Aisaya 56 - Uwumbɔr aagbaŋ

Ŋinibol mɔmɔk ga li ye Uwumbɔr aanib la

¹ Uwumbɔr bui waanib ke, “Li ŋani man tiwan ni ŋan ki tok na, ba pu? naan ki yunn le m ga gaa nimi lii.

² Binib bimɔk joo maakpaakool daal mbamɔm, kaa bii mu na, m ga ŋa tinyoor ŋa bi pu. M ga ŋa tinyoor ŋa binib bimɔk aa tun titunwanbir na pu.”

³ Uwɔwɔnja u kpaan Uwumbɔr aanib chee na taa bui ke, “Uwumbɔr aan cha m ni waanib kpaan doon u.” Baah kpaa uja u na taa dak ke waah kaan ŋmaa maa mbim na, waan ŋmaa ŋmal Uwumbɔr aanib ni.

⁴ Uwumbɔr bui kina aaja ke, “Aa yaa pak mi ki joo maakpaakool daal mbamɔm, ki ŋani maah gee pu na, ki gaa ki kii maah puu tipuur ti na kan,

⁵ saayimbil ga yunn Maadichal ni, ni maanib ni, ki jer saah ba ga li kpa mbijabim ni mpiibim pu na. Baan suln aabɔr kpala.”

⁶ Le Uwumbɔr bui biwɔwɔm bi kpaln waanib, ki gee u ki dii u na, ki joo waakpaakool daal, ki gaa waah puu tipuur ti na ki kii mbamɔm na ke:

⁷ “M ga di nimi dan Sionn, maagongoln li bi chain na pu, ki tii nimi mpopiin Maameen Aadichal ni, ki gaa nimi aapiin aatork ki ni toor maabimbiln paab na. Bi ga yin Maadichal ke Mmeen Aadichal, nin chee ŋinibol mɔmɔk mee mi na la.”

⁸ Tidindaan Uwumbɔr u nyan ni waanib Israel yaab tinaagbiir ni na, puu ke u ga nyan binib biken nan kpee bi pu.

Uwumbɔr bii Israel yaab aaninkpiib

⁹ Uwumbɔr bui biwɔwɔm aatimbol ke ŋi dan ke tipeewanbir na ki nan di waanib nab.

¹⁰ U bui ke, “Israel yaab aakikiirb mɔmɔk ye bijoom la. Ni ye baatuln ke bi sur maanib, le baa nyi nibaa. Bi naahn ibɔja i kaa gbei na la, bi po dɔ geen la, le ki daŋni tidaŋ. Bi gee ngeen jer tiwan mɔmɔk.

¹¹ Bi naahn ibɔ i kaa ji babr na la. Bi ye bisalolm bi kaa kpa nlan na. Bi mɔmɔk ŋani baah gee pu na la, le ki ban bibaa aanyaan.

¹² Bi len le ke, ‘Cha ti ban man ndaan; aan ki nyu taah gee pu na. Fen ga fe li mɔ jer din.’”