Aisaya 7 - Uwumbɔr aagbaŋ

Uwumbɔr aah di inaŋ i tii ubɔrkpaan Ahas na

¹ Buyoonn ubɔrkpaan Jotam aajapɔɔn Ahas, u aayaaja ye Usia na, nan ye Juda aatiŋ aabɔr na, le butɔb nan fii nima. Resinn, u ye Siria aabɔrkpaan na, ni Remalia aajapɔɔn Peka, u ye Israel aabɔrkpaan nan buen ti tak Jerusalem yaab, le kaa ŋmaa nyaŋ bi.

² Juda aabɔrkpaan ngbaan aah ŋun ke Siria yaab aajab koo ni Israel yaab aatingbaan ni na, le ijawaan chuu u ni waanib, le biwon gbaa tɔtɔk ke libuln yaa daar kan tisufar gbaa pu na.

³ Le Uwumbɔr bui Aisaya ke, “Yoor aajapɔɔn Sear Jasub, ki ti tooh ubɔrkpaan Ahas nsan ni. Aa ga ti kan u nin chee bikpaluub tun baatuln na, nnyunsan mu joo ni nnyun ki nyan ni paacham aabukpiik ni na.

⁴ Bui u ke u chuu ubaa suuna, ki gor ki li kii, ki taa li san ijawaan aan ki taa cha ni li muk u. Ubɔrkpaan Resinn ni waanib Siria yaab ni ubɔrkpaan Peka aa bir ki pii ŋimiidatul ŋi kaa gaal na aamii.

⁵ Siria ni Israel yaab aabɔrkpaam kpaan le ki kpokl.

⁶ Bi dak ke bi buen ti jenn gaa Juda, ki faan kitiŋ ngbaan aanib aan bi kpee bi pu, aan ki di Tabeel aajapɔɔn kaan nnaan.

⁷ “Le min Uwumbɔr bui ke nimina aan ŋa daalbaadaal;

⁸ ba pu? Siria aapɔɔn aa fuu Damaskus ki ye Siria aatiyil na aapɔɔn, le Damaskus mu aa pɔɔ ki jer ubɔrkpaan Resinn. Israel aatiŋ ma kan, joo cha ŋibin imonko itaa ni ŋiŋmu na ki mɔmɔk ga kpar yaa tɔb chee, kaan ki ŋmaa sil ke litimbol libaa na.

⁹ Israel aa pɔɔ ki jer Samaria ki ye kaatiyil na, le Samaria mu aa pɔɔ jer ubɔrkpaan Peka. “Aa yaa kaa kpa gaakii u ga yunn na kan, aa mu aan li bi ki yunn.”

Imanuel aah ye limɔkl pu na

¹⁰ Le Uwumbɔr ki tun Aisaya, Ahas chee,

¹¹ le u ti bui u ke, “Cha Aadindaan Uwumbɔr tii si limɔkl. Li ga ŋmaa nyan ni kitekpiitiŋ bee kitaapaak na.”

¹² Le Ahas giin bui u ke, “Maan cha Uwumbɔr tii mi limɔkl. M yii ke maan tɔŋ Uwumbɔr.”

¹³ Waah len kina na, le Aisaya giin bui u ke, “Ubɔrkpaan David aayaabitiib, li pel man, naa ŋan ke ni cha unibɔn aalaasaab nyan nimi ni, le ni ki ban ke Uwumbɔr mu aalaasaab nyan nimi ni ii?

¹⁴ Ni yaa ye kina kan, Uwumbɔr ubaa ga tii nimi limɔkl: lima le ye ke upii u kaa nyi uja na ga li kpa lipuul ki ga maa ubijabo ki ga yin u ke ‘Imanuel.’

¹⁵ Buyoonn ubo ngbaan ga nan ŋa nlan ki bee ni ŋan na ni ni kaa ŋan na, binib aajikaar ga li ye nnaabiin ni tisiir la.

¹⁶ Waahr aan n‑yoonn ngbaan nin fuu ni na, bibɔrb bilee bi faani nimi na aatim ga kpaln tilangbenn la.

¹⁷ “Uwumbɔr ga di tibɔbir aayoonn lii ni aa ni saanib pu, ni nnaan aadichal mɔmɔk pu. Ti ga jer tibɔbir ti dan nnaan ngbaan ni, buyoonn Israel yaab ni Juda yaab nan yakr tɔb chee ki nan saa din na. U ban u yin ni Asiria yaab aabɔrkpaan la.

¹⁸ “N‑yoonn ngbaan yaa nan fuu ni kan, Uwumbɔr ga foo ifoo le ki mɔk Ijipt yaab ke bi fii ni ke tisibir na ki nyan ni Nail aamɔɔpan mɔmɔk; le Asiria yaab mu ga fii nyan ni baatim ni ke inangbee na ki dan.

¹⁹ I ga fii nan gbiin tifatann aalɔlɔnn ni, ni titakpalunn ni, ki ga biin ikokon aasui mɔmɔk pu, ki biin kimopɔɔk mɔmɔk ni.

²⁰ “N‑yoonn ngbaan yaa nan fuu ni kan, Uwumbɔr ga ti ban uyikpukuur aan u nyan ni Yufrates aamɔɔdapuul; uma le ye Asiria aabɔrkpaan, le u ga nan kuu nimi aalangban, ni tiyikpir ti bi niyil pu na, ni tikor timɔk baa niwon pu na.

²¹ “N‑yoonn ngbaan yaa nan fuu ni kan, hali ukpaal ubaa yaa ŋmaa joo unaabo ubaa ni iŋoob ilee kan,

²² yaabiin ga ŋmaa kpiin u. Mbamɔn, binib siib bi ŋmar kitiŋ ngbaan pu na aajikaar ga li ye nnaabiin ni tisiir la.

²³ “N‑yoonn ngbaan yaa nan fuu ni kan, ŋisubil aasui aasar ti kpa isui lichur aan bi ga ŋmaa kooh ti tikur aamombil lichur na mɔmɔk ga kpaln ikokon aasui aasar la.

²⁴ Nima chee le binib ga di itɔi ni ipiin buen mban. Mbamɔn, kitiŋ ngbaan ga kpaln ikokon aasui aatiŋ la.

²⁵ Ŋijoo paab nin chee bikpaab nan ko na, ikokon aasui le ga gaa ni mɔmɔk, le ubaa aan ki kaa buen nima. Ni ga li gur ye inaa ni ipiih aamoŋmɔpaan la.”