Aisaya 64 - Uwumbɔr aagbaŋ

¹ Uwumbɔr, aa yaa ba daa kar ntaalangbam ki sunn ni kan, m ba ga li gee kina. Ŋijoo ba ga kan si, le ijawaan chuu ŋi le ŋi dam.

² Ŋi ga li gii ke nnyuntom aah leer pu na la. Dan ki nan kpiir saapɔɔn mɔk saadim, ki cha ŋitimbol aawon li gbaa aanimbiin ni.

³ N‑yoonn mubaa aa nan sunn ni ki nan ŋa lijinjiir aawan ni taa nan dak ni pu na; ŋijoo nan kan si le ki san ijawaan ki dam.

⁴ Ubaa aa kee kan, bee u ŋun Uwumbɔr uken pu u bi ke sin, u ŋani ŋitun ŋee aaboln tii binib bi mak aa pu na.

⁵ Aa yin binib bi gee ke bi li ŋani ni ŋan na, binib bi teer saah ban pu na, ke bi dan aa chee. Aa nan gee ti pu liŋuul, le ti nan beenin tun titunwanbir; hali saaŋuusakpeln ponn ni ti nan beenin tun titunwanbir ki nyan ni n‑yaajayoonn.

⁶ Ti mɔmɔk tun titunwanbir; hali tima aah dak ke taah tun pu na ŋan sakpen na ye tijɔŋ le ki ti doo. Timi aatunwanbir pu, ti naahn tifar ti kuur aan libuln daar cha na la.

⁷ Ubaa aa fenn toŋ ni si ki mee si; ubaa aa chaa aa chee ki ban nterm. Aa di aabaa bɔr ti chee, ki di timi mee, timi aatunwanbir pu.

⁸ Uwumbɔr, sin le ye tite. Timi le ye tiyakr, le aa ye uyakmaal. Sin le naahn timi,

⁹ kina pu na, taa gee ti pu liŋuusakpeln timi aatunwanbir pu. Ti ye saanib la. San timi kinimbaak.

¹⁰ Ubaa aa ki bi saatim mu nan bi chain na ponn ni, le Jerusalem mu kpaln tilangbenn,

¹¹ le Saadichal li bi chain ki ŋan aan tiyaajatiib nan dooni si nima na, wun mmii a. Taah nan gee nin chee mɔmɔk na kpaln tilangbenn la.

¹² Uwumbɔr, nimina mɔmɔk aa muk si ii? Aa ga cha ti ji falaa ki ti jer taah ga ŋman pu na aan aa li ka ŋmin aa?