Aisaya 54 - Uwumbɔr aagbaŋ

Uwumbɔr aah gee Israel yaab pu na

¹ Jerusalem, aa nan bi ke upii u kaa kpa mbim na la, le dandana ma aa ga ŋmaa teen ki gaa ilahn ni mpopiin. Dandana aa ga kan mbim ki jer upii u aachal aa kee buen nibaa chee ki cha u na.

² Wii saadiik ki maa ki waa sakpen na, cha ŋipal li fɔk ki cha ilɔkdɔ mu li pɔɔ.

³ Aa ga moo ban kitiŋ kpee saatiŋ pu ŋipepel mɔmɔk pu; saanib ga ki gaa ntim mu ŋitimbol ŋiken nan gaa bi chee na. Ntisakpem mu binib san cha mu na ga ki gbiin binib.

⁴ Taa san ijawaan man; naan ki ji inimɔɔn; ubaa aan ki lik seen nimi. Aa ga suln saah kaa nan si chob pu na aabɔr, ki suln buyoonn aa nan gur ka ke ukpopii na mu.

⁵ U naan si na ga li bi ke chal na le aa chee, waayimbil le ye Uwumbɔr Mpɔɔnsakpiindaan. Israel yaab Aawumbɔr u bi chain na le ga gaa si lii, uma le ye dulnyaa mɔmɔk aayidaan.

⁶ Israel aatimbol, aa naahn upiisapɔɔn u aachal san cha u aan ilandak joo u na la. Le Uwumbɔr di si giin ni u chee ki bui ke:

⁷ “M nan san cha si siib; le ki ga ki di ngeehm yoor si.

⁸ M nan di liŋuul le ki san cha si siib, le m ga di maageehm mɔk si ki ti saa n‑yoonn mu kaa kpa ndoon na.” Kina le Uwumbɔr u gaa si lii na len.

⁹ “Nowa aayoonn na m nan puu tipuur ke nwam aan ki ji kitiŋ kee. Le dandana m ki puu ke maan ki gee liŋuul aa pu: maan ki kae si, kaan ki daa aatafal mu.

¹⁰ Nibaakan ŋijoo ni ŋigongon ga wur lir, le maageehm mu m kpa tii si na aan doo; maah puu tipuur ke m ga tii si nsuudoon na, m ga li beenin joo ti.” Kina le Uwumbɔr u gee si na len.

Jerusalem u ga li bi n‑yoonn mu choo na

¹¹ Uwumbɔr bui ke, “Jerusalem, sin u kpa kinimbaak na, kitiŋ ki kaa kpa uteter, kaa kpa ubaa aan u sɔŋ kisui na, m ga di ŋitakpanyaan le ki ki di maa saadinyikl.

¹² M ga di ŋitakpanyaan ŋi ŋan na le di maa saadir ti fɔk na, ki di ŋitakpal ŋi moor ke mmii na maa ibisamɔi, ki di ŋitakpanyaan ŋi kpa kidaak na maa ligoln li gob si na.

¹³ Min mbaa le ga mɔk saanib maasan, ki tii bi liwangol ni nsuudoon.

¹⁴ Ibamɔn ni lituln li ŋan na le ga tii si mpɔɔn. Aa ga fuur limukl ni mbiin pu.

¹⁵ Unii yaa tak si kan, maa nyi udaan aabɔr; unii umɔk ban si kijaak na ga lir.

¹⁶ Min le naan uchaa u tuur mmii ki mɔɔ tijawan na. Min le ki naan butɔb aaja u joo tijawan ku na.

¹⁷ Le tijawan nibaa aan ŋmaa tii si titotonn; aa ga li kpa ngarm ki tii unii umɔk galn si na. M ga li si maatutum aapuwɔb ki tii bi linyaŋ.” Uwumbɔr le len kina.