Amos 3 - Uwumbɔr aagbaŋ

¹ Israel yaab, linibomɔln li Uwumbɔr nyan li Ijipt aatiŋ ni na, li pel man nimi aabɔr ti u len na.

² “Dulnyaa aanibol mɔmɔk ponn ni, nimi baanja le m nyi nimi ki lik nimi, nibaa taa ŋa nimi. Nima le cha nimi aatunwanbir bir sakpen, ki cha m ga sil daa nitafal.”

Uwumbɔr aabɔnabr aatuln

³ Bijab bilee aan ŋmaa kpaan piin lisachuln kaa puen kpokl waahr.

⁴ Uchinn yaa kaa kee kan tinann kan, waan teen kipɔɔk ni. Uchinn u laa diin na yaa kaa chuu nibaa waabuu ni kan, waa ŋuuni.

⁵ Tijikaar yaa kaa bi gaawɔb ni kan, unyoon aan koo u ni aan u chuu u. Nibaa yaa kaa taa gaawɔb pu kan, waan too.

⁶ Ukpiin yaa wii kitiŋ ni kan, ijawaan chur binib mɔmɔk la. Tibɔbir aan ŋmaa koo ni kitisakpeŋ ni kaa nyan ni Uwumbɔr chee.

⁷ Tidindaan Uwumbɔr aa ŋani waawan nibaa kaa puen di ni kpiir mɔk waatutum bi ye waabɔnabtiib na.

⁸ Uchinn yaa ŋuun kan, ijawaan chur binib mɔmɔk la. Tidindaan Uwumbɔr yaa len tibɔr kan, ŋma bi kaan nabr ti tii biken?

Samaria aatiŋ aadoon

⁹ Moon ki tuk binib bi mɔmɔk bi Ijipt ni Asdod aabɔrdichal ni na ke, “Kuun man ki buen ŋijoo ŋi mann goln Samaria aatiŋ na, ki ti lik tiwan yɔl yɔl ni titunwanbir ti bi ŋani nima chee na.”

¹⁰ Uwumbɔr le len ke, “Binib bimina di baah gaa tiwan ni mpɔɔn na le di gbiin baadichal sakpiin ngbaan ponn ni. Baa nyi baah ga ŋa pu ki ŋa tiwan ni ŋan na.

¹¹ Kina pu na, baadim le ga mann goln baatiŋ, ki nyaŋ baajab bi to butɔb na, ki gbaa wii baadichal sakpiin ngbaan.”

¹² Uwumbɔr ki len ke, “Samaria aanib bi ka ŋibɔrjal pu na ga nan gur siib ke Uchinn yaa chuu upiih ki ŋman kan, unaakpaal ga ti kan waah ŋman gur itaayakr bee litafal libaa pu na la. Kina le Samaria aanib siib ga ŋmar, le lijal ni tiwandookaan aageln baanja ga li gur baawangol ponn ni.”

¹³ Tidindaan Uwumbɔr Mpɔɔnsakpiindaan ki len ke, “Li pel man, ki sur Jakob aayaabitiib

¹⁴ ke bundaal m ga daa Israel yaab aatafal baatunwanbir pu na kan, m ga gbaa wii ŋiwaabimbin ŋi bi Betel aatiŋ ni na mɔmɔk. Ŋibimbin ngbaan mɔmɔk aamɔju ga wii ki lir kitiŋ.

¹⁵ M ga wii naah maa lipeel aadichal, ni kiseek aadichal ŋi na mɔmɔk. Naah di iluub aanyin di ŋa tidir ti pu ke ti li ŋan na mɔmɔk ga lir; lidichasakpeln libaa aan gur kaan bii.”