Aisaya 52 - Uwumbɔr aagbaŋ

Uwumbɔr ga gaa Jerusalem yaab lii

¹ Jerusalem, ki pɔɔk, ki ki li nyuun ke saah nan bi pu na. Uwumbɔr aatiŋ ki bi chain na, di saakekenyaan gbab. Binib bi dii ŋiwaa ki kpa tijɔŋ na aan ki koo aa ponn ni.

² Sin Jerusalem, gbuk gaa aabaa lii. Fii nyan titan ni ki kal saabɔrjal pu. Nimi Sionn aanib bi ye binaagbiib na, chuu gbinn tikululn ti bi di baa nimi na.

³ Tidindaan Uwumbɔr bui waanib ke, “Naah nan kpaln binaagbiib na, ubaa aa nan pan ni pu ŋimombil; kina pu na, ni yaa ban ni nya tinaagbiir ngbaan ni kan, ubaa aan ki pa ŋimombil.

⁴ Buyoonn ni nan fii buen Ijipt aatiŋ ni ki ti kpaln biwɔwɔm na, nibaa aasui ni le ni nan ŋa kina; le Asiria yaab nan nan chuu nimi mpɔɔn, ki di buen kaa pan nibaa.

⁵ Tiwanbaan ngbaan le ki ŋa Babiloŋ ni mu: ni ye binaagbiib la, le baa pan ni pu tipar tibaa. Binib bi joo nimi na puk tipupukr ki mak ki lik seeni mi n‑yoonn mɔmɔk.

⁶ N‑yoonn choo le ni ga bee ke m sil ye Uwumbɔr ki bui nimi tibɔr tee.”

⁷ Ni ga li kpa mpopiin ke ntuun ga nyan ni ŋijoo paab, ki joo ni tibɔnyaan ti tii nsuudoon na. U mooni linyaŋ ki bui Sionn aatiŋ ke, “Saawumbɔr le joo dulnyaa.”

⁸ Binib bi kii kitisakpeŋ ngbaan na bi tar, baah kpa mpopiin pu na, le bi kpaan ki tar. Binimbil waa Uwumbɔr aah ki gir choo Sionn pu na.

⁹ Nimi Jerusalem aalangbenn, fii ki li tar mpopiin pu, Uwumbɔr gaa waatiŋ lii, ki sɔŋ waanib aasui.

¹⁰ Uwumbɔr ga di waapɔɔn mu bi chain na gaa waanib lii, le dulnyaa aanib mɔmɔk kan.

¹¹ Nimi bimɔk joo Uwumbɔr Aadichal ni aawan na, nya Babiloŋ ni man. Taa cha tijɔŋ aawan nibaa meeh nimi; li bi chain ki nya man.

¹² N‑yoonn mumina ma kan, naan li ban mala ke ni nya; naan li ban ke ni san ŋmar. Nidindaan Uwumbɔr le ga cheen nimi aan ki li kii nimi ŋipepel mɔmɔk pu.

Ututunn u ji falaa na

¹³ Uwumbɔr bui ke, “Maatutunn ga nyaŋ waatuln; bi ga nyuŋ u sakpen.

¹⁴ Lijinjiir nan chuu binib bi nan kan u na; u nan char char, kaa ti ki naahn unibɔn.

¹⁵ U mu ga ŋa ŋinibol pam chain, u pu le bibɔrb ga li ka waa bimɔi, kaa kpa tibaa bi len. Bi ga kan tiwan ni unii ubaa aa mɔk bi na, ki bee tiwan ni baa ŋun ni pu na aatataa.”