Amos 4 - Uwumbɔr aagbaŋ

¹ Samaria aapiib, li pel man tibɔr timina, nimi bi filk ke Basann aanaa i jin ki bab na, nimi bi muk binib bi kaa kpa mpɔɔn, ni bigiim na, nimi bi muk nichatiib ke bi li tii nimi ndaan n‑yoonn mɔmɔk na, li pel man.

² Tidindaan Uwumbɔr aah bi chain kaa kpa tijɔŋ tibaa na, u puu ke, “Iwiin ibaa choo, le bi ga nan di ijapiin dar nimi buen; ni mɔmɔk ga li bi ke ijan i ijapiin chur i na la.

³ Bi ga dar fuul nimi ki di baan mae ligoln aah wii nin chee na, Harmonn wɔb.”

Israel yaab aah kaan bae pu na aabɔr

⁴ Tidindaan Uwumbɔr bui ke, “Israel yaab, ni yaa gee kan, ni li cha man Betel aabuul li bi chain na ni ki ti tun titunwanbir man. Di man nimi aapɔɔn mɔmɔk ki buen Gilgal aatiŋ ni ki ti tun titunwanbir. Li joo ni man nimi aawakor iwiin mɔmɔk ki nan toor kitork, ki joo ni nimi aajikaar aapar iwiin itata daal.

⁵ Di nimi aaboroboro tii Uwumbɔr ki doon u waah ter nimi pu na, ki li kpa kipupuk naah ki tii ipiin i kpee na pu. Naah gee ke ni li ŋani tiwan ni na le na.

⁶ “Min le nan lii nimi nkon, nimi aatikpaan ponn ni, le naa kee gir ni m chee.

⁷ Min le nan chuu utaal buyoonn nimi aajikaar nan ban utaal sakpen na. M nan cha utaal nu kitiŋ kibaa ni, kaa nu kiken ni. Utaal nan nun bukpaab bubaa ni, le buken ma kuur.

⁸ Binib nan di nnyunyuu ki nyan kitiŋ kibaa ponn ni, ki buen kitiŋ kiken ponn ni, ki dak ke nnyun bi nima, le bi mɔmɔk aa ti ŋmaa kan bi nyu. Nimina mɔmɔk mu aa cha ni gir ni m chee.

⁹ “M nan tun ni libuln li ton sakpen na ke li nan kuur nimi aajikaar. Le itoon dan nan di nimi aasar mɔmɔk ŋman, ki ŋman nimi aawanyukaan aasui, ni ŋisubil, ni nkpan aasui mu. Nee mu aapuwɔb na, naa ki gir ni m chee.

¹⁰ “Le m tun ni iween nan lii ni pu ke maah nan di lii Ijipt aatiŋ ni pu na. M nan ku nimi aanachipɔm butɔb ni, ki di nimi aataan mu buen. Le ŋinikpol aanunun gbiin nimɔfataabun ni, ni nimi aakookoo yaan chee. Nee aapuwɔb na, naa di cha nimi aatunwanbir ki gir ni m chee ke m di cha pinn nimi.

¹¹ “M nan doo nimi bibaa ke maah nan doo Sodom ni Gomora yaab pu na. Nimi bi nan ŋmar na nan naahn limiidɔtɔgeln la. Nee mu aa cha ni gir ni m chee.” Min Uwumbɔr le len kina.

¹² “Kina pu na, Israel yaab, m ga daa nitafal. Maah ga ŋa kina na, gor nibaa man ke ni sil min u ye nimi Aawumbɔr na aanimbiin ni, le m ga ji nimi tibɔr.”

¹³ Uma Uwumbɔr le naan ŋijoo sakpiin, ki naan libuln mu. U joo waakaal kpiir tuk unibɔn; u kpeln nwiin pu ŋani kinyeek. U chuun dulnyaa wee ni, nin chee fɔk sakpen na. Waayimbil sɔ: Tidindaan Uwumbɔr Mpɔɔnsakpiindaan.