Aisaya 9 - Uwumbɔr aagbaŋ

¹ Baan ŋmaa kan nsan mubaa ki dii aan ki ŋmar falaa umina aayoonn. Sebulunn aanib ni Naftali aanib aatiŋ ki bi nnyusakpem wɔb ki ti saa Jɔɔdann aamɔɔdapuul ni Galilee aatiŋ, biwɔwɔm aah bi nin chee na, nan jin inimɔɔn, le n‑yoonn mu choo na kitiŋ ngbaan kookoo ga kan bunyuŋ.

N‑yoonn mu choo na aabɔrkpaan

² Nima aanib bi bi mbɔmbɔɔn ni na kan nwiihn sakpiin. Bi nan bi mbɔmbɔɔn ni, le dandana, nwiihn woln bi pu.

³ Uwumbɔr, aa tii bi mpopiin sakpen a; aa cha bisui piir sakpen a. Bi mɔɔni saah ŋa pu tii bi na pu, ke binib aah chee njikaabim kan, bi mɔɔni pu na, bee bi yaa yakr tiwan ni bi jan kijaak ki gaa ni na kan, baah mɔɔni pu na,

⁴ ba pu? aa gaa bi baatun ŋi nyuun ki nyaŋ bi na, ni likugeln li nyiibaa bibɔgbin pu na. Aa nyaŋ linibol li muk bi ki ŋa bi bijakaab na, ke saah nan nyaŋ Midiann aajab n‑yoonn mu jer na pu na.

⁵ Mmii le ga wu bijab ngbaan aajaak aanaatak ni baabɔkul ŋi gur ye nsin ŋmeen na.

⁶ Bi ma ubo tii timi. Bi tii timi ubijabo. Le u ga li ye timi aajojoor. Waayimbil ga li ye ke, “Lijinjiir Aasusur,” ni “Mpɔɔn mɔmɔk Aawumbɔr,” ni “N‑yoonn mu kaa kpa ndoon na Aate,” ni “Nsuudoon Aabɔrbo.”

⁷ Waanaan aapɔɔn aan li kpa ndoon. Waanaan ga li kpa nsuudoon n‑yoonn mɔmɔk. Uwumbɔr ga tii u uyaaja Ubɔr David aanaan. U ga li joo nnaan ngbaan ki cha mu li kpa mpɔɔn, ki ga tii binib baabamɔn ki cha mbimbinyaan li bi ki ti saa dulnyaa aadoon. Uwumbɔr Mpɔɔnsakpiindaan puu ke u ga ŋa kina.

Uwumbɔr ga daa Israel yaab aatafal

⁸ Uwumbɔr bui ke u ga daa Jakob aayaabitiib Israel yaab aatafal.

⁹ Israel yaab bimɔk bi Samaria aatiŋ ni na ga bee ke u sil ga ŋa kina. Bi kpa kigaak ni inimpoo. Bi len ke,

¹⁰ “Ti ga di ŋifakuu maa ŋitanbil aadichal ŋi lir na. Bi gaa ŋikakan lir a, le ti ga di santina giin ŋaabuul ni.”

¹¹ Tɔ, Uwumbɔr fiin baadim aaŋuul ke bi nan tak bi.

¹² Siria yaab ga nyan ni liwipuul wɔb, le Filistia yaab mu nyan ni liwilir wɔb, ki waa bimɔi ki ban bi. Nimina aapuwɔb na, Uwumbɔr aaŋuul aan kee sɔŋ; u beenin ban ke u daa bitafal.

¹³ Uwumbɔr Mpɔɔnsakpiindaan daa Israel yaab aatafal; le bi yii kaa kpeln baabimbin ki gir ni u chee.

¹⁴ Nwiin mubaa le Uwumbɔr di daa Israel yaab aaninkpiib ni baanib aatafal; u ga doo bi, liyil ni ŋitaa.

¹⁵ Bininkpiib bi por na, ni baaninyuum le ye liyil, le ŋitaa ye Uwumbɔr aabɔnabr bi joo inyamɔn mɔk binib ngbaan na.

¹⁶ Binib bi loln bi pu nsan na di bi yenn a, ki cha bilan ŋmal bi.

¹⁷ Kina pu na, Uwumbɔr aan cha unachipɔɔn ubaa ŋmar. Waan san nkpobim ni bikpopiib kinimbaak; ba pu? binib ngbaan mɔmɔk aa dii Uwumbɔr aasan; bi kpa mbiin, le baaliin mɔmɔk ye tibɔbir. Nimina aapuwɔb mɔmɔk na, Uwumbɔr aaŋuul aan kee sɔŋ; u ga li beenin ban u moo daa bitafal.

¹⁸ Binib ngbaan aatunwanbir bii tiwan ke mmii aah wu ikokon ni ŋinaabukar pu na la. Baatunwanbir bii tiwan ke kichook ni aamii aaŋmanyuu na la.

¹⁹ Uwumbɔr Mpɔɔnsakpiindaan aaŋuul aah fii na, waatafadaan ngbaan ga bii tiwan ni binib mɔmɔk ke mmii aah wu bii tiwan pu na la. N‑yoonn ngbaan kan, ubaa aan ki li nyi uŋeen aatɔ aabɔr.

²⁰ Le kitiŋ ngbaan mɔmɔk pu aanib ga li tɔkl tijikaar siib ti bi kan na le ki ji. Nimina mɔmɔk mu aan cha nkon doo. Hali bi ga di baabim ŋa tijikaar.

²¹ Manase aanib ni Efraim aanib ga to tɔb butɔb, le ki ki gir kpaan ki to Juda yaab butɔb. Nimina aapuwɔb mɔmɔk na, Uwumbɔr aaŋuul aan kee sɔŋ; u ga li beenin ban u moo daa bitafal.