Aisaya 60 - Uwumbɔr aagbaŋ

Jerusalem aah ga kan kipak n‑yoonn mu choo na pu na

¹ Jerusalem, fii sil, ki li wiin ke nwiin na; Uwumbɔr aanyuŋ aah wiin chain pu na bi wolni aa pu.

² Ŋitimbol ŋiken pu ga li ye mbɔmbɔɔn la, le Uwumbɔr aawiihn ga woln aa ma pu; waah wiin chain pu na ga li bi aa chee.

³ Ŋitimbol ga kuun dan saawiihn chee, le bibɔrb san dan saataak ki bi wolni na chee.

⁴ Lik goln aabaa ki kan tiwan ni bi ŋani na: Saanib bi kuuni ke bi kun ni la. Aajapɔtiib ga nyan ni dandar; Bi ga yoor aabisatiib ŋmam ke baah ŋmamni mbim pu na la.

⁵ Aa ga kan nimina, le aasui piir chak chak. Aawon ga li gbaa aasui aah piir pu na pu. Bi ga li joo ni ŋitimbol aawangol ki nan tii si; ŋitimbol ngbaan aawangol ga puur nnyusakpem ki pii ni si.

⁶ Laakumii tiib pam ga ki nyan ni Midiann, ni Efa aatim ni ki fuu ni. Bi nyan ni Seba, ki joo ni salmaa ni tulalee. Binib ga len tibɔnyaan ngbaan, bi ga len Uwumbɔr aah ŋa pu na.

⁷ Bi ga joo ni Kedar ni Nebayof aapiih mɔmɔk nan tii Jerusalem yaab ke bi di toor ipiin aatork Uwumbɔr aabimbiln paab aan ni piir usui. Uwumbɔr ga moo nyuŋ Waadichal ki jer laah nan kan pu na.

⁸ Ni ye ba aaŋɔsakpiin ki san mala mala ke ntaalangbam na, ki naahn ŋinanjel le aah choo kun ni na?

⁹ Ni ye iŋɔi i nyan ni dandar na la, i joo ni Uwumbɔr aanib le choo kun ni. Bi joo ni salmaa ni tikunabr la, ke bi nan di nyuŋ timi Israel yaab Aadindaan Uwumbɔr u bi chain ki cha ŋitimbol pak timi waanib na aayimbil.

¹⁰ Uwumbɔr bui Jerusalem ke, “Biwɔwɔm le ga ki gir maa saagon, le baabɔrb li ye saanaagbiib. Maaŋuul ponn ni le m nan daa nitafal, le dandana wee ma m ga mɔk nimi maanimbaasaln, ni maah gee nimi pu na.

¹¹ Jerusalem aagon aabisamɔi aan ki piin nwiin pu ni kinyeek, le ŋinibol aabɔrb ga li joo ni baawangol ki ponn ni.

¹² Le ŋinibol ŋi kaa tun lituln tii nimi na ga kuln kookoo.

¹³ Binib ga di bunaasub ni lisalaasiil ni isui imɔk bi Lebanonn aachook ni ki ŋan ki pɔɔ na giin maa sin Jerusalem, ki ŋa Maadichal kinyaan, ki moo nyuŋ maatiŋ.

¹⁴ Binib bi muk si na aajapɔtiib ga dan ki nan gbaan kitiŋ aanimbiin ni. Binib bimɔk nan lik seen si n‑yoonn mu jer na ga dan nan gbaan kitiŋ ki doon si. Bi ga yin si ke ‘Uwumbɔr aatiŋ’, ki ki yin si ke, ‘Sionn, Israel yaab Aawumbɔr u bi chain na aatiŋ’.

¹⁵ Ubaa aan ki lik si fam, kaan ki li nan si, kitiŋ ki baanib nan san cha ki aan ki ye tilangbenn na. M ga tii si mpɔɔn ni kinyaan nin chee mmɔɔn ga li bi n‑yoonn mɔmɔk na.

¹⁶ Ŋitimbol ni bibɔrb le ga li tun tii si, ke ubo aana aah kpiini u pu aan u ti chikr na. Aa ga bee ke min Uwumbɔr le gaa si lii; min Israel yaab Aawumbɔr Mpɔɔnsakpiindaan na le gaa si lii kookoo.

¹⁷ Buyoonn ni ban mbɔman na m ga tii nimi salmaa, buyoonn ni ban tikur ni idɔ na, m ga tii nimi tikunabr ni mbɔman, le buyoonn ni ban litakpal na, m ga tii nimi tikur. Binib bi joo nimi na aan ki li muk nimi; m ga cha bi di ibamɔn ni nsuudoon le di joo nimi.

¹⁸ Naan ki ŋun tijar aafuuk pu daalbaadaal; libiil aan ki dan nimi aatiŋ ni daalbaadaal. M ga li kii nimi ke ligoln na la; ni ga pak mi, maah gaa nimi lii pu na pu.

¹⁹ Nwiin aan ki li ye nimi aawiihn nwiin pu, le uŋmal mu aan ki li ye nimi aawiihn kinyeek; min Uwumbɔr le ga li ye nimi aawiihn mu kaan junn na, maanyuŋ aawiihn le ga li wiin ni pu.

²⁰ Nimi aapombiin aayoonn ga doo. Min Uwumbɔr le ga li ye nimi aawiihn mu kaan junn na, ki ye nwiihn mu wiin ki yunni jer nwiin ni uŋmal aawiihn na.

²¹ Jerusalem aanib mɔmɔk ga li tun ŋitun ŋi tok chob na la, ki ga li yeh kitiŋ ngbaan mɔmɔk ki ti saa n‑yoonn mu kaa kpa ndoon na. Min le naan bi ki kaan bi ke bi kpiir maapɔɔn mɔk unibɔn mɔmɔk.

²² Hali Jerusalem aadichawaatiir li bi ki bi suuna na ga kpaln litimbol li kpa mpɔɔn sakpen na la. N‑yoonn mu ŋeer na yaa fuu ni kan, m ga cha kina ŋa woween. Min le ye Uwumbɔr.”