Aisaya 8 - Uwumbɔr aagbaŋ

Aisaya aajapɔɔn ye limɔkl le ki tii binib ngbaan

¹ Le Uwumbɔr ki bui mi ke, “Ban tiwaŋmeekaan ni pee na ki ŋmee ni pu aan ŋŋmeen ngbaan li filk aan unii mɔk li waa mu ke: ‘Maher Salal Has Bas’.

² Ban bijab bilee bi aa tii bi naadii na, Uwumbɔr aatotoorninkpel Uria, ni Jeberekia aajapɔɔn Sekaria aan bi li ye seeraadam.”

³ Tɔ, naa yunn le mpuu dek lipuul. Waah ma ubijabo na, le Uwumbɔr bui mi ke, “Yin u ke, ‘Maher‑Salal‑Has‑Bas’.

⁴ Waahr aan u ti ŋa nlan ki ŋmaa len ke ‘Nna’ ni ‘Nte’ na, Asiria aabɔrkpaan ga gaa Damaskus aawangol ni Samaria yaab aah jenn gaa tiwan ni mɔmɔk na.”

Asiria aabɔrkpaan choo

⁵ Uwumbɔr nan ki len m chee.

⁶ U bui ke, “Binib ngbaan aah yii Siloa aabunbik ki puu suuna, ki tee san ubɔrkpaan Resinn ni ubɔrkpaan Peka na,

⁷ min Uwumbɔr ga joo ni Asiria aabɔrkpaan ni waajab bi nan tak Juda yaab. Bi ga li san ni ke limɔɔl Yufrates aawam aah san mala pu ki gbiini par laamɔɔgban pu na la.

⁸ Bi ga ŋar Juda ŋŋaan ki biin tiwan mɔmɔk pu ke nwam na.” Tɔ, Uwumbɔr bi ti chee. U ga taln uŋaal ki biin kitiŋ ngbaan pu.

⁹ Nimi ŋitimbol mɔmɔk, kuun tɔb chee ijawaan pu man. Nimi bi bi dandar kitiŋ kee pu na, li pel man. Gor man nibaa ki kiir kijaak. Mbamɔn, gor man, ki tee li san ijawaan man.

¹⁰ Kpokl naah ga ŋa pu na man. Bi mu aan tee ŋman. Len naah gee pu na man. Ni mɔmɔk ye fam la; ba pu? Uwumbɔr bi ti chee.

Uwumbɔr sak waabɔnabr ngbaan

¹¹ Uwumbɔr di waapɔɔn ki sak mi ke m taa dii nsan mu binib ngbaan dii na. U bui ke,

¹² “Taa kpaan binib ngbaan chee, ni baah bi tun baatun ŋi na ni, ki taa li san ijawaan tiwan ni pu bi san ijawaan na.

¹³ Teer ke min Uwumbɔr Mpɔɔnsakpiindaan ngbaan bi chain; min baanja le aa ga li san ijawaan.

¹⁴ Maah bi chain sakpen pu na, m naahn litakpal li binib gbeer li na la. M naahn kitaŋ ki chuu Israel ni Juda aanaan aanib, ni Jerusalem aanib na la.

¹⁵ Pam ga gbeer; bi ga lir ki wɔi. Kitaŋ ngbaan ga chuu bi.”

Taa toor bitekpiib man

¹⁶ Nimi maadidiliib, ni li kii ki joo Uwumbɔr aah di tibɔr ti tii mi ke m nabr ti na.

¹⁷ Uwumbɔr di ubaa bɔr waanib chee, le mma kii tii u, ki kpa limakl u pu.

¹⁸ M ni mbim bi Uwumbɔr tii mi na sɔ. Uwumbɔr Mpɔɔnsakpiindaan u aabɔrjal bi Sionn aajool paab na le di timi tun ni ke ti nan li ye limɔkl ki tii Israel yaab.

¹⁹ Le binib ga bui nimi ke ni buen bibɔɔb, ni binyɔkdam, ni bipɔnijoob chee ki ti baa bi ke, “Ti ga ŋa kinye?” Bi ga len ke, “Ni ŋan ke binib li buu ibɔɔ ki baa lik bibaa pu.”

²⁰ Le ni ga gar bi ke, “Li pel man Uwumbɔr aah mɔkni nimi pu na. Taa pel man bipɔnijoob aah len pu na. Baah tuk nimi pu na aa kpa tinyoor.”

Falaa aayoonn

²¹ Binib ngbaan ga li chuun kpak kitiŋ ngbaan pu, kaan kan nibaa bi ji ki nyu mu. Baakon ni baaŋuul ngbaan pu bi ga puun lii baabɔrkpaan ni Baawumbɔr pu. Nibaakan bi ga lik kitaapaak,

²² bee bi si lik kitiŋ, kaan li waa nibaa see falaa ni mbɔmbɔɔn ŋmeen, mbɔmbɔɔn mu kpa ijawaan aan bi cha bi ti koo mu ni na.