Aisaya 63 - Uwumbɔr aagbaŋ

Uwumbɔr aah nyaŋ ŋitimbol pu na

¹ “Ŋma ye u nyan ni Bosra aatiŋ ki bi Edom ni na ki choo na? Ŋma ye u pee tiwanyaan ni man na, ki chuun ni mpɔɔn ŋmeen ki choo na?” Uwumbɔr u kpa mpɔɔn sakpen ki ga ŋmaa gaa unii lii na le choo ke u nan moon waanyaŋ.

² “Ba ŋa waawanpeenkaan man sakpen kina, ki naahn ke waah bi nyani ŋisubil aanyun ke u di ŋaa ndaan le na?”

³ Le Uwumbɔr kii ke, “M taa taa ŋitimbol ngbaan ke ndaan aasubil na la, le ubaa aa dan nan ter mi. Maaŋuul ponn ni le m taa taa bi pu, le baasin meeh meeh maawanpeenkaan.

⁴ Le m dakl ke n‑yoonn mu m ga di gaa maanib lii na fuu ni a; ni ŋeer ke m daa baadim aatafal.

⁵ Maah nan lik kaa kan ubaa u ter mi na, ni nan ŋa mi iwaan pam. Le maaŋuul pɔɔk ntaakpab, le m nyaŋ maadim mbaa.

⁶ Maaŋuul ponn ni le m nan taa taa ŋitimbol ki yaa ŋaanib ki di baamɔfal aasin kpir kitiŋ.”

Uwumbɔr aah gee Israel yaab pu na

⁷ Le m bui ke m ga len Uwumbɔr aageehm aah kaa door pu na; m ga pak u waah ŋa pu tii timi na pu. U ŋa tinyoor ti nyuun na ŋa Israel yaab pu, waageehm, ni waanimbaasaln pu.

⁸ Uwumbɔr bui ke, “Bi ye maanib la; baan ŋmann mi.”

⁹ Kina pu le u nyan bi baafalaa ni. Naa nan ye waatuun, uma Uwumbɔr ubaa le nan gaa bi lii. Waageehm ni waanimbaasaln pu le u gaa bi lii. N‑yoonn mu jer na le u nan kii bi,

¹⁰ le bi nan yii u ki nyan upuwɔb, le ni tii Waafuur Nyaan mpombiin. Kina pu le Uwumbɔr kpaln baadin, le ki jan bi kijaak.

¹¹ Le bi teer n‑yoonn mu jer na, Uwumbɔr aatutunn Moses aayoonn, le ki baa ke, “Uwumbɔr u nan nyan waanib aaninkpiib nnyusakpem ni na bi la chee dandana wee? Uwumbɔr u nan di Waafuur Nyaan tii Moses na bi la chee?

^12-13 Uwumbɔr u nan tii Moses waapɔɔn sakpiin ki nan yakr nnyusakpem nfum mulee aan waanib dii jer, ki ti kan liyimbil li kaa kpa ndoon ki tii ubaa na bi la chee?” Uwumbɔr aah nan loln bi pu nsan na, bi nan chuun ke timoor ni aataan na, kaa gbeer nibaa.

¹⁴ Baah peer inaa chaa kifataŋ ki kpa timoor na ponn ni pu na, kina le Uwumbɔr tii waanib lifuur. U loln waanib pu nsan ki cha waayimbil kan bunyuŋ.

Linimbaasaln ni nterm aameel

¹⁵ Uwumbɔr, saah bi paacham nin chee ni bi chain ki kpa kipak na, san timi kinimbaak. Saalandak mu aa nan kpa ti pu na bi la chee? Saapɔɔn bi la chee? Saageehm ni saanimbaasaln bi la chee? Taa suln tibɔr.

¹⁶ Sin le ye tite. Tiyaajatiib Abraham ni Jakob aa ki nyi timi, le sin Uwumbɔr ma le ye tite u gaal timi lir n‑yoonn mɔmɔk na.

¹⁷ Ba ŋa aa cha ti yenn saasan chee? Ba ŋa aa cha titafal pɔɔ sakpen kina aan ti fenn tipuwɔb tii si? Gir ni, saanib bi ye saatutum ki ye sin yaab n‑yoonn mɔmɔk na chee.

¹⁸ Timi aadim nan jenn nyan timi saanib bi bi chain na n‑yoonn mubaa, ki gbaa wii Saadichal.

¹⁹ Aa ŋani timi ke sin le aah kaa nan joo timi n‑yoonn mubaa na, le ni naahn ke taah kaa nan ye saanib n‑yoonn mubaa le na.