Amos 5 - Uwumbɔr aagbaŋ

Mbimbin aakpeln aayim

¹ Israel aanib, li pel man nkpolahn mu m gaa ni pu na:

² Israel aatiŋ lir a, kaan ki fii sil kpala. Ki kpo bee kitiŋ, le ubaa aan ter ki, ki fii sil.

³ Tidindaan Uwumbɔr le len ke, “Israel aatiŋ kibaa ponn ni ga nyan butɔb aajab lichur ke bi ti to butɔb, le nkub baanja le ga ŋmar ki gir ni; le kiken mu ga nyan nkub, le kipiik baanja le ga ŋmar ki gir ni.”

⁴ Le Uwumbɔr bui Israel yaab ke, “Dan m chee man, aan ki kan limɔfal.

⁵ Taa ki buen Beerseba ke ni ti mee limeel. Taa buen Betel, ke ni ban mi. Betel aatiŋ ga nan doo fam la. Taa buen man Gilgal aatiŋ ni mu, bi ga di nima yaab buen tinaagbiir ni.”

⁶ Li cha man Uwumbɔr chee ki ti kan limɔfal. Ni yaa kaa ŋa kina kan, u ga dan Israel yaab pu ke kimosakpeŋ aamii na la. Mmii ngbaan ga wu Betel yaab, le ubaa aan ŋmaa junn mu.

⁷ Nimi bi len ibamɔngangal ki ji binib biken baabamɔn pu na, ni kpoi doo a.

⁸ Uwumbɔr le naan iŋmabi, ni paacham aawan mɔmɔk. U kpeln mbɔmbɔɔn ki di ŋa nwiihn, ki di nwiin pu mu kpeln ŋa kinyeek. Uma le yin nnyusakpem aanyun, ki joo kpir kitiŋ pu. Waayimbil le ye Uwumbɔr.

⁹ U bii mpɔɔndam ni baapɔɔn mu.

¹⁰ Nimi le nan binib bi len ibamɔn kaa gee inyamɔn aabɔr na.

¹¹ Ni muk bigiim le ki gaal baah kpa tijikaar ni tiwan siib ni na. Kina pu na, naan koo ŋitakpal aadichanyaan ŋi ni maa siin na ni, kaan nyu naah ŋum ŋisubil aasui i na aadaan mu.

¹² M nyi nimi aatunwanbir sakpenn ti ni ŋani na aakahm. Ni ŋani binibamɔm mbiin, le ki gaal igaŋgaŋlik, le ki cha bigiim aa ŋmaa kani ibamɔn libɔjil ni.

¹³ Kina pu na, kinimbɔŋ aayoonn ngbaan kan, unii u kpa nlan na ga li ŋmin suuna la.

¹⁴ Cha tiwan ni ŋan na li ye tiwan ni ni ban na, ki taa li ban kinimbɔŋ aabɔr, ki li kpa limɔfal; le Uwumbɔr Mpɔɔnsakpiindaan ga sil li bi ni chee, ke naah len ke u bi ni chee pu na.

¹⁵ Li nan kinimbɔŋ man, ki li gee tiwan ni ye ibamɔn na, aan ki cha ibamɔn li bi libɔjil ponn ni. Nibaakan, Uwumbɔr ga san binib bi gur linibol limina ni kaa kpoi na kinimbaak.

¹⁶ Kina pu na, Tidindaan Uwumbɔr Mpɔɔnsakpiindaan u kaa kpa ŋeen aatɔ na le len ke, “Kinimbaak aawiil le bi ga li kaani kitisakpeŋ aasan pu. Hali bikpaab ga nyan ni baasar ni ke bi nan wii binib bi kpoi na aakpowiil ki ter baah pan binib bi ke bi wii ikpowiil na.

¹⁷ Ndaan aasubil aasar mɔmɔk ponn ni ye ikpowiil ŋmeen la. Nimina mɔmɔk ga ŋa, ba pu? m choo m nan daa nitafal la.” Uwumbɔr le len kina.

¹⁸ Naan nan li ŋan tii nimi bi kii Uwumbɔr aawiin ngbaan na. Nwiin ngbaan daal aan nan joo ni tiwan nibaa ni ŋan. Ba pu? mu ga nan li ye libɔmbɔln ŋmeen kaan li kpa nwiihn.

¹⁹ Ni ga nan li naahn ke unii aah san uchinn chee ki ti tooh upeenaamuun nsan ni pu na la, ki li bi ke unii u kun ni linampal ki nan di uŋaal paan ligoln pu aan uwaa kpaan juu u pu na la.

²⁰ Uwumbɔr aawiin ngbaan daal ga joo ni libɔmbɔln ŋmeen la, naan li ye nwiihn; mu ga li ye nwiin mu bɔɔn timm kaan li wiin kpala na la.

²¹ Uwumbɔr ki len ke, “Maa gee naah kuuni ki ji njim ki dooni mi pu na; naa ŋan m chee kpala.

²² Ni yaa toor kitork ki di see mmii ni, ni nimi aajikaabim aapiin tii mi kan, maan gaa ni; maan gaa naah lii tiwakor ti filk ke ni nan di tii mi ipiin na.

²³ Di cha naah gaa ilahn mpɔɔn pu ki gbaa tibar ki tii mi na man. Maan pel.

²⁴ Naah ga ŋa pu ki piir nsui na sɔ: Cha ibamɔn ni mbimbinyaan li wiir ke limɔɔl aanyun aah wiir kaa door pu na.

²⁵ “Israel aanib, maa nan ban kitork ni ipiin ibaa ŋibin imonko ilee ŋi ponn ni m nan di nimi dii ni litambol ŋmeen aatiŋ ni na ni chee.

²⁶ Tɔ, dandana wee, naah dii ki toor liwaal Sakuf li ye nimi aawaabɔr na, ni liwaal Kaiwann li ye liŋmabil aanaŋ na, nima pu na, ni ga li joo tiwanaankaan ngbaan

²⁷ le m ga di nimi buen tinaagbiir ni, kitiŋ ki bi Damaskus aatiŋ aapuwɔb na ni,” Tidindaan u aayimbil ye Uwumbɔr Mpɔɔnsakpiindaan na le len kina.