Aisaya 59 - Uwumbɔr aagbaŋ

Uwumbɔr aabɔnabr aah bii binib ngbaan baatunwanbir pu pu na

¹ Taa dak man ke Uwumbɔr aa kpa mpɔɔn ke u gaa nimi lii, bee u kpaa sakpen, kaan ki ŋun naah yin u pu ki ban nterm na.

² Ni ye nimi aatunwanbir pu le waa ŋun nimi aayim ngbaan. Nimi aatunwanbir le yakr nimi Uwumbɔr chee naa ŋmaa dooni u.

³ Ni ye binyamɔndam, binib bi ban kijaak na, ni binikurb la.

⁴ Naa kpa ibamɔn, ki mu joo tibɔr chaa bibɔjirb chee. Ni si inyamɔn pu le ke ni di ji tibɔr ngbaan. Ni joo nimi aalandak ki ban ke ni di tun biken titotonn.

^5-6 Nimi aalandak i kaa ŋan na bir ke ujagen aajen na la. Faa wii li, le uwaa ga nyan ni li ponn ni. Nimi aalandak i bir ngbaan na aan tii nimi tinyoor tibaa, i naahn likekeln li bi di nandala aakokon luu li na la.

⁷ N‑yoonn mɔmɔk ni dak ke ni ŋa ni kaa ŋan na la, le naa taani kpala kina aaŋam. Naa sii ki dakl lik waahr aan ki nin ku unii u kaa tun taani ubaa na. Nin chee mɔk ni jer na ye mbiin ŋmeen la,

⁸ le unii umɔk bi nin chee ni bi na kan, udaan aa kee kan lifuur. Naah ŋani nimɔk na aa kpa ibamɔn. Ni dii nsan mu gɔr na la, le unii umɔk dii nsan ngbaan na aan kan lifuur.

Binib aah kpiir baatunwanbir pu pu na

⁹ Binib ngbaan bui ke, “Dandana ti bee naah ŋa pu aan Uwumbɔr aan gaa timi binib bi muk timi na chee lii na. Ti mak nwiihn pu le ti li chuun dii, le ni ye mbɔmbɔɔn ŋmeen la,

¹⁰ le ti chuun tuul ke bijoom na. Ti chuun nwiin pu le ki gbeer, ke naah ye kinyeek le na, ki naahn ke taah bi kitekpiitiŋ ni le na.

¹¹ Ijawaan joo timi, le tiwon yɔl. Ti neen ke Uwumbɔr nan nyan timi limukl ni, ni tiwan ni kaa ŋan na ponn ni, le nibaa aa ŋani.

¹² “Uwumbɔr, taah tun si titunwanbir ti na nyaŋ. Timi tibaa aataani galni timi la. Ti nyi taah tun pu na mɔmɔk.

¹³ Ti yii si, kaa si aapuwɔb, kaa dii saasan. Ti muk biken, ki fenn tipuwɔb tii si. Timi aalandak, ni timi aamɔliin mɔmɔk ye inyamɔn la.

¹⁴ Ibamɔn daa ti chee, kaan ŋmaa mar ni timi. Binib aah wiir nin chee na, mbamɔn gbeer la, kaan ŋmaa kan mpaan nima.

¹⁵ Mbamɔn par sakpen, le unii umɔk di cha titunwanbir aaŋam na ga kan ke uma le titunwanbirdam muk.” Uwumbɔr kan nimina, le naa mɔɔr u, ibamɔn aah kaa bi pu na.

Uwumbɔr gor ke u gaa waanib lii

¹⁶ Ni gar u pam ke ubaa aa bi u ter baah muk binib bi na. Kina pu na, u ga di ubaa aapɔɔn le di gaa bi lii, ki ji linyaŋ ngbaan.

¹⁷ U ga di mbimbinyaan mu bi ke tikur ti bii kibiŋ pu na, ki li chik tikur aayikpupuk ki ye waapɔɔn mu gaa binib lii na, ki li kpa iniman ki daa binib aatafal baah ŋa biken falaa pu na.

¹⁸ U ga daa waadim aatafal baah tun taani ki ŋeer pu na, ni binib bi bi dandar aatim ni na mu.

¹⁹ Ki nya liwipuul ki ti saa liwilir wɔb, bi ga li san u ni waapɔɔn. U ga dan ke limɔɔl li puu mala mala na la, ki naahn libuln li pɔɔ na.

²⁰ Uwumbɔr bui waanib ke, “M ga dan Jerusalem ki nan sil nichaŋ ni, ki nan gaa nimi bi yii nimi aatunwanbir na lii,

²¹ ki cha m ni nimi puu tipuur tii tɔb. M di maapɔɔn ni maakaal tii nimi ke ni li ye nimi yaan ki ti saa n‑yoonn mu kaa kpa ndoon na, ki nya din ki joo cha na, ni ga kii maamɔb ki mɔk nimi aabim, ni niyaabitiib ke bi kii maamɔb ki ti saa n‑yoonn mu choo na.”