Aisaya 6 - Uwumbɔr aagbaŋ

Uwumbɔr yin Aisaya ke u nan ŋa waabɔnabr

¹ Libiln li ponn ni ubɔrkpaan Usia nan kpo na, le min Aisaya nan kan Ndindaan. U nan ka waabɔrjal pu, ki kpa bunyuŋ, le waawanpeenkaan gbiin waadichal ngbaan mɔmɔk.

² Tiwanfuurkaan ni aawon mɔmɔk ye mmii na nan si mann gob u, ki kpa ifeen iloloob. Tiwanfuurkaan ngbaan nibaa mɔk nan di ifeen ilee di biin ninimbil wɔb, ki di ilee biin niwon pu, le ki joo ilee i gur na fiir.

³ Ni nan wii ki yin tɔb ki len ke: “Chain, chain, chain, Uwumbɔr Mpɔɔnsakpiindaan bi chain. Waapak gbiin dulnyaa mɔmɔk.”

⁴ Tiwan ngbaan aah nan tar mpɔɔn pu sakpen pu na, Uwumbɔr Aadichal ngbaan nan deŋni la, le iŋmanyuu gbiin lidichal ngbaan mɔmɔk ni.

⁵ Le m bui ke, “Maabɔr doo a. Maamɔfal junn le na; ba pu? tibɔr timɔk nyani mmɔb ponn ni na ye titunwanbir aabɔr la, le maah bi binib bi ponn ni na mu aabɔr ye titunwanbir la. Le nimina mɔmɔk aapuwɔb, m kan Ubɔrkpaan ngbaan, Uwumbɔr Mpɔɔnsakpiindaan.”

⁶ Le tiwanfuurkaan ngbaan ponn ni nibaa fii dan m chee, ki joo ni limiisakɔl li u di kichaababr di bab li kitork aabimbiln paab na.

⁷ U nan di limiisakɔl ngbaan meeh mmɔgban le ki bui ke, “Nimina meeh aamɔgban, dandana saataani buen a, le Uwumbɔr di cha saatunwanbir mɔmɔk pinn si a.”

⁸ N‑yoonn ngbaan le m ŋun Ndindaan aaneel len ke, “M ga tun ŋma? Ŋma ga li ye timi aatuun?” Le m bui ke, “M ga buen. Tun mi.”

⁹ Kina pu le u bui mi ke m li cha ki ti di tibɔr tee tuk binib ngbaan ke, “Ni po gee ni ŋa pu, ni ga pel ki pel, kaan bee Uwumbɔr aaliin aatataa. Ni ga lik ki lik, kaan li waa tiwan ni ŋani na.”

¹⁰ Le u ki bui mi ke, “Cha binib ngbaan aasui taa li bi nibaa ni, ki cha bitafal kpaa, ki cha binimbil mu jɔb, aan bi taa li waa ki taa ŋun, ki taa bee nibaa. Ni yaa kaa ye kina kan, bi ga kpeln baabimbin ki dii mi aan m tii bi laafee.”

¹¹ Le m baa ke, “Ndindaan, nimina ga yunn kinye?” Le u gar mi ke, “Ki ti saa n‑yoonn mu ntim ngbaan ti kuln, nibaa aa ki bi mu ni na; buyoonn unii aa ti ki bi ŋidichal ni na; buyoonn kitiŋ kee kibaa aa ti ki kpa tinyoor tibaa na.

¹² Min Uwumbɔr ga cha binib nya buen dandar ki kuln ki mɔmɔk.

¹³ Hali unii ubaa baanja le yaa gur binib kipiik ponn ni kitiŋ ngbaan pu kan, u mu ga kpo; unibaan ngbaan ga gur li bi ke baah gaa gii likpaln ki cha lisikpiil pu na la.” Lisikpiil ngbaan mɔk Uwumbɔr aanib bi ga nan ki naahn linibol pɔln na la.