Aisaya 57 - Uwumbɔr aagbaŋ

Uwumbɔr aah bii Israel yaab aawaa pu na

¹ Bininyaam kpoi, le ubaa aa ŋmaa bee naah ŋa pu aan bi kpoi na, le naa ti ki muk unii ubaa. Unii ubaa aa bee ke Uwumbɔr le nya bininyaam dulnyaa wee ni ke bi taa ki ji falaa.

² Binib bi aabimbin ŋan na yaa kpo kan, bi kani nsuudoon ni lifuur, nkun ni.

³ Nimi titunwanbirdam, dan do man aan Uwumbɔr nan ji nimi tibɔr. Nimi ni bibɔɔb, ni bidagoob, ni pateer tiib ye tiwanbaan la, ubaa aa jer uken.

⁴ Ŋma aan ni ŋani u yaansara? Ŋma aan nimi binyamɔndam yuul?

⁵ Ni doo bipiib chee tiwaachur ni, ke ni dooni ŋiwaa ŋi kpa mmaal na la. Ni joo nimi aabim ti toor kitork titakpalunn ni, ikpen aafataŋ ni.

⁶ Ni yoor ŋitakpal ŋi ŋan na nima chee, le ki ti dooni ŋi ke ŋi ye nimi aawaa. Ni bar ndaan kpir ŋi pu ke ni tii ŋi ipiin la, ki tii ŋi njikaabim mu aapiin. Ni dak ke nsui piin nimina mɔmɔk pu uu?

⁷ Ni chaa ŋijoo paab ti toor kitork le ki doo bipiib chee nima.

⁸ Ni joo nimi aanyɔbombom ki joo siini nimi aabisamɔi. Ni yii mi, le ni ni nibɔtiib, bi ni pa bi ŋimombil waahr aan ki nin doon bi chee na yiir nimi aawanpeenkaan, ki jon ti dɔ nimi aawandookaan ni wiir na pu. Nima chee le ni ŋani naah gee pu na.

⁹ Ni ŋmir nimi aatulalee ni nimi aakpan le ki chaa ti dooni liwaal Molek. Ni yaa ban ŋiwaa kan, ni ga tun binib bi buen dandar, hali kitekpiitiŋ ni.

¹⁰ Ni muk nibaa ki lik ban ŋiwaa ŋiken, kaan di cha. Ni dak ke nimi aawaabir ngbaan tii nimi mpɔɔn la, kina pu na, naa bakr kpala.

¹¹ Uwumbɔr bui ke, “Ŋiwaa ŋi cha ijawaan chur nimi na ye ŋma, le ni tuk mi inyamɔn aabɔr ki suln m pu kookoo? Maah ŋmin suuna kaa ki gar nimi ni yunn sakpen na, le naa ki pak mi ii?

¹² Ni dak ke naah ŋani pu na le ŋan, le m ga nyan nimi aatuln mɔmɔk mpaan pu, le nimi aawaa ngbaan aan ŋma gaa nimi lii.

¹³ Ni yaa wii ki ban nterm kan, ni cha nimi aawaa ngbaan ter nimi. Litakpiln libaa aabuln le ga daa ŋi di buen. Le binib bi gaa mi ki kii na ma ga li bi kitiŋ ngbaan pu ki ga li dooni mi Maadichal ni.”

Uwumbɔr aah puu ke u ga tii waanib laafee pu na

¹⁴ Uwumbɔr ki len ke, “Cha maanib gir ni m chee. Chuu nyan tiwan nimɔk laŋ baasan na. Naan nsan ki gor mu siin man.

¹⁵ “Min le ye paacham Aawumbɔr u bi chain ki bi n‑yoonn mɔmɔk na. M bi nin chee paa ki bi chain na la, le ki mu ki bi binib bi sunn bibaa taab aan bisui bii buyoonn bi bee ke bi tun titunwanbir na chee, ki ga pɔɔk bitaakpab ki sɔŋ bisui.

¹⁶ M tii maanib limɔfal, kina pu na, maan ki galn bi ki gee liŋuul bi pu ki ti saa n‑yoonn mu kaa kpa ndoon na. M yaa ŋa kina kan, bi ga fik.

¹⁷ Baatunwanbir ni baakumɔŋ pu le m nan gee bi pu liŋuul, le ki nan daa bitafal ki san cha bi. Le baa nan kpeln, ki beenin dii baasan.

¹⁸ “M kan baah ŋa pu na, m mu tee ga tii bi laafee. M ga loln bi pu nsan ki ter bi, ki ga sɔŋ binib bi wii na aasui.

¹⁹ M tii binib bi duun na, ni binib bi dandar na mɔmɔk nsuudoon. M ga tii maanib laafee.

²⁰ Tɔ, bibiindam ma naahn nnyusakpem mu kaa ŋmaa doo suuna na, mu aanyunkpenn joo ni tijɔŋ ni tikpakpar na la.

²¹ Titunwanbirdam aa kpa nsuudoon.” Uwumbɔr aah len pu na le na.