Amos 2 - Uwumbɔr aagbaŋ

Moab aatiŋ yaab

¹ Uwumbɔr ki len ke, “Moab yaab aah tun titunwanbir n‑yoonn mɔmɔk pu na, kina le ga cha m sil daa bitafal. Bi nan jinn Edom aabɔrkpaan aakpab inimɔɔn ki see i mmii ki cha i wun ki ti kpaln nfatan.

² M ga cha mmii wu Moab aatiŋ, ki see baatiŋ Keriof aadichal ŋi fɔk ki pɔɔ aan bi maa kiir bibaa na mɔmɔk. Buyoonn butɔb aajab ga li tar aan kakaan tiib wii ki kpa kifuuk na, le Moab aanib ga kpoi.

³ M ga ku Moab yaab aayidaan ni baaninkpiib mɔmɔk.”

Juda aatiŋ yaab

⁴ Uwumbɔr ki len ke, “Juda yaab aah tun titunwanbir n‑yoonn mɔmɔk pu na, kina le ga cha m sil daa bitafal. Bi lik maamɔkm fam, kaa kii maamɔb. Biyaajatiib aah nan dii inyamɔn aawaa ŋi na le ŋmann bi koon timoor ni.

⁵ Kina pu na, m ga cha mmii wu Juda ki wu Jerusalem yaab aah maa ŋidichal ŋi fɔk ki pɔɔ kiir bibaa na mɔmɔk.”

Uwumbɔr aah ga ji Israel yaab tibɔr pu na

⁶ Uwumbɔr ki len ke, “Israel yaab aah tun titunwanbir n‑yoonn mɔmɔk pu na, kina le ga cha m sil daa bitafal. Bi joo bininyaam le kooh ke bi di teen baapɔln, hali bigiim bi kaan ŋmaa pa ŋinaatak aadaak na, bi kooh bi mu la.

⁷ Bi jon ki taar binib bi kaa kpa mpɔɔn na pu, le ki tur bigiim lir isan ni. Le uja ni ute kpaani unaagbiipiibo baan, kina le bi bii maayimbil li bi chain na.

⁸ Bijab doo kitork aabimbin mɔmɔk ponn ni, tiwanpeenkaan ni bi gaa bigiim chee ki joo teeni baah jin ŋipɔln ŋi pu na la. Maadichal ni, bi nyu ndaan mu bi gaa baapɔlndam chee na la.

⁹ “Maanib, nimi pu le m nan ku doo Amonn yaab, bima le ye bijab bi nan fɔk ke santina aasui ki pɔɔ ke ŋikpan aasui na.

¹⁰ Min le nyan ni nimi Ijipt aatiŋ ni, ki di nimi dii nteersakpiin ni, ŋibin imonko ilee, le ki di Amor yaab aatiŋ tii nimi, le ki kpaln nimi aatiŋ.

¹¹ Min le nan lee nijapɔtiib bibaa bi li ye maabɔnabtiib, le ki lee biken mu bi li ye maatutum bi puu ke baan nyu ndaan kpala na. Israel yaab, m gii la aa? Min Uwumbɔr le len kina.

¹² Le ni cha maatutum ngbaan nyu ndaan, ki bui maabɔnabtiib na ke bi taa nabr maabɔr.

¹³ Dandana, m ga ŋa nimi ke unii u tu lituln aan li nyaŋ u na la.

¹⁴ Hali, binib bi ŋmaa san sakpen na aan ŋmar; bipɔɔndam aapɔɔn ga doo, le butɔb aajab aan ki ŋmaa gaa bibaa lii.

¹⁵ Binib bi joo itɔi na aan ki ŋmaa sil ki too, le bitaasam aan ŋmaa san ŋmar, bijab bi dik itaan pu na mu aan ŋmaa ŋmar.

¹⁶ Liyaadaal ngbaan kan, hali butɔb aajab bi kaar sakpen na ga di baajawan mae ki san.” Uwumbɔr le len kina.