N‑yoonn choo le nwiin ga lir liwinjakal pu, le dulnyaa bɔnn liwiyil pu. Min Nidindaan Uwumbɔr le len kina.

¹⁰ M ga kpeln nimi aajim aayoonn ŋa ŋikpuu, ki kpeln nimi aamɔɔn aalahn ŋa inimbaalahn. M ga cha ni kuu nimi aayikpir ki peen tiwan ni saak kuub na, aan ki cha ni li naahn libibaal li kpo na aate ni una aah wii waakpuul pu na. Nwiin ngbaan daal ga li cho kina le ki ti saa mu aadoon.

¹¹ “N‑yoonn choo, buyoonn m ga tun ni nkon kitiŋ kee pu na. Nkon ga li joo binib, ni mu aan li ye tijikaar aakon; nnyunyuu ga li joo bi, ki mu aan li ye nnyun aanyunyuu. Uwumbɔr aabɔr aakon ni taanyunyuu le ga li joo bi. Min Uwumbɔr Mpɔɔndaan le len kina.

¹² Binib ga chuun liwipuul ni liwilir, ki nya ŋŋangan wɔb ki ti saa ŋŋangii wɔb. Bi ga lik ni kookoo ki ban Uwumbɔr aabɔr kaan kan ti.

¹³ Liyaadaal ngbaan kan, binachipɔm ni bisapɔm bi pɔɔ na ga lir ki fik nnyunyuu pu.

¹⁴ Binib bi puuni Samaria aawaa ki len ke ‘Dann aawaal pu’, bee ‘Beerseba aawaal pu’ na, kina aanib ga lir, kaan ki fii sil daalbaadaal.”