Aisaya 50 - Uwumbɔr aagbaŋ

¹ Uwumbɔr bui ke, “Ni dak ke m jenn maanib lii ke uja aah jenni upuu lir pu na la aa? Seeraa aagbann ti ga mɔk ke m jenn bi lii na bi la? Ni dak ke m di nimi kooh ŋa tinaagbiir ni ke uja aah kooh waabim ŋani tinaagbiir ni pu na la aa? Aayii, ni nan buen tinaagbiir ni nimi aatunwanbir pu la; nimi aabakaa pu le m nan jenn nimi buen.

² Ba nan ŋa maanib yii kaa kii tii mi buyoonn m nan buen m ti gaa bi lii na? Ba nan ŋa baa kii buyoonn m nan yin bi na? Maa ki kpa mpɔɔn m di gaa bi lii la aa? Maamɔliin baanja le ga cha nnyusakpem foor, ki cha ŋimɔɔ mɔmɔk kpaln kitikuun, le ŋaajan kpo nnyunyuu pu.

³ M ga ŋmaa cha kitaapaak bɔln, ke kaah bi wii binib bi kpo na aakpowiil le na.”

Uwumbɔr aatutunn aah pak u pu na

⁴ Tidindaan Uwumbɔr mɔk mi maah ga len pu na aan ki pɔɔk binib bi aataakpab yɔl na aataakpab. U cha m jek ke m pel waah ban u mɔk mi pu na kichakpiik mɔmɔk ni.

⁵ Uwumbɔr tii mi ntafaŋum, le m kii kaa yii waamɔb, kaa fenn mpuwɔb tii u.

⁶ M di mpuwɔb tii binib bi gbaa mi na. Maa nan bui binib bi seei mi ki dar gui maalangbaln aakor ki teei timɔɔtan lɔi mi na ke bi di cha.

⁷ Tidindaan Uwumbɔr aah ter mi pu na, baasiibil aan ŋa mi nibaa. M gor mbaa ki kii ke m gaa ŋi, m nyi ke maan ji inimɔɔn,

⁸ ba pu? Uwumbɔr bi m chee, ki ga mɔk ke maa tun taani ubaa. Ŋma ga ŋmaa galn mi? Udaan cha ti kpaan ki buen libɔjil ni. U li joo ni ngalm mu u kpa na.

⁹ Tidindaan Uwumbɔr le si mpuwɔb. Ŋma ki bi ki ga mɔk ke maabɔr aa ŋan? Bi mɔmɔk ga wɔŋ doo; bi ga wɔŋ ke ŋikpandakur aah ŋman likekeln li na aah ga char char pu na la.

¹⁰ Nimi bi mɔmɔk pak Uwumbɔr ki kii waatutunn aabɔr na, nibaakan ni ga li chuun isan i bɔɔn na ni, ni mu tee tii Nidindaan Uwumbɔr naadii, ki li mak u pu.

¹¹ Nimi bi mɔmɔk dak ke ni bii biken doo na, nimi nibaa aalandak ngbaan le ga doo nimi. Uwumbɔr ubaa le ga cha kina ŋa; ni ga ji falaa sakpen.