Aisaya 65 - Uwumbɔr aagbaŋ

Uwumbɔr daa binib bi yii u na aatafal

¹ Uwumbɔr bui ke, “M nan gor ki kii ke m kii maanib aameel, le bi yii kaa mee. M nan gor ki kii ke bi kan mi, le bi yii kaa pɔɔni bibaa ke bi ban mi. Litimbol ngbaan aa nan mee mi kpala, hali m nan gor ki kii ke m kii baameel n‑yoonn mɔmɔk ke, ‘Min le na do; m ga ter nimi.’

² N‑yoonn mɔmɔk m nan gor ki kii ke m gaa maanib, le bi yii ki tun titunwanbir ki dii bibaa aasan.

³ Bi ŋani mi liŋuul, kaa san inimɔɔn. Bi toor tisamoor ki seer nnyɔknii ŋiwaabimbin pu.

⁴ Kinyeek kan, bi chaa titakpalunn ni, ni ŋikaakul ponn ni le ti buu tibɔɔr bitekpiib chee. Bi ŋmɔ ugbeer, ki nyu baah di tiwakor ti toor tii ŋiwaa na aakpinyun mu bi di tinann seen mu ni na,

⁵ le ki bui ke, ‘Taa mar ti chee; ti bi chain jer si, aa kpa tijɔŋ, taa meeh timi.’ Le m bui ke, ‘Min ni binib ngbaan aaboln aan kpaan, m gee liŋuul li bi ke mmii mu kaan junn na le bi pu.’

⁶ “M puun siin baatafadaan, ki ŋmee maah ga ŋa bi pu na bil. Maan suln baah ŋa pu na aabɔr, m ga teen bi

⁷ baatunwanbir ni biyaajatiib aatunwanbir pu. Bi seer nnyɔknii tiwaachur ni ŋigongon paab ki len tibɔbir m pu. Kina pu na, m ga daa bitafal ki ŋeer baah tun pu na la.”

⁸ Uwumbɔr ki len ke, “Ubaa aan bii ndaan aasubil ŋi ŋan na; baah ŋani ŋi pu na sɔ, bi di ŋi ŋa ŋisubil aadaan la. Kina le maan ku doo maanib mɔmɔk, m ga gaa binib bi tun maatuln na lii.

⁹ M ga ŋa tinyoor ŋa Israel yaab ponn ni bi ye Juda aamaal aanib na, le biyaabitiib ga nan li yeh maajoo pu aatiŋ. Bi ye maanib bi m nyan bi na, ki mu ye maatutum. Bima le ga li koo nima.

¹⁰ Bi ga li dooni mi aan ki di baawakor di buen Saronn, ni bi liwilir wɔb na, ni Tibɔbir Aafataŋ ki bi liwipuul wɔb na ti ti ŋmɔ timoor.

¹¹ “Le nimi bi yii mi na ma kan, naan li bi kina, nimi bi yii maagongoln Sionn li bi chain na, ki dooni ŋiwaa Gad ni Meni, ŋiwaa ŋi ni bui ke ŋi kpa liyimɔɔn na, ki siin nimi aabimbin aah ga li doo pu na.

¹² Ni ga li ye nimi aadoon le ke ni kpo mpɔɔkun, ba pu? naa nan kii buyoonn m yin nimi na, kaa pel maah len pu na mu. Ni yii, kaa kii maamɔb, le ki tun titunwanbir,

¹³ le m ban m bui nimi ke binib bi dooni mi ki kii maamɔb na ga li kpa pam bi ji ki nyu, nimi ma kan, nkon ni nnyunyuu ga li joo nimi. Bi ga li kpa mpopiin, le nimi ga ji inimɔɔn.

¹⁴ Bi ga di mpopiin gaa ilahn, le nimi ga wii, nisui aah ga li bii pu na.

¹⁵ Maanib bi m nyan bi na ga li joo nimi aayimbil le puuni lir binib pu, ke bi li bee fam ke nimi na. Min, Bidindaan Uwumbɔr le ga ku nimi, le ki tii binib bi kii maamɔb na liyimbipɔln.

¹⁶ Unii umɔk bi kitiŋ ngbaan pu na yaa ban tinyoor kan, u ga cha Uwumbɔr u ŋani waah len pu na le ŋa tinyoor ŋa u pu. Umɔk ban u puu tipuur na ga di Uwumbɔr u ŋani waah len pu na aayimbil le puu tipuur. N‑yoonn mu jer na aabɔbir mɔmɔk ga kuln.”

Dulnyaa pɔɔn

¹⁷ Uwumbɔr ki bui ke, “M ki bi naani kitipɔŋ ni kitaapaapɔŋ la. Ubaa aan ki teer n‑yoonn mu jer na aabɔr.

¹⁸ Cha nisui li piin aan ni li mɔɔni maah ban m naan ni na pu. Maah ban m naan Jerusalem pɔɔn u na ponn ni ga li ye mmɔɔn ŋmeen la, le kaanib ga li kpa mpopiin.

¹⁹ Min mbaa ga li kpa mpopiin Jerusalem ni kaanib pu. Iwiil aan li bi nima, ubaa aan li yin uken ki ban nterm nima.

²⁰ Mbim aan ki kpo tibipɔnn ni, le binib mɔmɔk ga fuu baakundaal le ki nin kpo. Binib bi ti saa ŋibin nkub ki kpo na ga laa li ye binachipɔm la. Binib bi kpo kaa fuu ŋibin nkub na ga li ye limɔkl ke m daa bitafal la.

^21-22 Binib ga maa ŋidichal ki koo ŋi ponn ni bibaa, uniyayan aan koo ŋi ponn ni. Bi ga bu ndaan aasubil aasui ki nyu yaadaan, uniyayan aan nyu mu. Maanib ga li bi ki yunn ke isui na la. Bi ga ji nimɔk bi tun ki kan na aamɔɔn.

²³ Baah tun ŋitun ŋi na ga li kpa tinyoor, le baabim aan kan tibɔbir tibaa. M ga ŋa tinyoor ŋa bi ni biyaabitiib pu ki joo cha.

²⁴ Waahr aan bi nin mee mi doo na, m ga kii baameel.

²⁵ Takɔ tiib ni ipihbi ga kpaan ji; ichinn ga ŋmɔ timoor ke inaa aah ŋmɔ pu na, le iwaa mu aan ki li bir. Maagongoln Sionn li bi chain na pu, nibaa aan li bi li paab ki bir.”